இலங்கை கிரிக்கெட் அணியின் நட்சத்திர வீரரான முத்தையா முரளிதரனின் வாழ்க்கையை மையப்படுத்தி எடுக்கப்படும் 800 என்ற திரைப்படத்தின் மோசன் போஸ்டர் நேற்று வெளியாகியிருந்தது. ஸ்ரீபதி ரங்கசாமி இயக்கும் இந்த படத்தில் முத்தையா முரளிதரனாக விஜய் சேதுபதி நடிக்கிறார். 

விஜய் சேதுபதிக்கு வலுக்கும் எதிர்ப்பு - படக்குழுவினர் வெளியிட்ட திடீர் அறிக்கை

ஆரம்பத்திலிருந்து, விஜய் சேதுபதி இத்திரைப்படத்தில் நடிப்பது தொடர்பில் பல சர்ச்சைகள் எழுந்துள்ள நிலையில் தற்போது அதற்கான எதிர்ப்பு வலுப்பெற்றுள்ளது.

இதற்கு எதிர்ப்பு தெரிவிக்கும் விதமாக “ஷேம் ஆன் விஜய்சேதுபதி” என்ற ஹேஷ்டேக் டுவிட்டரில் டிரெண்டாகியிருந்ததுடன் ஒரு பக்கம் விஜய் சேதுபதியின் ரசிகர்கள் we stand with vijay Sethupathi என்ற ஹேஷ்டேக் இல்  அவருக்கு ஆதரவாக பதிவிட்டிருந்தனர்.

இந்நிலையில் இவ் திரைப்படம் குறித்து படக்குழு அறிக்கை ஒன்றை வெளியிட்டுள்ளது.

படக்குழுவினர் அறிக்கை

குறித்த அறிக்கையில்,

முத்தையா முரளிதரன் வாழ்க்கை வரலாறு விஜய் சேதுபதி நடிக்க இருக்கும் 800 திரைப்படம் பல்வேறு வகையில் அரசியல் ஆக்கப்பட்டு வருவதை அறிகிறோம். 800 திரைப்படம் முழுக்க ஒரு கிரிக்கெட் வீரரின் வாழ்க்கை சம்பந்தப்பட்ட படமே தவிர, இதில் எந்த வித அரசியலும் கிடையாது. தமிழகத்தில் இருந்து தேயிலைத் தோட்டக் கூலியாளர்களாக இலங்கைக்கு குடிபெயர்ந்த ஒரு சமூகத்தில் இருந்து வந்த முரளிதரன் எப்படி பல தடைகளைத் தாண்டி உலக அளவில் சிறந்த பந்து வீச்சாளராக உயர்ந்தார் என்பது தான் திரைப்படத்தின் கதையம்சம். 

திரைப்படம் இளைய சமுதாயத்துக்கும் வருங்கால விளையாட்டு வீரர்களுக்கும் தங்கள் வாழ்க்கை பயணத்தில் எவ்வளவு தடைகள் வந்தாலும் தடைகளை கடந்து சாதிக்க முடியும் என்கிற நம்பிக்கையை ஏற்படுத்தும் படமாக இருக்கும். 

இத்திரைப்படத்தின் தயாரிப்பாளராக ஒன்றை மட்டும் நிச்சயமாக சொல்ல முடியும். இத்திரைப்படத்தில் ஈழத்தமிழர்களின் போராட்டத்தை சிறுமைப்படுத்தும் விதத்திலான காட்சியமைப்புகள் கிடையாது. 

என  தெரிவிக்கப்பட்டுள்ளது.