மன்னார் தோட்டவெளி பகுதியில் இன்று அதிகாலை இடம்பெற்ற விபத்தொன்றில் ஒருவர் சம்பவ இடத்திலேயே உயிரிழந்ததுடன் மேலும் ஒருவர் படுகாயமடைந்து மன்னார் பொது வைத்தியசாலையில் அனுமதிக்கப்பட்டுள்ளார்.

குறித்த சம்பவம் ஏ 14 தலைமன்னார் பிரதான வீதியில் தோட்டவெளி பகுதியில் இன்று அதிகாலை 5:45 மணியளவில் இடம்பெற்றுள்ளது.

விபத்துக்குள்ளான மீன்களை ஏற்றி செல்லும் கூளர் வாகனத்தில் 3 பேர் பயணித்துள்ளனர். இவர்களில் அனுராதபுரத்தை சேர்ந்த சந்தன தீபால் 46 என்ற குடும்பஸ்தரே சம்பவ இடத்தில் உயிரிழந்துள்ளார்.

மேலும், அஜித் நிசங்க (34) என்பவர் காயங்களுக்குள்ளாகிய நிலையில் மன்னார் பொது வைத்தியசாலையில் அனுமதிக்கப்பட்டுள்ளார்.

சம்பவம் தொடர்பாக தெரியவருவது,

மீன்களை ஏற்றி செல்லும் கூளர் ஒன்று அனுராதபுரத்திலிருந்து மீன்களை ஏற்ற தலைமன்னார் நோக்கி செல்லும்வேளையில் சாரதி வாகனத்தை மிகவேகமாக ஓட்டி சென்றுள்ளார்.

வாகனம் தோட்டவெளி பகுதியில் வந்தபோது வேக கட்டுப்பாட்டை இழந்ததினால் வீதியை விட்டு விலகி வீதியின் ஓரத்தில் உள்ள பனை மரத்துடன் மோதி விபத்து ஏற்பட்டுள்ளது. 

எவ்வாறிருப்பினும் வாகனத்தின் சாரதி காயங்களின்றி மயிரிழையில் உயிர் தப்பியுள்ளமை குறிப்பிடத்தக்கது.

விபத்து தொடர்பாக மேலதிக விசாரணைகளை மன்னார் பொலிஸார் மேற்கொண்டு வருகின்றனர்.

(தலைமன்னார் நிருபர்)