இலங்கைக்கு வழங்கப்பட்ட ஆடுகளங்களில் திருப்தியில்லைதான்

இலங்கைக்கு வழங்கப்பட்ட ஆடுகளங்கள் தொடர்பில் திருப்தியடைய முடியாதுதான் என்று இலங்கை அணியின் முன்னாள் தலைவரும் உலகக் கிண்ணச் சம்பியன் தலைவருமான அர்ஜுன ரணதுங்க தெரிவித்துள்ளார்.

அதேவேளை இலங்கை அணிக்கு மத்திய வரிசை துடுப்பாட்ட வீரர்கள் திறம்பட செயற்பட்டல்தான் வெற்றிபெற முடியும் என்றும் குறிப்பிட்டுள்ளார்.

இங்கிலாந்தில் நடைபெற்று வரும் உலகக் கிண்ண கிரிக் கெட் போட்டித் தொடரில் இலங்கைக்கு இதுவரையில் வழங்கப்பட்டுள்ள ஆடுகளங்கள் தொடர்பில் விமர்சனங்களை முன்வைத்தது இலங்கை அணி.

இந்நிலையில் இதற்கு அர்ஜுன ரணதுங்கவும் ஆதரவு வழங்கியுள்ளார்.

இது குறித்து அவர் கூறுகையில், இந்த விவகாரம் தொடர்பில் தற்போதைய கிரிக்கெட் நிறுவனம் எவ்வித எதிர்ப்பையும் வெளியிடாது அமைதி காத்து வருகிறது.

கிரிக்கெட் போட்டிகளில் வெற்றியீட்டுவது, தோல்வியடைவது வழமையானது.

எனினும், இலங்கை கிரிக்கெட் அணி பல்வேறு பிரச்சினைகளை எதிர்நோக்கி வருகிறது.

அணியின் முகாமையாளர் அசந்த டி மெல் கூறுவது போன்று இலங்கைக்கு ஆடுகளங்களை வழங்குவதில் அநீதி இழைக்கப்பட்டுள்ளதா என்ற சந்தேகம் எழுகிறது.

இந்த விடயம் தொடர்பில் நீதியான விசாரணை நடத்துமாறு ஐ.சி.சி.யிடம் எழுத்து மூலம் கோரிக்கை விடுக்கப்பட வேண்டும்.

விளையாட்டுத் துறை அமைச்சரேனும் இது குறித்து முறைப்பாடு செய்ய வேண்டுமெனத் தெரிவித்துள்ளார்.

இதேவேளை, உலகக் கிண்ணப் போட்டி போன்ற முக்கியமான போட்டிகளில் ஆடுகளங்களில் ஒரு சீரான தன்மை காணப்பட வேண்டுமென இலங்கை அணியின் முன்னாள் தலைவர் குமார் சங்கக்காரவும் தெரிவித்துள்ளார்.

நாடுகளுக்கு நாடு மைதானத்துக்கு மைதானம் ஆடுகளத்தின் தன்மை பாரிய மாற்றங்களுடன் காணப்படுகிறது. இதனால் அணிகள் நெருக்கடிகளை எதிர்நோக்க நேரிடும் எனக் குறிப்பிட்டுள்ளார்.

இலங்கை ஒரு புறம் தங்களது மோசமான துடுப்பாட்டத்தால் தோல்வி கண்டு வந்தாலும் மைதானத்தின் குளறுபடிகளும் இருக்கத்தான் செய்கின்றன.