இரண்டாவது டெஸ்ட் போட்டியில் இந்திய அணியை இலகுவாக வீழ்த்திய, நியூசிலாந்து அணி, தொடரையும் 0-2 என்ற கணக்கில் கைப்பற்றியது.

இந்தியா - நியூசிலாந்து அணிகள் இடையிலான 2 ஆவதும் இறுதியுமான டெஸ்ட் கிரிக்கெட் போட்டி கிறைஸ்ட்சர்ச்சில் உள்ள ஹாக்லே ஓவல் மைதானத்தில் ஆரம்பமானது.

இதில் முதலில் துடுப்பெடுத்தாடிய இந்தியா 242 ஓட்டங்களில் அனைத்து விக்கெட்டுக்களையும் இழந்தது. 

பின்னர் தனது முதல் இன்னிங்சை தொடங்கிய நியூசிலாந்து அணி  73.1 ஓவர்களில் 235 ஓட்டங்களுக்கு சுருண்டது. இந்திய தரப்பில் மொஹமட் ஷமி 4 விக்கெட்டுகளையும், பும்ரா 3 விக்கெட்டுக்களையும் கைப்பற்றினர்.

இதனால் 7 ஓட்ட முன்னிலையுடன் 2 ஆவது இன்னிங்சை தொடங்கிய இந்திய அணியின் தொடக்க ஆட்டக்காரர்கள் மயங்க் அகர்வால் 3 ஓட்டங்களிலும், பிரித்வி ஷா 14 ஓட்டங்களிலும் வெளியேறினர்.  

அடுத்தபடியாக அணித் தலைவர் விராட் கோலி 14 ஓட்டங்களில்‍ ஆட்டமிழந்தார். ரகானே 9 ஓட்டங்களுடனும், புஜாரா 24 ஓட்டங்களுடனும் அடுத்தடுத்து ஆட்டமிழந்து பெவிலியன் திரும்பினர். 

அதன் பின்னர் வந்த பின்னணி துடுப்பாட்ட வீரர்களும் சொதப்பலான ஆட்டத்தை வெளிப்படுத்தினர். இதனால், இந்திய அணி 46 ஓவர்களில் 124 ஓட்டங்களுக்கு ஆட்டமிழந்தது. 

இதன் மூலம் நியூசிலாந்து அணிக்கு 132 ஓட்டங்கள் என்ற எளிய வெற்றி இலக்கு நிர்ணயிக்கப்பட்டது.  

இதையடுத்து, துடுப்பெடுத்தாடிய நியூசிலாந்து அணி 36 ஓவர்களில் 3 விக்கெட் இழப்புக்கு 132 ஓட்டங்கள் எடுத்து 7 விக்கெட்டுகள் வித்தியாசத்தில் இந்திய அணியை வென்றது. 

இதன் மூலம் இந்திய அணி டெஸ்ட் தொடரை 0-2 என்ற கணக்கில் நியூசிலாந்திடம் இழந்தது.

ஏற்கனவே நியூசிலாந்துக்கு எதிரான ஒருநாள் கிரிக்கெட் போட்டித் தொடரை 0-3 என்ற கணக்கில் இந்திய அணி இழந்ததிருந்தமையும் குறிப்பிடத்தக்கது.

Photo Credit : ‍ICC