தவறவிடாதீர்கள்..!உடனே பதிவு செய்யுங்கள்

சர்வதேச கால்பந்தாட்ட சம்மேளனம் (பீபா) வெளியிட்டுள்ள  சர்வதேச கால்பந்தாட்ட அணிகளின் புதிய தரவரிசைகளுக்கு அமைய இலங்கை கால்பந்தாட்ட அணி ஒரு இடம் கீழ் இறங்கி 206 ஆவது இடத்துக்கு தள்ளப்பட்டுள்ளது.

இந்த ஆண்டின் ஆரம்பத்தில் பங்களாதேஷில் நடைபெற்ற கால்பந்தாட்டத்  தொடரின் குழு நிலை சுற்றின் இரண்டு போட்டிகளிலும்  தோல்வியை தழுவியிருந்தது. இதில் பலஸ்தீன அணிக்கெதிரான போட்டியில் 2 க்கு 0 என்ற கோல் கணக்கிலும், பங்களாதேஷ் அணிக்கெதிரான போட்டியில் 3 க்கு 0 என்ற கோல் கணக்கிலும் தோல்வியடைந்திருந்தது.

பீபா தரவரிசையில் மொத்தமாக 210 நாடுகள் அங்கம் வகிக்கின்ற நிலையில், மேற்படித் தொடரில் தோல்வியைத் தழுவிய இலங்கை 206 ஆம் இடத்துக்கு தள்ளப்பட்டுள்ளமை இலங்கையின் கால்பந்தாட்டத் துறை எங்கே செல்கின்றது என்பதை வெளிப்படுத்தி நிற்கிறது.

கடந்த 2018 ஆம் ஆண்டு ஜனவரி மாதம் 200 ஆவது இடத்திலிருந்த இலங்கை அணி,  2019 ஆம் ஆண்டு நவம்பர் மாதம் 205 ஆவது இடத்திலிருந்ததுடன், தற்போது 206 ஆவது இடத்தைப் பிடித்து மோசமான வரலாற்றை பதிவு செய்துள்ளது.