சூத்திரதாரிகளை கண்டறியும் விசாரணையை தொடருங்கள்

27 Sep, 2026 | 03:04 PM

உயிர்த்த ஞாயிறு தின தாக்குதல் தொடர்பான வழக்கில் குற்றம்சாட்டப்பட்ட 24 பிரதிவாதிகளில் 15 பேரை குற்றவாளிகளாக மூவரடங்கிய விசேட மேல் நீதிமன்றம் அறிவித்ததுடன், அவர்களுக்கு தலா 200 வருடங்களுக்கு மேற்பட்ட கடூழிய சிறைத்தண்டனை வழங்கி தீர்ப்பளித்திருக்கிறது.

அத்துடன், அவர்களது சொத்துக்களும் உடன் அமுலுக்கு வரும் வகையில் அரசுடமையாக்கப்படும் என்றும் அறிவிக்கப்பட்டுள்ளது. பிரதிவாதிகளில் 9 பேரை நீதிபதிகள் குழாம் விடுவித்திருக்கின்றது.

மேல் நீதிமன்ற நீதிபதி நவரத்ன மாரசிங்க தலைமையில், நீதிபதி சுஜீவ நிசங்க, நீதிபதி ராமநாதன் கண்ணன் ஆகியோரடங்கிய மேல் நீதிமன்ற நீதிபதிகள் குழாம் இந்தத் தீர்ப்பை வழங்கியிருக்கின்றது.

குற்றவாளிகளாக இனங்காணப்பட்ட 15 பேரில் ஒருவருக்கு 260 ஆண்டுகால கடூழிய சிறைத்தண்டனையும் 4 பேருக்கு தலா 240 ஆண்டு கால சிறைத்தண்டனையும் 5 எதிரிகளுக்கு 220 ஆண்டுகள் கடூழிய சிறைத்தண்டனையும் மிகுதி 5 பேருக்கு 200 ஆண்டுகால சிறைத்தண்டனையும் விதிக்கப்பட்டிருக்கின்றது.

உயிர்த்த ஞாயிறு குண்டுத் தாக்குதலுக்கு சதி செய்தமை, ஒத்துழைப்பு வழங்கியமை உட்பட 23,270 குற்றச்சாட்டுகள் மீதே இந்தத் தீர்ப்பு வழங்கப்பட்டிருக்கின்றது.

கடந்த 5 வருட காலமாக விசாரிக்கப்பட்ட இந்த வழக்கில் 25 பேர் பிரதிவாதிகளாக குறிப்பிடப்பட்டிருந்தனர். அவர்களில் ஒருவர் சிறைச்சாலையில் தடுத்து வைக்கப்பட்டிருந்த போது உயிரிழந்திருந்தார். இதனையடுத்து 24பிரதிவாதிகளுக்கு எதிராக நடத்தப்பட்ட வழக்கிலேயே இந்தத் தீர்ப்பு வழங்கப்பட்டிருக்கின்றது.

உயிர்த்த ஞாயிறு தாக்குதல் தொடர்பில் தற்போதும் விசாரணைகள் முன்னெடுக்கப்பட்டு வருகின்றன. அரச புலனாய்வுப் பிரிவின் பணிப்பாளர் சுரேஷ் சலே உட்பட்ட பலரும் கைது செய்யப்பட்டு தற்போது விசாரணைக்கு உட்படுத்தப்பட்டிருக்கின்றனர். இந்த விடயத்தில் முன்னாள் பாதுகாப்பு செயலாளர் கோட்டாபய ராஜபக் ஷ உட்பட்ட சிலருக்கு வெளிநாடு செல்வதற்கான தடையும் நீதிமன்றத்தினால் விதிக்கப்பட்டுள்ளன.

உயிர்த்த ஞாயிறு தாக்குதல் தொடர்பில் தகவல் கிடைத்திருந்தும் அதனை தடுக்கத் தவறிய குற்றச்சாட்டின் பேரில், முன்னாள் ஜனாதிபதி மைத்திரிபால சிறிசேன, முன்னாள் பொலிஸ் மா அதிபர் பூஜித் ஜயசுந்தர, முன்னாள் பாதுகாப்புச் செயலாளர் ஹேமசிறி பெர்னாண்டோ, அரச புலனாய்வுப் பிரிவின் பிரதானி நிலந்த ஜயவர்தன, தேசிய புலனாய்வுப் பிரிவின் பிரதானி திஸ்ஸ மெண்டிஸ் உட்பட்டோர் மீது 2023ஆம் ஆண்டு அடிப்படை மனித உரிமை மீறல் மனு தாக்கல் செய்யப்பட்டிருந்தது. இந்த மனுக்களை விசாரித்த உயர் நீதிமன்றம் முன்னாள் ஜனாதிபதி மைத்திரிபால சிறிசேன உட்பட்டவர்கள், மக்களின் அடிப்படை மனித உரிமைகளை மீறியுள்ளதாக தீர்ப்பளித்து அபராதம் விதித்திருந்தது. முன்னாள் ஜனாதிபதி மைத்திரிபால சிறிசேனவுக்கு 10 கோடி ரூபா அபராதமும் ஏனையவர்களுக்கு அவர்களது தராதரத்துக்கு ஏற்ப அபராதத் தொகைகளும் விதிக்கப்பட்டிருந்தன.

இதனைவிட முன்னாள் பொலிஸ் மா அதிபர் பூஜித் ஜயசுந்தர மற்றும் முன்னாள் பாதுகாப்பு செயலாளர் ஹேமசிறி பெர்னாண்டோ ஆகியோருக்கு எதிராக மேல் நீதிமன்றத்தில் தொடரப்பட்ட வழக்கில் ஜூலை மாதம் 31ஆம் திகதி தீர்ப்பு வழங்கப்பட்டிருந்தது. தாக்குதலை தடுக்கத் தவறிய குற்றச்சாட்டு நிரூபிக்கப்பட்டதன் அடிப்படையில் இவர்கள் இருவருக்கும் மேல் நீதிமன்றம் மரணதண்டனை விதித்திருந்தது.

இவ்வாறு உயிர்த்த ஞாயிறு தாக்குதல் தொடர்பில் இரு வேறு தீர்ப்புகள் வெளியான நிலையில்தான் தற்போது மூன்றாவது தீர்ப்பு வெளியிடப்பட்டுள்ளது.

இந்த தீர்ப்பில் குற்றவாளிகளாக இனங்காணப்பட்டு தண்டிக்கப்பட்டவர்கள் தாக்குதலுக்கு சதித்திட்டம் தீட்டியமை, அதற்கு உதவி மற்றும் ஒத்தாசை வழங்கியமை, பயங்கரவாத கருத்துகள் மற்றும் இனங்களுக்கிடையில் முரண்பாட்டை ஏற்படுத்தியமை தொடர்பாக பயங்கரவாத தடைச் சட்டத்தின் கீழ் தண்டனைக்குரிய குற்றத்தைப் புரிந்துள்ளதாக நீதிபதிகள் தெரிவித்திருந்தனர்.

தண்டனைப் பெற்றவர்கள் உயிர்த்த ஞாயிறு தாக்குதலுக்கு முன்னர் பயங்கரவாத விரிவுரைகள், ஆயுதப்பயிற்சி பட்டறைகள், இரகசிய இடங்களை பராமரித்து வந்தமை உட்பட பல்வேறு குற்றச்சாட்டுகளுக்கு உள்ளாகியிருந்தவர்களாவர்.

இதனடிப்படையிலேயே இந்தத் தீர்ப்பில் தாக்குதலின் பிரதான சூத்திரதாரிகள் தண்டிக்கப்படவில்லை என்றும், சூத்திரதாரிகளை இனங்கண்டு அவர்களை தண்டிக்க நடவடிக்கை எடுக்கப்பட வேண்டும் என்றும் தற்போது கோரிக்கைகள் முன்வைக்கப்படுகின்றன.

இந்த விடயம் தொடர்பில் கருத்து தெரிவித்துள்ள கத்தோலிக்க திருச்சபையின் பேச்சாளர் அருட் தந்தை சிறில் காமினி, உயிர்த்த ஞாயிறு தாக்குதலில் பாதிக்கப்பட்டவர்களுக்கு இன்னமும் முழுமையான நீதி கிடைக்கவில்லை. தாக்குதலின் பிரதான சூத்திரதாரி, தாக்குதல் தொடர்பில் முன்கூட்டியே தகவல் தெரிந்திருந்தும் அதனை தடுக்கத் தவறிய அதிகாரிகள் மற்றும் சஹ்ரான் குழுவினருக்கு உதவியவர்கள், பல்வேறு தரப்பினர் தொடர்பில் விசாரணைகள் நடக்கின்றன. அவர்கள் அனைவரும் சட்டத்தின் முன்னால் தண்டிக்கப்பட்ட பின்னரே பாதிக்கப்பட்டவர்களுக்கு முழுமையான நீதி கிடைக்கும் என்று தெரிவித்திருக்கின்றார்.

இதேபோன்றே உயிர்த்த ஞாயிறு தாக்குதல் தொடர்பான விசாரணைகளை சந்தேக நபராக தடுத்து வைக்கப்பட்டுள்ள சுரேஷ் சலே தொடர்பிலும் உரிய நடவடிக்கைகள் முன்னெடுக்கப்பட வேண்டும் என்று கத்தோலிக்க திருச்சபையின் ஊடகப் பேச்சாளர் அருட் தந்தை ஜூட் கிரிசாந்த பெர்னாண்டோ வலியுறுத்தியிருக்கின்றார்.

ஜனாதிபதி ஆணைக்குழுவின் பரிந்துரைக்கமைய, முன்னாள் ஜனாதிபதி மைத்திரிபால சிறிசேன மற்றும் நிலந்த ஜயவர்தன உள்ளிட்டவர்களுக்கு எதிராகவும் சட்ட நடவடிக்கை எடுக்கப்பட வேண்டும்.

அத்துடன், முன்னாள் ஜனாதிபதி கோட்டாபய ராஜபக் ஷவுக்கு வெளிநாடு செல்வதற்கு தடை விதிக்கப்பட்டுள்ளமை தொடர்பிலும் உரிய விசாரணைகள் நடத்தப்பட வேண்டும் என்றும் அவர் மேலும் வலியுறுத்தியிருக்கின்றார்.

இதனைவிட உயிர்த்த ஞாயிறு தாக்குதல் தொடர்பான மேல் நீதிமன்றத்தின் தீர்ப்பு தொடர்பில் பல்வேறு அரசியல் கட்சிகளின் தலைவர்களும் கருத்துகளை தெரிவித்திருக்கின்றனர். பாராளுமன்றத்தில் கடந்த புதன்கிழமை கருத்து வெளியிட்ட ஐக்கிய மக்கள் சக்தியின் புத்தளம் மாவட்ட பாராளுமன்ற உறுப்பினர் ஹெக்டர் அப்புஹாமி, உயிர்த்த ஞாயிறு குண்டுத் தாக்குதல் தொடர்பான நீதிமன்ற தீர்ப்பின் மூலம் பாதிக்கப்பட்ட மக்களுக்கு கால்பங்கு நீதியே கிடைத்துள்ளது. இன்னும் முக்கால்பங்கு நீதி கிடைக்கவில்லை. இதில் சூத்திரதாரி என்று கூறப்பட்டவர்கள் எங்கே? இதற்கு பிரதானமாக பணம் வழங்கிய குழுவினர் எங்கே? பிரதான சூத்திரதாரியை வெளிப்படுத்தினால்தான் பல கேள்விகளுக்கு விடை கிடைக்கும் என்று தெரிவித்திருக்கின்றார்.

குண்டுத் தாக்குதலுடன் தொடர்புடைய சாரா, இந்தியாவில் இருப்பதாக தேசிய மக்கள் சக்தியினர் கடந்த காலங்களில் குறிப்பிட்டார்கள். இந்தியாவுடன் பல ஒப்பந்தங்கள் கைச்சாத்திடப்பட்டுள்ளன. சாராவை இலங்கைக்கு அழைத்து வருவதற்கு ஏதேனும் ஒப்பந்தம் செய்யப்பட்டுள்ளதா? பிரதான சூத்திரதாரியை கைது செய்வதற்கு ஏதேனும் நடவடிக்கை எடுக்கப்பட்டுள்ளதா என்றும் ஹெக்டர் அப்புஹாமி பாராளுமன்றத்தில் கேள்வி எழுப்பியிருந்தார்.

இதேபோன்றே, ‘குண்டுத் தாக்குதல் சம்பவத்துக்கு அம்பாகவும் வில்லாகவும் செயற்பட்டவர்களுக்கு தற்போது தண்டனை வழங்கப்பட்டுள்ளது. எய்தவனான பிரதான சூத்திரதாரி யார் என்பது இதுவரையில் வெளிப்படுத்தப்படவில்லை. பிரதான சூத்திரதாரி மற்றும் இதன் உண்மையான பின்னணி நீதிமன்றத்தால் வெளிப்படுத்தப்பட வேண்டும்’ என்று பாராளுமன்றத்தில் இலங்கைத் தமிழரசுக் கட்சியின் பாராளுமன்ற உறுப்பினர் ஸ்ரீநேசன் சுட்டிக்காட்டியிருக்கின்றார்.இவ்வாறு உயிர்த்த ஞாயிறு தாக்குதல் விசாரணைகள் இடம்பெற்று வரும் நிலையில் தற்போது வெளியாகியுள்ள தீர்ப்பு முழுமையானது அல்ல என்பதை குறிக்கும் வகையிலேயே சகலரது கருத்துகளும் அமைந்திருக்கின்றன.

உயிர்த்த ஞாயிறு தாக்குதல் தொடர்பில் தற்போது விசாரணைகள் முன்னெடுக்கப்பட்டு வருகின்றன. சுரேஷ் சலே உள்ளிட்டவர்கள் கைது செய்யப்பட்டு விசாரணைக்கு உட்படுத்தப்பட்டிருக்கின்றனர். இந்த விசாரணை தொடர வேண்டும். விசாரணையில் இந்தத் தாக்குதலின் பின்னணி என்ன? பிரதான சூத்திரதாரி யார்? என்ற விடயங்கள் கண்டறியப்பட்டு அவர்கள் சட்டத்தின் முன் நிறுத்தப்பட வேண்டும். இவையே பாதிக்கப்பட்ட மக்களின் கோரிக்கையாக இருக்கின்றன.

இந்த விடயத்தில் அரசாங்கம் உரிய நடவடிக்கைகளை எடுக்க வேண்டும் என்று வலியுறுத்த விரும்புகின்றோம்.