பி.பி.சி. செய்திச் சேவை வழங்கிய 2019 ஆம் ஆண்டுக்கான ஆளுமை மிக்க விளையாட்டு வீரர் என்ற விருதை இங்கிலாந்து கிரிக்கெட் அணியின் சகலதுறை ஆட்ட நாயகன் பென் ஸ்டோக்ஸ் பெற்றுள்ளார்.

2019 ஆம் ஆண்டுக்கான ஒருநாள் உலகக் கிண்ணம் மற்றும் ஆஷஸ் தொடர் போன்றவற்றில் சிறந்த ஆற்றலை வெளிப்படுத்தியமைக்காவே அவருக்கு இந்த விருது வழங்கப்பட்டுள்ளது.

அதன்படி பென் ஸ்டோக்ஸ் நடைபெற்று முடிந்த உலகக் கிண்ணத் தொடரில் 5 அரை சதங்கள் உள்ளடங்கலாக மொத்தம் 465 ஓட்டங்களை குவித்தார். அவரது சராசரியும் 66.42 ஆக அமைந்தது.

அத்துடன் உலகக் கிண்ணத் தொடரின் இறுதிப் போட்டியிலும் அவர் ஆட்டமிழக்காது, 84 ஓட்டங்களை குவித்து ஆட்ட நாயகன் விருதினையும் பெற்றார்.

ஆஷஸ் தொடரில் 2 சதம், 2 அரைசதம் உள்ளடங்கலாக மொத்தமாக 441 ஓட்டங்களை குவித்திருந்தார். அவரது சராசரியும் 55.12 ஆக அமைந்தது.

கடந்த 2005 ஆம் ஆண்டு இந்த விருதினை இங்கிலாந்து கிரிக்கெட் அணியின் முன்னாள் வீரர் அண்ட்ரூ பிளின்டொப் பெற்றதற்கு பின்னர் இந்த விருதை கிரிக்கெட் வீரரான பென் ஸ்டோக்ஸ் பெற்றுள்ளார்.

கிரிக்கெட் உலகை பொருத்த வரை இந்த விருதினை இங்கிலாந்து அணியின் ஜிம் லெக்கர் (1956), டேவிட் ஸ்டீல் (1975), இயன் போத்தம் (1981) அண்ட்ரூ பிளின்டொப் (2005) ஆகியோர் பெற்றிருந்தனர்.

அத்துடன் கிரிக்கெட் உலகக் கிண்ணத்தை வெற்றி கொண்ட இங்கிலாந்து கிரிக்கெட் அணி ஆண்டின் சிறந்த அணியாக பி.பி.சி.யினால் தெரிவுசெய்யப்பட்டுள்ளமையும் குறிப்பிடத்தக்கது.