இனவெறிக்கு எதிராக விளையாட்டு வீரர்கள் பலரும் சமூக வலைத்தளங்களில் தமது கண்டனத்தை தெரிவித்து வருகின்றனர். மேலும், இனவெறியாளர்களுக்கு எதிராக பல்வேறு தரப்பினரும் தமது கண்டனங்களை தெரிவிக்க வேண்டும் எனவும் அவர்கள் வலியுறுத்தியுள்ளனர்.

அமெரிக்காவில் கறுப்பு இனத்தை சேர்ந்த ஜோர்ஜ் பிளொய்ட் (வயது 46) என்பவரை கடந்த வாரம் அந்நாட்டு பொலிஸார் சந்தேகத்தின் பேரில் கைது செய்து அழைத்து செல்ல முற்பட்ட போது நடந்த பிரச்சினையில் பொலிஸ் அதிகாரி ஒருவர் முழங்காலால் கழுத்தில் அழுத்தியதில் அந்த கறுப்பு இனத்தவர் சம்பவ இடத்திலேயே துடிதுடித்து இறந்து போனதாக செய்திகள் வெளியாகின. பொலிஸ் அதிகாரியின் காலுக்கு அடியில் சிக்கியபடி ஜோர்ஜ் பிளொய்ட் கதறும் ‘வீடியோ’  சமூக வலைதளங்களில் வெளியானதை தொடர்ந்து அங்கு பெரும் கொந்தளிப்பு ஏற்பட்டுள்ளது. அமெரிக்காவில் பல்வேறு நகரங்களில் மக்கள் தொடர்ந்தும் போராட்டம் நடத்தி வருகிறார்கள்.

நானும் இனவெறி தாக்குதலை சந்தித்துள்ளேன்

கறுப்பு இனத்தை சேர்ந்த ஜோர்ஜ் பிளொய்ட்டின் கொடூர மரணத்துக்கு எதிராக உலகம் முழுவதும் கடுமையான எதிர்ப்பு கிளம்பியுள்ளது.  அதிரடி துடுப்பாட்ட வீரரான கிறிஸ் கெய்லும் இந்த சம்பவத்துக்கு தனது கண்டனத்தை தெரிவித்துள்ளார். அவர் தனது டுவிட்டர் பதிவில், ‘கறுப்பு இன மக்களின் வாழ்க்கையும் மற்றவர்களை போன்றது தான். கறுப்பு இன மக்களை முட்டாள்களாக நினைக்க வேண்டாம். இனவெறி பிடித்தவர்களுக்காக வேலை செய்வதை கறுப்பு இனமக்கள் நிறுத்தி கொள்ள வேண்டும். நான் உலகம் முழுவதும் பயணம் மேற்கொண்டு இருக்கிறேன். நான் சென்ற பல இடங்களில் மறைமுகமாகவும், நேரடியாகவும் கேலி, கிண்டல் என்று இனவெறி தாக்குதலை சந்தித்து இருக்கிறேன். இனவெறி கால்பந்தாட்டத்தில் மட்டுமல்ல கிரிக்கெட்டிலும் இருக்கிறது. கறுப்பு சக்தி வாய்ந்தது. கறுப்பு எனது பெருமை’ என்று தெரிவித்து இருந்தார்.

உலகின் அனைவரும் குரல் எழுப்ப வேண்டும்

டெரன் சமியும் இனவெறிக்கு எதிராக தனது மனக்குமுறலை வெளிப்படுத்தியுள்ளார்.  இது தொடர்பாக அவர் வெளியிட்டுள்ள டுவிட்டர் பதிவுகளில், ‘கறுப்பு இன சகோதரனின் கழுத்தில் இனவெறியுடன் பொலிஸ் அதிகாரி ஒருவர் முழங்காலை வைத்து அழுத்தும் வீடியோவை பார்த்த பிறகும் கிரிக்கெட் உலகம் இந்த அநீதிக்கு எதிராக நிற்கவில்லை என்றால் இனவெறி விடயத்தில் உங்களுக்கும் பங்கு இருக்கிறது என்று தான் கருத வேண்டியிருக்கும். சர்வதேச கிரிக்கெட் சபைக்கும், ஏனைய நாட்டு கிரிக்கெட் சபைகளுக்கும் என்னை போன்றவர்களுக்கு என்ன நடக்கிறது என்பது தெரியவில்லையா?. என்னை போன்றவர்களுக்கு இழைக்கப்படும் சமூக அநீதிக்கு எதிராக நீங்கள் பேசமாட்டீர்களா?. இது அமெரிக்கா சம்பந்தப்பட்ட விவகாரம் மட்டுமல்ல. இந்த பிரச்சினை தினந்தோறும் நடக்கிறது. தற்போது அமைதியாக இருக்கும் தருணம் அல்ல. இனவெறிக்கு எதிராக கிரிக்கெட் உலகினர் அனைவரும் குரல் எழுப்ப வேண்டும்‘ என்று குறிப்பிட்டுள்ளார்.

அமைதியாக இருப்பதும் துரோகம்தான்  

‘போர்முலா 1’ கார் பந்தய சாம்பியனான இங்கிலாந்தின் லூயிஸ் ஹெமில்டனும் இந்த சம்பவத்துக்கு கண்டனம் தெரிவித்துள்ளார். போர்முலா 1 அமைப்பினர் இந்த அநீதிக்கு எதிராக குரல் கொடுக்க வேண்டும் என்றும் அவர் வலியுறுத்தியுள்ளார். 

நட்சத்திர டென்னிஸ் வீராங்கனையான ஜப்பானின் நவோமி ஒசாகாவும், கறுப்பு இனத்தவரின் மரணத்தை கண்டித்து டுவிட்டரில் கருத்து பகிர்ந்துள்ளார். ‘இதுபோன்ற நேரத்தில் அமைதியாக இருப்பதும் துரோகம் தான். உங்களுக்கு நடக்கவில்லை என்பதற்காக இதுபோன்ற சம்பவம் நடக்கவில்லை என்று அர்த்தம் கிடையாது’ என்று அவர் கூறியுள்ளார்.