(செ.தேன்மொழி)

புல்மோட்டை பகுதியில் 13 போலி 5000 ரூபா நாணயத்தாள்களுடன் ஒருவர் கைது செய்யப்பட்டுள்ளார்.

புல்மோட்டை - மக்கள் வங்கிக்கிளையில் நேற்று திங்கட்கிழமை பொலிஸாருக்கு கிடைக்கப்பெற்ற தகவலுக்கமைய மேற்கொள்ளப்பட்ட சுற்றிவளைப்பின் போதே, குறித்த சந்தேக நபர் கைது செய்யப்பட்டதாக பொலிஸ் ஊடகப்பிரிவு தெரிவித்தது.

சந்தேக நபர் வங்கியின் பாதுகாப்பு கடமையில் ஈடுப்பட்டிருந்த ஊழியரிடம் 5000 ரூபாய் பெறுமதியான சில நாணயத்தாள்களை கொடுத்து சில்லரையாக மாற்றித் தருமாறு கேட்டுக்கொண்டுள்ளார்.

இதன்போது சந்தேகமடைந்த பாதுகாப்பு ஊழியர் இந்த விடயத்தை வங்கி முகாமையாளரிடம் தெரிவித்ததை அடுத்தே பொலிஸாருக்கு தகவல் வழங்கப்பட்டுள்ளது.

சம்பவத்தில் புல்மோட்டை பகுதியைச் சேர்ந்த 77 வயதுடைய நபரொருவரே கைது செய்யப்பட்டுள்ளார். இவரிடமிருந்து 5000 ரூபாய் நாணயத்தாள்கள் 13 மீட்கப்பட்டுள்ளன.

சந்தேக நபர் தொடர்பான மேலதிக விசாரணைகளை குற்றப் புலனாய்வு பிரிவினர் முன்னெடுத்து வருகின்றனர்.