ஜெனிவா சமர் இன்று ஆரம்பம் : கடும் அழுத்தங்களை பிரயோகிக்கவுள்ள அல் ஹுசைன்

26 Feb, 2018 | 09:23 AM

ஐக்கிய நாடுகள் மனித உரிமை பேரவையின் 37 ஆவது கூட்டத்தொடர் இன்று திங்கட்கிழமை ஜெனிவாவில் ஆரம்பமாகவுள்ள நிலையில் இலங்கை விவகாரம் தொடர்பில் ஐ.நா.மனித உரிமை ஆணையாளர் செய்ட் அல் ஹுசென் கடும் அழுத்தங்களை பிரயோகிப்பார் என்று தெரிவிக்கப்படுகின்றது.

மனித உரிமை பேரவையின் தலைவர் தலைமையில் நடைபெறும் இந்த 37 ஆவது கூட்டத் தொடரில் நிலையில் இலங்கை மனித உரிமை நிலைவரம் உள்ளிட்ட பல்வேறு நாடுகளின் மனித உரிமை விவகாரங்கள் குறித்து ஆராயப்படவுள்ளதுடன் பிரேரணைகளும் முன்வைக்கப்படவுள்ளன.

இதேவேளை 37 ஆவது கூட்டத் தொடர் இலங்கைக்கு மிக முக்கியத்துவமிக்கதாக காணப்படுகின்றது. கடந்த 2015 ஆம் ஆண்டு நிறைவேற்றப்பட்டு மீண்டும் 2017 ஆம் ஆண்டு இரண்டு வருட கால நீடிப்புக்கு உட்பட்ட இலங்கை குறித்த பிரேரணை எவ்வாறு இலங்கை அரசாங்கத்தினால் அமுல்படுத்தப்படுகின்றது என்பது குறித்து இந்தக் கூட்டத் தொடரில் ஆராயப்படவுள்ளது.

விசேடமாக எதிர்வரும் மார்ச் மாதம் 16 ஆம் திகதி இலங்கை குறித்த புகோள காலக்கிரம மீளாய்வு விவாதம் நடைபெறவுள்ள நிலையில் எதிர்வரும் 21 ஆம் திகதி இலங்கை குறித்த பிரதான விவாதம் இடம்பெறவுள்ளது.

இதேவேளை இலங்கை ஜெனிவா பிரேரணையை எவ்வாறு அமுல்படுத்துகின்றது என்பது குறித்த மனித உரிமை ஆணையாளரின் அறிக்கை வெ ளியாகியுள்ளது. இதில் பல்வேறு விடயங்களை அவர் வலியுறுத்தியுள்ளார். குறிப்பாக இலங்கை விவகாரத்தில் சர்வதேச நியாயாதிக்கத்தை பயன்படுத்த முடியுமா என்பது குறித்து ஆராயுமாறு ஐக்கிய நாடுகள் மனித உரிமை பேரவையின் உறுப்பு நாடுகளிடம் செய்ட் அல் ஹுசென் அந்த அறிக்கையில் கூறியுள்ளார்.

இன்று நடைபெறவுள்ள முதலாவது அமர்வில் ஐ.நா. மனித உரிமை ஆணையாளர் செயிட் அல் ுஹசைன் ஐக்கிய நாடுகள் செயலாளர் நாயகம் அன்டோனியோ கட்ரஸ் உள்ளிட்ட தரப்பினர் உரையாற்றவுள்ளனர்.

முதலாவது அமர்வில் உரையாற்றவுள்ள ஐ.நா. மனித உரிமை ஆணையாளர் செயிட் அல் ுஹசைன் இலங்கை தொடர்பான தனது நிலைப்பாட்டை அறிவிக்கவுள்ளார். இதன்போது தனது அறிக்கையில் உள்ள விடயங்களை குறிப்பிட்டுக் கூறுவார் என்றும் எதிர்பார்க்கப்படுகின்றது.

இதேவேளை இம்முறை கூட்டத் தொடரில் பாதிக்கப்பட்ட மக்களின் சார்பில் மக்கள் பிரதிநிதிகள் கலந்துகொண்டு உரையாற்றவுள்ளனர். குறிப்பாக தமிழ் தேசியக்கூட்டமைப்பு தமிழ்தேசிய மக்கள் முன்னணி, மற்றும் பல்வேறு அரசியல் கட்சிகளின் மக்கள் பிரதிநிதிகள் ஜெனிவாவில் முகாமிட்டு பாதிக்கப்பட்ட மக்களின் நிலைமை தொடர்பில் உரையாற்றவுள்ளனர்.

விசேடமாக ஜெனிவா வளாகத்தில் நடைபெறவுள்ள 20க்கும் மேற்பட்ட விசேட உபக்குழுக்கூட்டங்களில் பாதிக்கப்பட்ட தமிழ் மக்களின் பிரதிநிதிகள் கலந்துகொண்டு உரையாற்றவுள்ளனர்.

அதுமட்டுமன்றி தென்னிலங்கையின் சிவில் சமூக பிரதிநிதிகளும் இம்முறை கூட்டத் தொடரில் கலந்துகொண்டு ஜெனிவா பிரேரணையை அமுல்படுத்துவதற்கு இலங்கைக்கு கால அவகாசம் வழங்கப்படவேண்டும் என்பது தொடர்பில் சர்வதேச சமூகத்தை வலியுறுத்தவுள்ளனர்.

அதேபோன்று தென்னிலங்கையிலிருந்து இராணுவத்தை பாதுகாக்க வேண்டும் என்ற கோரிக்கையை முன்வைத்து அரச சார்பற்ற நிறுவனங்களின் பிரதிநிதிகள் ஜெனிவாவில் முகாமிட்டு விளக்கங்களை அளிக்கவுள்ளனர்.

மேலும் சர்வதேச அரச சார்பற்ற நிறுவனங்கள் மற்றும் ஐ.நா. மனித உரிமை பேரவையின் உறுப்பு நாடுகள் இலங்கை தொடர்பாக ஜெனிவா வளாகத்தில் இம்முறையும் பல்வேறு உபக்குழுக்கூட்டங்களை நடத்தவுள்ளன.

இந்த உபக்குழுக்கூட்டங்களில் இலங்கை அரசாங்கத்தின் பிரதிநிதிகள் பாதிக்கப்பட்ட மக்களின் பிரதிநிதிகள், சர்வதேச சமூகத்தின் பிரதிநிதிகள் மற்றும் புலம்பெயர்ந்த அமைப்புக்களின் முக்கியஸ்தர்களும் கலந்து கொண்டு உரையாற்றவுள்ளனர். இதற்கான ஏற்பாடுகள் சர்வதேச மனித உரிமை அமைப்புக்களினால் முன்னெடுக்கப்பட்டுள்ளன.

இம்முறை பொதுநலவாய நாடுகளின் செயலகம் சர்வதேச பாராளுமன்ற ஒன்றியம் உள்ளிட்ட அமைப்புக்களின் பிரதிநிதிகளும் முதலாம் கட்ட அமர்வில் உரையாற்றவுள்ளனர். அதேபோன்று அமெரிக்கா, கனடா, பிரிட்டன் அவுஸ்திரேலியா, டென்மார்க் உள்ளிட்ட பல்வேறு நாடுகளின் வௌிவிவகார அமைச்சர்களும் 37ஆவது கூட்டத் தொடரின் முதலாம் கட்ட அமர்வில் கலந்து கொண்டு உரையாற்றவுள்ளனர்.

இது இவ்வாறு இருக்க வௌிவிவகார அமைச்சர் தலைமையில் அமைச்சின் உயர் அதிகாரிகளும் சட்டமா அதிபர் திணைக்களத்தின் உயர் அதிகாரிகளும் ஜெனிவா நோக்கி செல்லவுள்ளனர். அதாவது எதிர்வரும் 21 ஆம் திகதி நடைபெறும் விவாதத்தின்போது இலங்கையின் சார்பில் வெ ளிவிவகார அமைச்சர் பங்கேற்று உரையாற்றவுள்ளார்.

வௌிவிவகார அமைச்சின் உரையில் ஜெனிவா பிரேரணையை இலங்கை எவ்வாறு அமுல்படுத்துகின்றது. மற்றும் அதில் காணப்படுகின்ற சவால்கள் என்பன குறித்துவிளக்கமளிக்கப்படவுள்ளது.

அதேபோன்று காணாமல் போனோர் விவகாரத்திற்கு தீர்வுகாண காணாமல்போனோர் குறித்த அலுவலகம் அமைக்கப்பட்டுள்ளமை தொடர்பிலும் இலங்கை அரசாங்கத்தின் சார்பில் விளக்கமளிக்கப்படும். நம்பகரமான பொறிமுறையை முன்னெடுத்து பாதிக்கப்பட்ட மக்களுக்கு நீதி நிலைநாட்டப்படும் என அரசாங்கத்தின் சார்பில் தெரிவிக்கப்படுமென கூறப்படுகின்றது.

37 ஆவது கூட்டத் தொடர் எதிர்வரும் பெப்ரவரி மாதம் 26ஆம் திகதி முதல் மார்ச் மாதம் 23ஆம் திகதி வரை நடைபெறவுள்ள நிலையில் இலங்கை தொடர்பில் நான்கு முனை பிரசாரப் பணிகள் முன்னெடுக்கப்படும் என எதிர்பார்கப்படுகிறது. குறிப்பாக அரசாங்கத் தரப்பு பாதிக்கப்பட்ட மக்கள் தரப்பு மற்றும் சர்வதேச தரப்பு தென்னிலங்கை தரப்பு ஆகியன கடும் பிரசாரப் பணிகளில் ஈடுபடவுள்ளன.

சர்வதேச மனித உரிமை அமைப்புக்களின் அனுசரணையுடன் பாதிக்கப்பட்ட மக்கள் விசேட உபக்குழுக்கூட்டங்களையும் தென்னிலங்கையின் அமைப்புக்களும் இம்முறை ஜெனிவாவில் நடத்துவதற்கு முயற்சிக்கப்படுவதாக தெரிவிக்கப்படுகின்றது. அந்த வகையில் பல்வேறு தரப்புக்களும் இம்முறை ஜெனிவா கூட்டத் தொடரில் கலந்து கொண்டு கடும் பிரசாரப் பணிகளில் ஈடுபடவுள்ளன.

இலங்கை அரசாங்கம் சர்வதேச பங்களிப்புடன் பொறுப்புக்கூறல் பொறிமுறையை முன்னெடுத்து பாதிக்கப்பட்ட மக்களுக்கு நீதியை நிலைநாட்டவேண்டுமென தெரிவித்து 2015ஆம் ஆண்டு ஜெனிவா மனித உரிமை பேரவையின் 30 ஆவது கூட்டத் தொடரில் பிரேரணை ஒன்று நிறைவேற்றப்பட்டது. அந்தப் பிரேரணைக்கு இலங்கை அரசாங்கமும் அனுசரணை வழங்கியிருந்தது.

அந்தப் பிரேரணையானது கடந்த மார்ச் மாதம் நடைபெற்ற ஐ.நா. மனித உரிமை பேரவையின் 34 ஆவது கூட்டத் தொடரில் மீண்டும் புதுப்பிக்கப்பட்டு இலங்கைக்கு மேலும் இரண்டு வருடகால அவகாசம் வழங்கப்பட்டது. அதன்படி எதிர்வரும் 2019ஆம் ஆண்டு வரை இலங்கைக்கு கால அவகாசம் வழங்கப்பட்டுள்ளது

இதேவேளை இலங்கைக்கு விஜயம் மேற்கொண்ட பயங்கரவாதத்தை ஒடுக்கும் போது அடிப்படை சுதந்திரம் மற்றும் மனித உரிமையை பாதுகாப்பது தொடர்பான ஐ.நா.வின் விசேட நிபுணர் பென் எமர்சன் இம்முறை ஜெனிவா மனித உரிமை பேரவையில் தனது இலங்கை விஜயம் குறித்த அறிக்கையையே தாக்கல் செய்யவுள்ளார்.