இந்தியாவில் கேரள மாநிலத்தில் உள்ள புகழ்பெற்ற சபரிமலை ஐயப்பன் தேவஸ்தானத்தில் ஒரே நாளில் 17 பேருக்கு கொரோனா பாதிப்பு உறுதியாகியுள்ளதாக தெரிவிக்கப்பட்டுள்ளது.

கொரோனா காரணமாக சபரிமலையில் பல்வேறு கட்டுப்பாடுகள் விதிக்கப்பட்டுள்ளது. தற்போது தினமும் 2 ஆயிரம் பக்தர்களும், சனி, ஞாயிறு விடுமுறை நாட்களில் 3 ஆயிரம் பக்தர்களும் தரிசனம் செய்ய அனுமதிக்கப்பட்டு வருகிறார்கள்.

சபரிமலை அய்யப்பன் கோவிலின் வருவாய் இழப்பை கருத்தில் கொண்டு, திருவிதாங்கூர் தேவஸ்தானம் மற்றும் தலைமைச் செயலாளர் தலைமையிலான நிபுணர் குழுவின் பரிந்துரையின் பேரில் கூடுதல் பக்தர்கள் தரிசனத்திற்கு கேரள அரசு அனுமதி வழங்கியுள்ளது.

ஆனால் சுகாதாரத் துறை சார்பில் சபரிமலை தரிசனத்திற்கு கூடுதல் பக்தர்களை அனுமதிக்க எதிர்ப்பு தெரிவிக்கப்பட்டது.

ஏற்கனவே சன்னிதான பணியில் இருந்த 9 பேருக்கு கொரோனா தொற்று ஏற்பட்டது. இந்நிலையில் நேற்று மேலும் 16 ஊழியர்கள், ஒரு காவலர் என மொத்தம் 17 பேருக்கு கொரோனா பாதிப்பு உறுதியாகியுள்ளதாக தெரிவிக்கப்பட்டுள்ளது.

கொரோனா தொற்றால் பாதிக்கப்பட்ட அனைவரும் தனிமைப்படுத்தப்பட்டு தீவிர கண்காணிப்பில் உள்ளனர். இதனை தொடர்ந்து, சிறப்பு பணிக்காக சபரிமலைக்கு வந்துள்ள பொலிஸார் உட்பட அனைவருக்கும் கொரோனா பரிசோதனை நடத்தப்பட உள்ளது.

ஊழியர்களுக்கு கொரோனா தொற்று வேகமாக பரவி வரும் நிலையில், தந்திரி, மேல்சாந்தி மற்றும் கீழ் சாந்திகளுக்கு கொரோனா பரவாமல் தடுக்க சன்னிதானத்தில் கூடுதல் கட்டுப்பாடுகளை கொண்டு வர தேவஸ்தானம் ஆலோசித்து வருகின்றமை குறிப்பிடத்தக்கது.