தவறவிடாதீர்கள்..!உடனே பதிவு செய்யுங்கள்

'ஏழை, எளிய மக்களின் உரிமைகளுக்காக குரல் கொடுத்து தமிழ்நாட்டின் சமூக, அரசியல் வரலாற்றில் தனி முத்திரை பதித்தவர் பேரறிஞர் அண்ணா'' என அவரது பிறந்த நாளில் தமிழகம் முதல்வர் விஜய் அவருடைய சமூக ஊடகப் பக்கத்தில் புகழாரம் சூட்டியுள்ளார்.

தமிழகத்தின் முன்னாள் முதல்வரும், தமிழ் மண்ணில் திராவிட கலாச்சாரத்தை விதைத்தவருமான பேரறிஞர் அண்ணாவின் 118 வது பிறந்தநாள் இன்று தமிழகம் முழுவதும் கொண்டாடப்பட்டு வருகிறது. அவரது பிறந்த நாளை முன்னிட்டு அரசியல் தலைவர்கள் பலரும் அவரது மக்கள் சேவையை நினைவு கூர்ந்து சமூக ஊடகங்களில் பதிவிட்டு வருகிறார்கள்.

தமிழக முதல்வரான விஜய் அவருடைய சமூக ஊடகத்தில் பதிவிட்டிருப்பதாவது,

'' தமிழ்நாட்டின் அரசியல் வரலாற்றில் புதிய அத்தியாயத்தை உருவாக்கி ஏழை, எளிய மக்களின் உரிமைகளுக்காக குரல் கொடுத்த முன்னாள் முதலமைச்சர் பேரறிஞர் அண்ணாவின் பிறந்த நாளில் அவரது தொலைநோக்குப் பார்வையையும், மக்கள் சேவையையும் நெஞ்சார நினைவுகூர்ந்து போற்றுகிறேன்.

எழுச்சியூட்டும் மேடைப் பேச்சாலும்.. கூர்மையான எழுத்தாற்றலாலும்.. மக்கள் மனங்களைக் கவர்ந்து, அவர்களின் பேராதரவுடன் ஆட்சி பொறுப்பேற்று, தமிழ் மொழி மீது கொண்ட அளவற்ற பற்றால் நம் மாநிலத்திற்கு 'தமிழ்நாடு' என பெயர் சூட்டி, மாநில சுயாட்சிக்கு வித்திட்டு, சுயமரியாதை திருமணங்களுக்கு சட்டரீதியான அங்கீகாரம் வழங்கி தமிழ்நாட்டின் சமூக , அரசியல் வரலாற்றில் தனி முத்திரை பதித்தவர் பேரறிஞர் அண்ணா.

'கடமை கண்ணியம் கட்டுப்பாடு', 'ஏழையின் சிரிப்பில் இறைவனை காண்போம்' போன்ற அவரது உயரிய முழக்கங்களை நெஞ்சில் ஏந்தி, சமூக நீதியும், சமத்துவமும், சகோதரத்துவமும் எங்கும் தழைத்தோங்கிடவும் தமிழின் பெருமையை காத்திடவும் இந்நாளில் உறுதி ஏற்போம்'' என பதிவிட்டுள்ளார்.