தென் கொரியாவில் தடுப்பூசிகளை பெற்ற  சிலர் உயிரிழந்த நிலையில் சிங்கப்பூர் முன்னெச்சரிக்கை நடவடிக்கையாக இரண்டு இன்ஃப்ளூயன்ஸா தடுப்பூசிகளின் பயன்பாட்டை தற்காலிகமாக நிறுத்தியுள்ளது.

மேலும் தடுப்பூசிகளின் பயன்பாட்டை நிறுத்துமாறு பகிரங்கமாக அறிவித்த முதல் நாடுகளில் ஒன்றாகவும் சிங்கப்பூர் திகழ்கிறது.

பருவ கால காய்ச்சலை தடுப்பதற்காக தென் கொரியாவில் இலட்சக்கணக்கான மக்களுக்கு தடுப்பு மருந்து செலுத்தப்பட்டு வருகிறது.

இந்த நிலையில் தடுப்பு மருந்து செலுத்தப்பட்டு பிறகு சனிக்கிழமை நிலவரப்படி குறைந்தது 48 பேர் தென் கொரியாவில் உயிரிழந்துள்ள சம்பவம் அந்த நாட்டு மக்களிடையே மாத்திரமன்றி சர்வதேச ரீதியில் பெரும் அச்சத்தை ஏற்படுத்தியுள்ளது.

எனினும் இந்த உயிரிழப்பு சம்பவங்களுக்கும் செலுத்தப்பட்ட தடுப்பூசிக்கும் எதுவித நேரடித் தொடர்பும் இல்லை எனக் கூறும் தென்கொரியா, தடுப்பூசி திட்டத்தை தொடர்ந்தும் முன்னெடுக்கும் என்றும் கூறியது.

இந் நிலையிலேயே 'SKYCellflu Quadrivalent' மற்றும் 'VaxigripTetra' என்ற இரு இன்ஃப்ளூயன்ஸா தடுப்பூசியின் பயன்பாட்டை முன்னெச்சரிக்கையாக நிறுத்துவதற்கு 

சிங்கப்பூர் சுகாதார அமைச்சும் சுகாதார அறிவியல் ஆணையமும் தற்காலிகமாக நிறுத்துவதற்கு தீர்மானித்துள்ளதாக ஞாயிற்றுக்கிழமை பிற்பகுதியில் வெளியிட்ட அறிக்கையில் சுட்டிக்காட்டியுள்ளது.

சிங்கப்பூரில் இன்ஃப்ளூயன்ஸா தடுப்பூசியுடன் தொடர்புடைய இறப்புகள் எதுவும் இதுவரை பதிவாகவில்லை என்பதும் குறிப்பிடத்தக்கது.