இதயத்தின் செயற்பாட்டினை நிவர்த்திக்கும் ஊட்டச்சத்து ‘டி’

Published By: Robert

17 Apr, 2016 | 09:54 AM
image

ஒரு தாய் கருவுற்று, அண்ணளவாக 3 தொடக்கம் 4 வாரங்களுக்குள் குழந்தையின் இதயம் உருவாகித் தனது பணியை ஆரம்பிக்கின்றது. அவ்வாறு ஆரம்பித்த இதயத்தின் செயற்பாடு, அக்குழந்தையின் வாழ்நாள் முழுவதும் தொடர்ந்து, இறுதியாக மரணத்தின்போதே ஓய்வு பெறுகின்றது.

தற்போதைய சடுதியான மரணங்களை அவதானித்தால், அநேகமானவை இதயநோய்களால் ஏற்படுபவையாகக் காணப்படுகின்றன. நாவிற்கான சுவையைக் கருத்திற்கொண்ட, உடல் ஆரோக்கியத்திற்கு ஒவ்வாத உணவுப் பழக்க வழக்கங்களால் இதயம் அதிக அழுத்தத்திற்கு உள்ளாகி, இதயச் செயலிழப்பின் காரணமான மரணங்களின் எண்ணிக்கைகள் அதிகரித்துச் செல்கின்றன. இவ்வாறான இதய செயற்பாட்டின் ஒழுங்கற்ற தன்மைகளை ஊட்டச்சத்து ‘டி’  (Vitamin D) மாற்றியமைக்கும் என ஆய்வாளர்கள் கண்டறிந்துள்ளனர்.

இதயம் தொடர்பான ஆய்வுகள் பலவற்றினை மேற்கொண்டிருந்த பிரித்தானிய ‘லீட்ஸ்’ பல்கலைக்கழக ஆய்வாளர்கள், இதயத்தொழிற்பாட்டில் ஊட்டச்சத்து ‘டி’ செலுத்தும் செல்வாக்குத் தொடர்பில் நேரடிப் பரீட்சிப்புக்களை மேற்கொண்டிருந்தனர். கடந்த ஏப்பிறல் 4 ஆந் திகதி, அமெரிக்காவின் சிகாக்கோ நகரில் அமைந்துள்ள அமெரிக்க இதயசார் கற்பித்தல் கல்லூரியின் வருடாந்த மாநாட்டில் இக்குறிப்பிட்ட ஆய்வின் பெறுபேறுகள் பிரேரிக்கப்பட்டுள்ளன.

உடலின் பலபகுதிகளுக்குமான விநியோகத்தொகுதியாக உடலின் குருதிச் சுற்றோட்டத்தொகுதி காணப்படுகின்றது. இக்குருதியைப் உடல் முழுவதும் பாய்ச்சுவதற்கான செயற்படுகருவியாக இதயம் காணப்படுகின்றது. இதயத்தின் இடது இதய அறை குருதியால் நிரம்பியதும், அந்த அறை சுருங்கி, குருதியை பெருநாடி வழியாக உடற்பாகங்களுக்குச் செலுத்துகின்றது.

இடது இதய அறை சுருங்கியுள்ள நிலையில் வெளியேற்றப்பட்ட குருதிக் கனவளவிற்கும், விரிந்த நிலையில் அந்த அறையில் நிரம்பியிருந்த குருதிக்கனவளவிற்கும் இடையிலான விகித சதவீதம் இதயத்தின் குருதி வெளியேற்றல் பின்னம் ((ejection fraction)) எனக் கூறப்படுகின்றது. சுகதேகியான மனிதர்களில் இப்பின்னம் 60 தொடக்கம் 70 சதவீதமாகக் காணப்படுகின்றது. இக்குறிப்பிட்ட விகித சதவீதம் சராசரியாக 26 ஆகக் அமைந்த 160 நபர்கள் தெரிந்தெடுக்கப்பட்டு ஆய்வுகள் மேற்கொள்ளப்பட்டன.

தேர்ந்தெடுக்கப்பட்ட நபர்கள் இரு குழுவாக வகுக்கப்பட்டு அவர்கள் மீதான ஆய்வு நடவடிக்கைகள் முன்னெடுக்கப்பட்டன. இவர்களில் ஒரு குழுவினருக்கு 100 மைக்ரோகிராம் ஊட்டச்சத்து ‘டி’ குளிகைகள் ஒவ்வொரு நாளும் வழங்கப்பட்டது. இதேவேளை மற்றைய குழுவினருக்கு மருந்தற்ற குளிகைகள் வழங்கப்பட்டு அவர்களது இதயத்தின் செயற்படு தன்மைகள் அவதானிக்கப்பட்டன. இந்நடவடிக்கைகள் ஒரு வருடத்திற்குத் தொடர்ச்சியாக மேற்கொள்ளப்பட்டு, இரு குழுவிலும் உள்ளடங்கிய நபர்களின் இதயம் தொடர்பான அவதானிப்புக்கள் பதிவு செய்யப்பட்டன.

இந்த அவதானிப்புக்களின் படி, ஊட்டச்சத்து ‘டி’ குளிகைகள் வழங்கப்பட்ட குழுவினரின் இதய வெளியேற்றல் பின்ன சதவீதமானது 26 இலிருந்து 34 வரை முன்னேற்றமடைந்தமையை ஆய்வாளர்கள் அவதானித்துள்ளனர். மற்றைய குழுவினரிலான இப்பின்னம் எதுவித முன்னேற்றமும் இன்றி காணப்பட்டுள்ளது.

இந்தக் கட்டுப்பாட்டுப் பரிசோதனையுடன் கூடிய நேரடி ஆய்விலிருந்து, ஊட்டச்சத்து ‘டி’ ஆனது இதயத்தின் ஒழுங்கற்ற தன்மைகளை மாற்றியமைப்பதில் செல்வாக்குச் செலுத்தும் என்பதைக் கண்டறிந்து தெரிவித்துள்ளனர்.

ஊட்டச்சத்து ‘டி’ அல்லாவிடின், ஆங்கிலத்தில் விற்றமின் ‘டி’ என்ற சொல்லினைக் கேட்டதும் சூரியஒளி நினைவு வருவதைத் தவிர்க்க முடியாது. சூரியனிலிருந்து வரும் குறிப்பிட்ட அலைவீச்சிலான கதிர்கள் தோலில் படுகையில், ஊட்டச்சத்து ‘டி’ உருவாகும் எனச் சிறுவயதில் படித்திருப்பீர்கள். இந்த வழிமுறையில் மட்டுமல்லாது, பாற்கட்டி, முட்டை, சில வகைத் தானியங்கள் என்பவற்றினை உணவாக நுகர்கையிலும் இந்த ஊட்டச்சத்து கிடைக்கப்பெறுகின்றது.

எனவே, இதய நோயாளிகள் வெளியிடங்களில் நடமாடுவது, அவர்களின் உடலில் சூரிய ஒளி படுவதற்கு வழியேற்படுத்தி, உடலில் ஊட்டச்சத்து ‘டி’ உருவாகுவதற்கு வழிவகுக்கும். ஆனால் அந்நபர்களின் முதுமையும், இதயநோயின் அபாய சாத்தியமும் வெளிப்புறத்திலான நடமாட்டத்திற்கு அனுமதிக்காவிட்டால், இந்த ஊட்டச்சத்துக் கொண்ட உணவுகளை உட்கொள்வது சிறந்தது. அல்லாவிடின், ஊட்டச்சத்து ‘டி’ கொண்ட மருந்துகளை உரிய பரிந்துரையளவில் உள்ளெடுத்தேனும் இதயம் சிறந்த முறையில் தொழிற்பட வழிவகுக்கலாம் என்கின்றனர் இந்த ஆய்வாளர்கள்.

அ.ஹரின் சுலக்ஸ்ஸி,

யாழ். நகர்.

முக்கிய செய்திகள்

icon-left
icon-right

தொடர்பான செய்திகள்

news-image

ஹண்டிங்டன்ஸ் நோய் பாதிப்பிற்குரிய நவீன சிகிச்சை

2024-03-26 16:32:47
news-image

இடியோபதிக் பல்மனோரி ஃபைப்ரோசிஸ் எனும் நுரையீரல்...

2024-03-24 21:02:07
news-image

அர்த்ரால்ஜியா எனும் மூட்டு வலி பாதிப்பிற்குரிய...

2024-03-20 21:20:55
news-image

செபோர்ஹெக் கெரடோசிஸ் எனும் தோல் பாதிப்பிற்குரிய...

2024-03-20 09:17:28
news-image

குரல்வளை வீக்கம் : நவீன சிகிச்சை

2024-03-18 18:23:28
news-image

ஆர்டியோஸ்கிளிரோஸிஸ் ரெட்டினோபதி எனும் விழித்திரை பாதிப்பிற்குரிய...

2024-03-16 14:38:19
news-image

உள்காது பாதிப்புகளை கண்டறிவதற்கான நவீன பரிசோதனைகள்

2024-03-15 18:16:00
news-image

பெருங்குடல் வீக்கமும் நவீன சிகிச்சையும் 

2024-03-14 16:20:48
news-image

சிறுநீரக ஆரோக்கியம், அதன் பாதுகாப்பை உறுதிப்படுத்துவோம்!...

2024-03-14 15:59:51
news-image

ஆசனவாய் புற்றுநோய் பாதிப்பிற்கு நிவாரணமளிக்கும் சத்திர...

2024-03-13 22:50:05
news-image

மயோகார்டிடிஸ் எனும் இதய தசையில் ஏற்படும்...

2024-03-08 17:40:06
news-image

நான் ஆல்கஹாலிக் ஃபேட்டி லிவர் எனும்...

2024-03-07 13:48:04