பாராளுமன்றத் தேர்தலுக்கு சஜித் தலைமையில் பொதுக்கூட்டணி: சபாநாயகரையும் உள்ளீர்க்க முஸ்தீபு

18 Jan, 2020 | 09:59 AM

(ஆர்.யசி)

ஐக்கிய தேசியக் கட்சியின் தலைமை விவகாரத்தில் இழுபறி நிலை தொடர்ந்து வருவதனால் எதிர்வரும் பாராளுமன்றத் தேர்தலை சஜித் பிரேமதாச தலைமையில் புதிய பொதுக் கூட்டணி அமைத்து புதிய சின்னத்தில் சந்திப்பதற்கு தீர்மானிக்கப்பட்டுள்ளது.

சஜித் பிரேமதாச தலைமையில் பரந்துபட்ட கூட்டணி அமைத்து அந்தக் கூட்டணியில் ஐக்கிய தேசியக் கட்சி உட்பட ஐக்கிய தேசிய முன்னணியின் அனைத்துக் கட்சிகளையும் உள்ளடக்கி புதிய கட்சிகளையும் உள்ளீர்த்து தேர்தலில் களமிறங்குவதற்கு நேற்று நடைபெற்ற உயர்மட்டக் கூட்டத்தில் தீர்மானிக்கப்பட்டுள்ளது.

பாராளுமன்ற கட்டடத் தொகுதியில் நேற்று பிற்பகல் சஜித் பிரேமதாச தலைமையில் நடைபெற்ற இந்தக் கூட்டத்தில் ஐக்கிய தேசியக் கட்சியின் சார்பில் பாராளமன்ற உறுப்பினர்களான கபீர் காசிம், ரஞ்சித் மத்துமபண்டார,சரத்பொன்சேகா, அஜித்பி பெரேரா, ரவீந்திர சமரவீர ஆகியோரும் கூட்டுக் கட்சிகளின் சார்பாக பாராளுமதன்ற உறுப்பினர்களான மனோ கணேசன், ரவூப் ஹக்கீம், சம்பிக ரணவக்க, ராஜித சேனரத்ன ஆகியோர் கலந்துகொண்டனர்.

இந்தக் கூட்டத்திலேயே பரந்துபட்ட பொதுக் கூட்டணி அமைத்து பாராளுமன்றத் தேர்தலில் களமிறங்குவது தொடர்பில் தீர்மானிக்கப் பட்டுள்ளது.

ஐக்கிய தேசியக் கட்சியின் தலைமைத்துவம் தொடர்பாக அக்கட்சியின் தலைவர் ரணில் விக்கிரமசிங்க தலைமையில் கட்சியின் தலைமையகத்தில் நேற்று முன்தினம் அக்கட்சியின் பாராளுமன்றக் குழுக்கூட்டம் இடம்பெற்றிருந்தது. இந்தக் கூட்டத்தில் கட்சியின் தலைமைத்துவத்தை விட்டுக்கொடுப்பதற்கு ரணில் விக்கிமசிங்க இணக்கம் தெரிவிக்கவில்லை.

அத்துடன் பிரதமர் வேட்பாளராக சஜித் பிரேமதாசவை களமிறக்குவதற்கும் அவர் இணங்கவில்லை. வாக்கெடுப்பின் மூலம் தலைமையை தெரி்வுசெய்யுமாறு சஜித் பிரேமதாச அணியினர் கோரியபோதிலும் அதற்கும் இணங்கவில்லை. இந்த நிலையில் முடிவெதுவும் எடுக்கப்படாது பாராளுமன்றக் குழுக்கூட்டம் முடிவுக்கு வந்திருந்தது.

இதனையடுத்தே ஐக்கிய தேசியக் கட்சியின் தலைமை விவகாரத்துக்கு தீர்வு காணப்படாமையினால் அடுத்தகட்டமாக என்ன நடவடிக்கை எடுப்பது என்பது தொடர்பில் சஜித் அணியினரும் ஐக்கிய தேசிய முன்னணியில் அங்கம் வகிக்கும் கூட்டுக் கட்சித் தலைவர்களும் நேற்று பிற்பகல் பாராளுமன்ற கட்டடத் தொகுதியில் சந்தித்து பேச்சுவார்த்தை நடத்தினர். இந்த பேச்சுவார்த்தையின்போதே சஜித் பிரேமதாச தலைமையில் பொதுக்கூட்டணி அமைத்து புதிய சின்னத்தில் களமிறங்குவதற்கான தீர்மானம் எடுக்கப்பட்டது.

இந்தப் பொதுக்கூட்டணியில் சபாநாயகர் கரு ஜயசூரியவையும் உள்வாங்குவதற்கான நடவடிக்கைகளை எடுப்பதற்கும் முடிவு செய்யப்பட்டுள்ளது. நேற்று நடைபெற்ற கூட்டத்தையடுத்து சபாநாயகர் கரு ஜயசூரியவை தமிழ் முற்போக்குக் கூட்டணியின் தலைவரும் பாராளுமன்ற உறுப்பினருமான மனோ கணேசன் சந்தித்து பேச்சுவார்த்தை நடத்தியுள்ளார்.

இன்றைய தினம் சஜித் பிரேமதாசவுக்கும் சபாநாயர் கரு ஜயசூரியவுக்குமிடையில் சந்திப்பு இடம்பெறவுள்ளது. இந்தச் சந்திப்பில் இணக்கம் காணப்படுமனால் புதிய பொதுக் கூட்டணியில் சபாநாயரையும் உளளீர்க்க நடவடிக்கை எடுக்கப்படவுள்ளது.

இதேவேளை ஐக்கிய தேசியக் கட்சியின் தலைமைத்துவத்தை கரு ஜயசூரியவுக்கு வழங்குவதற்கு அக்கட்சியின் தலைவர் ரணில் விக்கிரமசிங்க இணங்குவாரானால் அதற்கு இணக்கம் தெரிவிப்பதற்கும் சஜித் அணியினர் திட்டமிட்டுள்ளனர்.

பொதுக் கூட்டணியின் தலைவராக சஜித் பிரேமதாசவை நியமிப்பது என்றும் ஐக்கிய தேசியக் கட்சியின் தலைவராக கரு ஜயசூரியவை நியமிக்க ரணில் விக்கிரமசிங்க இணங்கினால் அதனை ஏற்றுக்கொண்டு கூட்டணிக்குள் ஐக்கிய தேசியக் கட்சியை முழுமையாக இணைப்பது என்றும் தீர்மானிக்கப்பட்டுள்ளது.

பாராளுமன்றக் கட்டடத்தொகுதியில் இடம்பெற்ற சந்திப்பு தொடர்பில் கருத்து தெரிவித்த பாராளுமன்ற உறப்பினர் மனோ கணேசன்,

சஜித் பிரேமதாச தலைமையில் பரந்துபட்ட கூட்டணி அமைக்கப்படும்.இந்தக் கூட்டணியில் ஐ.தே.க. உட்பட ஐ.தே.மு.வின் அனைத்துக் கட்சிகளும்இடம்பெறும். புதிய கட்சிகளும் கூட்டணியில் உள்வாங்கப்படும்.

ஐக்கிய தேசியக் கட்சியின் தலைவர் ரணில் விக்கிரமசிங்க தனது பிடிவாதத்தை திருத்திக்கொண்டு புதிய மாற்றங்களுக்கு இடம்கொடுக்க வேண்டும். ஆனால் அவரது மனமாற்றத்துக்காக நாம் காத்திருக்கப் போவதில்லை. தற்சமயம் ஐ.தே.க.வின் 55 எம்.பி.க்களும் ஐ.தே.மு.வின் 20 எம்.பி.க்களும் எமது அணியிலேயே உள்ளனர். சபாநாயகர் கரு ஜயசூரியவை உள்வாங்கும் நடவடிக்கையையும் நாம் ஆரம்பித்துள்ளோம். அந்த முயற்சியும் வெற்றியளிக்கும் என்று தெரிவித்தார்.