இலங்கையை மாலைதீவைப் போன்று சுற்றுலாத்தலமாக மாற்றியமைப்போம் - அருந்திக பெர்னாண்டோ

இலங்கையை மாலைதீவுக்கு சளைக்காத சுற்றுலாத் தலமாக ஆக்குவதற்கு எதிர்பார்க்கின்றோம். மாலைதீவுடன் போட்டியிட வேண்டுமாயின் அழகிய தீவுகள் நிறைந்த கற்பிட்டியில் சுற்றுலாத்துறையினை ஊக்குவிக்க வேண்டும்.

மாலைதீவுக்கு சளைக்காத அதிசயங்கள் கற்பிட்டி தீவுகளில் இருக்கின்றன என சுற்றுலாத்துறை ஊக்குவிப்பு அமைச்சரும் புத்தளம் மாவட்ட பாராளுமன்ற உறுப்பினருமான அருந்திக பெர்னாண்டோ தெரிவித்தார். நேற்று முன்தினம் சனிக்கிழமை கற்பிட்டி சுற்றுலாத்துறை ஹோட்டல் உரிமையாளர்கள் மற்றும் முதலீட்டாளர்களுடன் கற்பிட்டியில் இடம்பெற்ற சந்திப்பின் போதே இராஜாங்க அமைச்சர் இவ்வாறு கூறினார்.

அங்கு தொடர்ந்தும் உரையாற்றிய இராஜாங்க அமைச்சர்,

கற்பிட்டி சுற்றுலாத்துறையினை ஊக்குவிப்பதற்காக சுற்றுலா ஊக்குவிப்பு அமைச்சு எதனையும் செய்யவில்லை. தற்போது இணையத்தளங்களில் இருப்பது கற்பிட்டி சுற்றுலாத்துறையில் ஈடுபட்டிருப்பவர்களால் உருவாக்கப்பட்ட வீடியோக்கள் மாத்திரமேயாகும். கற்பிட்டி வரலாற்று ரீதியான பெறுமதியுள்ள ஒரு பிரதேசமாகும். மனித குடியேற்றங்களில் ஆரம்பமான தம்பன்னி பூர்வீக குடியேற்றம் அமைந்திருப்பதும் இதற்கு அண்மையிலாகும். நீரில் காணக் கூடிய மிகப்பெரும் மீனான திமிங்கிலம், மேட்டு நிலத்தில் காணக்கூடிய மிகப் பெரும் மிருகமான யானையையும் சுற்றுலாப்பயணிகளால் ஒரே பயணத்தில் கண்டுகளிக்கக்கூடிய இடம் இப்பிரதேசம் மாத்திரமேயாகும்.

இதற்கு மேலாக டொல்பின் மீன்கள், கோரல்கள், பட்டங்கள் விடும் விளையாட்டு உள்ளிட்ட பல்வேறு விளையாட்டுக்கள், வில்பத்து கங்கேவாடி பிரதேசத்தில் முயல்கள், மான்கள், சிறுத்தைகள் போன்றவற்றையும் இப்பிரதேசங்களில் காண முடியும். சுற்றுலாத்துறை அமைந்துள்ள அனைத்து பிரதேச செயலகங்களிலும் சுற்றுலா அபிவிருத்தி உத்தியோகத்தர் ஒருவரை நியமிக்குமாறு நான் ஜனாதி பதியிடம் கேட்டிருக்கின்றேன் என்றார்.