நியூசிலாந்தின் கிரைஸ்ட்சர்ச் பகுதியில் மசூதியில் துப்பாக்கிச் சூடு நடத்திய நபரை எதிர்வரும் ஏப்ரல் மாதம் 05 ஆம் திகதி வரை விளக்கமறியலில் வைக்க அந் நாட்டு நீதிமன்றம் உத்தரவிட்டது. 

நியூசிலாந்தின் கிழக்கு கடலோர நகரமான கிரைஸ்ட்சர்ச்சிலுள்ள மசூதிகளில் நேற்று துப்பாக்கி ஏந்திய நபர் நடத்திய தாக்குதலில் 49 பேர் உயிரிழந்தனர். 

இந்த  சம்பவம் தொடர்பாக கொலை குற்றம் சாட்டப்பட்டுள்ள பிரென்டன் டர்ரன்ட் என்னும் 28 வயதான அவுஸ்திரேலிய பிரஜை இன்று நீதிமன்றத்தில் ஆஜர்படுத்தப்பட்டார். 

இதன்போது அவர் வெள்ளை நிற சட்டை அணிந்து இருந்த அவர், கைவிலங்கு அணிவித்தபடி நீதிமன்றத்தில் ஆஜர்படுத்தப்பட்டபோது, பிரென்டனை விளக்கமறியலில் வைப்பதற்கு உத்தரவிட்ட நீதிபதிகள், வழக்கு விசாரணையை ஏப்ரல் 5 ஆம் திகதி வரை ஒத்திவைத்தனர். 

இது குறித்து பேசிய நியூசிலாந்து பிரதமர் ஜெசிந்தா ஆர்டர்ன், 

துப்பாக்கி உரிமத்தை முன்னரே பெற்றிருந்த பிரென்டன் கைதுசெய்யப்பட்டபோது ஐந்து துப்பாக்கிகளை வைத்திருந்ததாகவும், நியூசிலாந்தின் துப்பாக்கி பயன்பாட்டு விதிமுறைகளில் மாற்றம் செய்ய இருப்பதாகவும்  தெரிவித்தார். 

இவரை தவிர்த்து இன்னும் இரண்டு பேர் பொலிஸாரினால் கைதுசெய்யப்பட்டிருப்பதாகவும், அவர்கள் இதற்கு முன்னர் குற்றம் புரிந்ததற்காக பதிவு ஏதும் இல்லை என்றும் தெரிவிக்கப்பட்டுள்ளது.