(எம்.ஆர்.எம்.வஸீம்)

கொழும்பு மற்றும் கம்பஹா பிரதேசங்களில் ஏற்பட்டிருக்கும் குடிநீர் பிரச்சினைக்கு ஏப்ரல் இறுதிக்குள் தீர்வு கிடைக்கும் என நீர்வழங்கல் மற்றும் வசதிகள் இராஜாங்க அமைச்சர் வாசுதேவ நாணயக்கார தெரிவித்தார்.

சோசலிச மக்கள் முன்னணி இன்று கொழும்பில் நடத்திய செய்தியாளர் சந்திப்பில் கலந்துகொண்டு கருத்து தெரிவிக்கையிலேயே இவ்வாறு குறிப்பிட்டார்.

கொழும்பு மற்றும் கம்பஹா மாவட்டங்களில் சில பிரதேசங்களில் குடிநீர் பிரச்சினை இருந்து வருகின்றது. தற்போதுள்ள உஷ்ணமான காலநிலையில் அந்த பிரச்சினை மிகவும் தீவிரமாக உணரப்படுகின்றது. அத்துடன் நாட்டில் தற்போது ஏற்பட்டிருக்கும் வரட்சியான காலநிலை காரணமாக நீர் நிலைகளில் நீர்மட்டம் குறைவடைந்து வருகின்றதுடன் நீர் பாவனையும் அதிகரித்திருக்கின்றது. அதனால் நீர் தட்டுப்பாடு ஏற்படுவதை தவிர்க்கமுடியாது.

அத்துடன் நீர் பாவனை அதிகரிக்கும்போது விநியோகிக்கப்படும் நீரின் அழுத்தம் குறைவடைகின்றது. அதனால் மேல் நில பிரதேசங்களுக்கு நீர் அழுத்தம் குறைந்தே செல்கின்றது. இந்த பிரச்சினை பல பிரதேசங்களில் தற்போது ஏற்பட்டிருக்கின்றது. அதனால் நீர் பாவனையாளர்கள் நீர்,வீண்விரயமாகாதவகையில் பயன்படுத்திக் கொள்ளவேண்டும் என்றும் அவர் கூறினார்.