தவறவிடாதீர்கள்..!உடனே பதிவு செய்யுங்கள்

தமிழ் சினிமாவின் வளர்ந்து வரும் நடிகரான கிஷன் தாஸ் கதையின் நாயகனாக நடித்திருக்கும் 'சி யூ' திரைப்படத்தில் இடம் பெற்ற 'ஏகாந்தம்' எனும் முதல் பாடலும், பாடலுக்கான லிரிக்கல் விடியோவும் வெளியிடப்பட்டிருக்கிறது.

இயக்குநர் சந்தோஷ் ஸ்ரீவட்சன் இயக்கத்தில் உருவாகி வரும் 'சி யூ' திரைப்படத்தில் கிஷன் தாஸ், சஞ்சனா, எம். எஸ். பாஸ்கர், அருண்குமார், கார்த்திக் குமார், அட்சயா ஹரிஹரன் உள்ளிட்ட பலர் நடித்திருக்கிறார்கள். சந்தீப் கே. விஜய் ஒளிப்பதிவு செய்திருக்கும் இந்த திரைப்படத்திற்கு ஜீனம் இசையமைத்திருக்கிறார்.

ரொமாண்டிக் என்டர்டெய்னராக தயாராகி இருக்கும் இந்த திரைப்படத்தை ஏ ஆர் என்டர்டெயின்மெண்ட்- டி ஸ்டுடியோஸ் ஆகிய நிறுவனங்கள் சார்பில் தயாரிப்பாளர்கள் அஜ்மல் கான், ரியா,  இயக்குநர் விஜய் ஆகியோர் இணைந்து தயாரித்திருக்கிறார்கள்.

இப்படத்தின் அறிமுக காணொளி வெளியாகி ஒரு மில்லியனுக்கும் மேற்பட்ட டிஜிட்டல் பார்வைகளை பெற்று படத்தை பற்றிய எதிர்பார்ப்பை உருவாக்கி இருந்த நிலையில், தற்போது இப்படத்தில் இடம் பெற்ற 'ஏகாந்தம் இதுவா திரை நீ  போட' எனத் தொடங்கும் முதல் பாடலும், பாடலுக்கான லிரிக்கல் விடியோவும் வெளியிடப்பட்டிருக்கிறது.

இந்தப் பாடலை பாடலாசிரியர் விக்னேஷ் ஸ்ரீகாந்த் எழுத, பின்னணி பாடகி சக்தி ஸ்ரீ கோபாலன் மற்றும் றாப் இசை பாடகர் வாகீசன் ராசையா ஆகியோர் இணைந்து பாடியிருக்கிறார்கள். காதல் உணர்வை வெளிப்படுத்தும் மெல்லிசையுடன் றாப் இசையை இணைத்து உருவாகி இருக்கும் இந்த பாடல் ஒரு பிரிவு இசை ரசிகர்களை வெகுவாக கவர்ந்திருக்கிறது.