(செ.தேன்மொழி)

பேருவளைப் பகுதியில் கூரிய ஆயுதத்தால் தாக்கியதில் ஒருவர் உயிரிழந்துள்ளார். இந்த சம்பவம் ஞாயிற்றுக்கிழமை இடம்பெற்றுள்ளதாக பொலிசார் தெரிவித்தனர். 

பேருவளை – அளுத்ஹேன , மாகல்கந்த பகுதியில் நேற்று ஞாயிற்றுக்கிழமை  உயிரிழந்த நபருக்கும் சந்தேக நபருக்கும் இடையில் ஏற்பட்ட முரண்பாட்டின் காரணமாக, சந்தேக நபர் உயிரிழந்த நபரை  கூரிய ஆயுதத்தால் தாக்கியுள்ளார். 

இதன்போது படுகாயமடைந்த நபர் நாகொட வைத்தியசாலையில் அனுமதிக்கப்பட்டதின் பின்னர் உயிரிழந்துள்ளதாக பொலிஸாரின் ஆரம்பகட்ட விசாரணைகளின் போது தெரியவந்துள்ளது.

சம்பவத்தில் மாகல்கந்த - மங்கொன பகுதியைச் சேர்ந்த 37 வயதுடைய கரன்னாகொடகே ஜனக ஜீவந்த என்பவர் உயிரிழந்துள்ளார்.

சந்தேக நபர் தப்பிச் சென்றுள்ள நிலையில் இவரை கைது செய்வதற்கான நடவடிக்கைகளை பேருவளை பொலிஸார் மேற்கொண்டு வருகின்றனர்.