இந்தியாவில் கொரோனாவை கட்டுப்படுத்துவதற்காக கடந்த மார்ச் 25 ஆம் திகதி முதல் ஊரடங்கு அமல்படுத்தப்பட்டு மே 17 ஆம் திகதி வரை நீட்டிக்கப்பட்டிருந்த நிலையில் இன்று இரவு 8 மணிக்கு பிரதமர் நரேந்திர மோடி உரையாற்றவுள்ளார்.

இந்தியாவில் கொரோனா தொற்றை தடுப்பதற்கான நடவடிக்கைகளில் ஒன்றாக தேசிய ஊரடங்கு கடந்த மார்ச் மாதம் 25 ஆம் திகதி அறிவிக்கப்பட்டது.

இந்த அறிவிப்பை நாட்டு மக்களுக்கு காணொளி மூலம் உரையாற்றி இந்தியபிரதமர் நரேந்திர மோடி அறிவித்தார் .

இதனைத் தொடர்ந்து ஊரடங்கை மேலும் 19 நாட்கள் நீட்டித்து அறிவித்தார். அந்த அறிவிப்புக்கும் மீண்டும் ஒருமுறை காணொளி வழியாக நாட்டு மக்களுக்கு உரையாற்றினார்.

மூன்றாம் கட்ட ஊரடங்கு மே 17 ஆம் திகதி வரை நீட்டித்து அறிவிக்கப்பட்டபோது காணொளி வழியாகப் பிரதமர் தோன்றவில்லை. நேரடியாக மத்திய உள்துறையின் வழிகாட்டு நெறிமுறைகள் வெளியிடப்பட்டன.

இந்நிலையில், மே 17 ஆம் திகதியுடன் ஊரடங்கு நிறைவுக்கு வரவிருக்கும் சூழலில், இன்று மீண்டும் இரவு 8 மணியளவில் நாட்டு மக்களுக்கு மீண்டும் உரையாற்ற உள்ளார்.

ஊரடங்கு நீட்டிக்கப்படுவதற்கான வாய்ப்புகள் ஏதும் வெளிப்டையாகத் தெரியாத நிலையில், தளர்வு விதிகள் குறித்த அறிவுரைகளையும், கொரோனா போர் வீரர்களுக்கு பாராட்டுகளையும் இன்றைய உரையில் தெரிவிப்பார் என்று எதிர்பார்க்கப்படுகிறது.