தவறவிடாதீர்கள்..!உடனே பதிவு செய்யுங்கள்

இலங்கையைச் சேர்ந்த தொழிலதிபர் கலாநிதி ரொஷ் ஜலம்கேவுக்குச் சொந்தமானதாகக் கூறப்படும் Gulfstream G-V நீண்டதூர தனியார் ஜெட் விமானம், அவுஸ்திரேலியாவின் பேர்த் நகரிலிருந்து இரத்மலானை விமான நிலையத்தை வந்தடைந்தது.

இரத்தினபுரி – நீலகாமம் பகுதியைப் பிறப்பிடமாகக் கொண்ட கலாநிதி ரொஷ் ஜலம்கே, கல்கிஸை புனித தோமஸ் கல்லூரியின் பழைய மாணவர் எனத் தெரிவிக்கப்படுகிறது. 

அவுஸ்திரேலியாவின் சுகாதார சேவைத் துறையுடன் தொடர்புடைய பல்வேறு வர்த்தக முயற்சிகளில் ஈடுபட்டுள்ள இலங்கை வம்சாவளியைச் சேர்ந்த தொழிலதிபராகவும் அவர் அறியப்படுகிறார்.

அவரது தனியார் ஜெட் விமானம் சுமார் 12,000 கிலோமீற்றர் வரை நீண்டதூரப் பயணத்தை மேற்கொள்ளக்கூடியதாகத் தெரிவிக்கப்பட்டுள்ளது. Gulfstream G-V விமானம் நீண்டதூரப் பயணங்களுக்காக வடிவமைக்கப்பட்ட சொகுசு வணிக விமானமாகும்.

இந்த விமானம் சுமார் 51,000 அடி உயரம் வரை பறக்கக்கூடியதுடன், அதன் உள்ளமைப்பு மற்றும் கட்டமைப்பைப் பொறுத்து பொதுவாக 14 முதல் 16 பயணிகள் வரை பயணிக்கக்கூடியதாகக் குறிப்பிடப்படுகிறது.

இலங்கையின் தனியார் விமானப் போக்குவரத்து வரலாற்றில், 1980களில் தொழிலதிபர் உபாலி விஜேவர்தனவால் வாங்கப்பட்ட Learjet 35A விமானம் முன்னதாக கவனம் பெற்றிருந்தது. அந்த விமானத்தின் பறக்கும் தூரம் சுமார் 4,000 கிலோமீற்றர் எனக் குறிப்பிடப்படுகிறது.

இதனிடையே, இலங்கையில் புதிய வர்த்தக முயற்சிகளை ஆரம்பிப்பது தொடர்பான கலந்துரையாடல்களில் கலாநிதி ரொஷ் ஜலம்கே பங்கேற்றதாகவும், பின்னர் அவர் இரத்மலானை விமான நிலையத்திலிருந்து பேர்த் நோக்கி மீண்டும் புறப்பட்டுச் சென்றதாகவும் தெரிவிக்கப்பட்டுள்ளது.

இந்த விஜயம் இலங்கையின் தனியார் விமானப் போக்குவரத்துத் துறையில் குறிப்பிடத்தக்க கவனத்தை ஈர்த்துள்ளது.