தவறவிடாதீர்கள்..!உடனே பதிவு செய்யுங்கள்

(நமது நிருபர்)

அரசியலமைப்பின் 22ஆவது திருத்தச் சட்டமூலத்தை பாராளுமன்றத்தில் விவாதித்து நிறைவேற்றுவதில் எதிர்க்கட்சிகள் மற்றும் அனைத்து அரசியல் கட்சிகளும் எவ்வாறு ஒருங்கிணைந்து செயற்படவேண்டும் என்பது குறித்த முக்கிய கலந்துரையாடல் இன்று (11) நடைபெற்றுள்ளது.

சுதந்திர செயற்பாட்டு மையம் மற்றும் ஐக்கிய மக்கள் சக்தி ஆகியவற்றின் பிரதிநிதிகள் குழுவினரிடையே, ஐக்கிய மக்கள் சக்தி தலைமை அலுவலகத்தில் இக்கலந்துரையாடல் நடைபெற்றது.

இக்கூட்டத்தில், பாராளுமன்றத்தில் 22ஆவது திருத்தச் சட்டத்தை வெற்றிகரமாக நிறைவேற்றுவதற்கு அனைத்து எதிர்க்கட்சிகளும் ஏனைய அரசியல் பிரிவுகளும் ஒன்றிணைந்து செயல்படவேண்டியதன் அவசியம் குறித்து விரிவாக ஆராயப்பட்டது. 

மேலும், இது தொடர்பாக அடுத்த வாரம் எதிர்க்கட்சிகள், தொழிற்சங்கங்கள் மற்றும் சிவில் சமூக அமைப்புகளை உள்ளடக்கிய கூட்டுச் சந்திப்பு ஒன்றை நடத்துவதற்கும், அதனைத் தொடர்ந்து அடுத்தகட்ட நடவடிக்கைகளை இணைந்து முன்னெடுப்பதன் முக்கியத்துவம் குறித்தும் இரு தரப்பினரும் இதன்போது இணக்கப்பாட்டுக்கு வந்துள்ளனர்.

இந்நிகழ்வில் ஐக்கிய மக்கள் சக்தியின் பொதுச் செயலாளரும் பாராளுமன்ற உறுப்பினருமான ரஞ்சித் மத்தும பண்டார, பாராளுமன்ற உறுப்பினர்களான சுஜீவ சேனசிங்க, டொக்டர் கவிந்த ஹேஷான் ஜயவர்தன, ஜெ.சி. அலவத்துவல, சுஜித் சஞ்ஜய பெரேரா மற்றும் சட்டத்தரணி சீரல் லக்திலக்க ஆகியோர் கலந்துகொண்டனர்.

சுதந்திர செயற்பாட்டு மையத்தின் சார்பில் ஜனாதிபதி சட்டத்தரணி மைத்திரி குணரத்ன, முன்னாள் பாராளுமன்ற உறுப்பினர்களான பிரேமநாத் தொலவத்த, சமன் ரத்னப்பிரிய உள்ளிட்ட பல பிரதிநிதிகள் பங்கேற்றனர்.