கொரோனா என்னும் அடி, பிசாசுத்தனமான அசுர அடி என்று திரைநட்சத்திரம் ரஜினிகாந்த் தெரிவித்திருக்கிறார்.

இதுதொடர்பாக ரஜினிகாந்த் வெளியிட்டிருக்கும் அறிக்கையில் தெரிவிக்கப்பட்டிருப்பதாவது...

“கொரோனா வைரஸ் தொற்றால் அவதிப்பட்டுக் கொண்டிருக்கும் ஏழை எளிய மக்களுக்கு இடைவிடாமல் தங்களது உதவிகளை தொடர்ந்து செய்து கொண்டிருக்கும் ரஜினி மக்கள் மன்ற நிர்வாகிகளுக்கும், உறுப்பினர்களுக்கும் எனது மனமார்ந்த பாராட்டுக்களையும், மகிழ்ச்சியையும் தெரிவித்துக் கொள்கிறேன். 

அடிப்பட்ட உடனேயே அதிக வலி தெரியாது. இப்போது நமக்கு பட்டிருக்கும் கொரோனா எனும் அடி.. சாதாரண அடி அல்ல. வல்லரசு நாடுகளையே கதிகலங்க வைத்திருக்கும் பிசாசுத்தனமான அசுர அடி. இப்போதைக்கு இது தீராது போல தெரிகிறது. இதனுடைய வலி... வரும் காலங்களில் பல விதங்களில் நமக்கு பல கடுமையான வேதனைகளை தரும். 

உங்களது குடும்பத்தாரின் எல்லாத் தேவைகளையும் பூர்த்தி செய்து, அவர்களை பாதுகாப்பது தான் உங்களின் அடிப்படை கடமை. எந்த சூழலிலும் சமூக இடைவெளியை கடைப்பிடிக்காமலும், முக கவசத்தை அணியாமலும் இருக்காதீர்கள். ஆரோக்கியம் போச்சுன்னா...! வாழ்க்கையே போச்சு...! ” என்று ரஜினிகாந்த் தெரிவித்திருக்கிறார்.