(ஆர்.யசி, எம்.ஆர்.எம்.வசீம்)

கொரோனா வைரஸ் தொற்றுநோய்க்கு உள்ளாகி உயிரிழக்கும் முஸ்லிம் நபர்களை தமது மத சம்பிரதாயங்களின் பிரகாரம் நல்லடக்கம் செய்ய அனுமதிக்க வேண்டும் எனவும், அரசாங்கம் இனவாத செயற்பாடுகளை கொரோனா விடயத்திலும் காண்பிப்பதாகவும் எதிர்க்கட்சி தலைவர் சஜித் பிரேமதாச இன்று சபையில் முன்வைத்த குற்றச்சாட்டு தொடர்பில் தமது பதிலை நீதி அமைச்சரும், சுகாதார அமைச்சரும்  தெரிவித்துள்ளனர்.

இதன்போது பதில் கூறிய நீதி அமைச்சர் அலி சப்ரி,

கொவிட் -19 என்பது மிகவும் அச்சுறுத்தலான நோயாகும். இலங்கைக்கு மட்டுமல்ல முழு உலகத்திற்கும் இது அச்சுறுத்தலான நோயாகவே உள்ளது.

நாம் அனைவரும் இந்த நோய்க்கு முகம்கொடுத்து வருகின்றோம். கொவிட் -19 வைரஸ் தொற்றுநோய் தாக்கத்தில் இறந்தவர்களை நல்லடக்கம் செய்வதில் முஸ்லிம் மக்களிடையே சில முரண்பாடுகள் உள்ளது என்பதையும் நாம் நன்கறிவோம். ஆனால் இதனை அரசியலாக்குவது தகுதியான செயற்பாடாக அமையாது.

முஸ்லிம் மக்களின் வேண்டுகோள் குறித்து வைத்தியர்களிடம் மீண்டும் கவனம் செலுத்துமாறு கோரிக்கை விடுத்தோம். ஆறுமாத காலத்திற்கு முன்னரே நாம் இந்த வேண்டுகோளை விடுத்தோம்.

எனினும் விஞ்ஞான அல்லது மருத்துவ ரீதியில் இது தாக்கத்தை செலுத்தலாம் என வைத்தியர்களிடம் அச்சம் நிலவியது. அது  என்னவென்றால் தகனம் செய்வதில் முஸ்லிம் சமூகம் கேற்பதை போல நடவடிக்கை எடுத்தால் அது வைரஸ் பரவலுக்கு ஏதுவாக அமையலாம் என்ற அச்சம் நிலவியது.

எனினும் ஆறுமாத காலத்தில் இந்த விடயங்கள் குறித்து ஆராய்ந்து பார்ப்பதாக வைத்தியர்கள் எமக்கு கூறினர். இப்போது மீண்டும் நாம் இது குறித்து ஆராய்ந்து வருகின்றோம்.

எனவே இதனை அரசியல் சுயநலன்களுக்காக கையாள வேண்டாம். மனிதாபிமான ரீதியில் இதனை கையாள வேண்டும் என கேட்டுக்கொள்கிறோம் என்றார்.

சுகாதார அமைச்சர் பவித்ரா வன்னியாராச்சி கூறுகையில்,

இந்த வைரஸ் உலகத்தில் எவராலும் இன்றுவரை முழுமையாக அடையாளம் காணப்படாத, தன்மைகள் குறித்து கண்டறியப்படாத வைரஸ் என்ற காரணத்தினால் நாம் தொடர்ந்தும் இது குறித்து ஆராய வேண்டியுள்ளது.

அத்துடன் சடலங்களை புதைக்காது எரிக்கவேண்டும் என்பது குறித்து  சுகாதார துறையின் விசேட நிபுணர்களின் ஆலோசனைகளுக்கு அமையவே இந்த தீர்மானத்தை முன்னெடுத்தோம்.

எனினும் நீதி அமைச்சரின் வேண்டுகோளுக்கு இணங்க மீண்டும் இந்த விடயம் குறித்து ஆராய்ந்து வருகின்றோம். அதற்கான குழுவொன்றும் நியமித்து ஆராயப்பட்டு வருகின்றது என்றார்.