தவறவிடாதீர்கள்..!உடனே பதிவு செய்யுங்கள்

 குஜராத் மற்றும் டெல்லி அணிகளுக்கிடையில் நேற்று நடைபெற்ற ஐ.பி.எல். லீக் போட்டியில் டெல்லி அணி வெற்றிபெறுவதற்கு இறுதி ஓவரில் 14 ஓட்டங்கள் தேவைப்பட்ட நிலையில் 13 ஓட்டங்களைப் பெற்று ஒரு ஓட்டத்தால் தோல்வியைத் தழுவிக்கொண்டது.

இதனால் குஜராத் அணி தனது 5ஆவது வெற்றியை பதிவுசெய்து புள்ளிகள் பட்டியலில் முதலிடத்திற்கு முன்னேறியது.

இந்தப்போட்டியில் முதலில் துடுப்பெடுத்தாடிய குஜராத் அணியின் மெக்கல்லமும், ஸ்மித்தும் தொடக்க ஆட்டக்காரர்களாக களமிறங்கினார்கள்.

இருவரும் அதிரடியாக ஆடியதால் அந்த அணியின் ஓட்ட வேகம் உயர்ந்தது.

இந்த ஜோடி 54 பந்துகளில் 100 ஓட்டங்களைக் குவித்தது. இந்த ஆபத்தான ஜோடியை இம்ரான் தாஹிர் பிரித்தார். ஸ்மித் 53 ஓட்டங்களுடன் ஆட்டமிழந்தார். 12ஆவது ஓவரில் மொரிஸ் பந்தில் மெக்கல்லம் 60 ஓட்டங்களுடன் ஆட்டமிழந்தார்.

இதன் பிறகு களமிறங்கிய ரெய்னா(2), கார்த்திக்(19) ஜடேஜா(4), இஷாத் கிஷான்(4) ஆகியோர் சொற்ப ஓட்டங்களுடன் ஆட்டமிழந்ததால் குஜராத் அணியின் ஓட்ட வேகம் குறைந்தது. இறுதியில் அந்த அணி 6 விக்கெட்டுகளை இழந்து 172 ஓட்டங்களை எடுத்தது.

இதையடுத்து 173 ஓட்டங்கள் எடுத்தால் வெற்றி என்ற இலக்குடன் களமிறங்கிய டெல்லி அணி 16 ஓட்டங்களை எடுப்பதற்குள் 3 விக்கெட்டுகளை இழந்து தடுமாறியது.

அதன்பிறகு மொரிஸ் மற்றும் டுமினி ஆகியோர் ஜோடி சேர்ந்து டெல்லி அணியை மீட்டெடுத்தனர். இதில் டுமினி 48 ஓட்டங்களுடன் ஆட்டமிழந்தார். அதிரடியாக ஆடி வந்த மொரிஸ் அணியின் வெற்றிக்கு பெரிதும் போராடினார். இறுதியில் கடைசி ஓவரில் 14 ஓட்டங்கள் தேவைப்பட்டது.

ஆனாலும் 13 ஓட்டங்களையே டெல்லியால் பெற முடிந்தது. இதனால் 1 ஓட்டத்தினால் தோல்வியைத் தழுவிக்கொண்டது டெல்லி.

இறுதிவரை டெல்லி அணியின் வெற்றிக்குப் போராடிய மொரிஸ் ஆட்டமிழக்காமல் 80 ஓட்டங்களைப் பெற்றுக்கொண்டார்.

குஜராத் அணியின் பந்துவீச்சாளரான குல்கர்னி 4 ஓவர்கள் பந்துவீசி 19 ஓட்டங்களை விட்டுக்கொடுத்து 3 விக்கெட்டுக்களை வீழ்த்தினார்.