தவறவிடாதீர்கள்..!உடனே பதிவு செய்யுங்கள்

“மாகாண சபைத் தேர்தலை நடத்துவதில் தற்போது சட்டத் தடைகள் உள்ளன. பாராளுமன்றத்தில் உள்ள அனைத்துக் கட்சிகளும் உடன்படும் தேர்தல் முறையைத் தீர்மானித்தவுடன் மாகாண சபைத் தேர்தலையும் நாம் நடத்துவோம். நாம் ஒருபோதும் மக்களுக்குச் சாக்குப்போக்குக் காட்டி ஆட்சி அதிகாரத்தைத் தக்கவைத்துக்கொள்ள முயற்சிக்க மாட்டோம். நாம் எப்போதும் மக்கள் மீது மட்டுமே நம்பிக்கை வைத்துள்ளோம்.” ஜனாதிபதியின் இந்தக் கருத்து மேலோட்டமாகப் பார்க்கும்போது தேர்தலை நடத்துவதற்கான அரசாங்கத்தின் உறுதிமொழியாகத் தோன்றலாம். ஆனால், “அனைத்துக் கட்சிகளும் உடன்படும் தேர்தல் முறை தீர்மானிக்கப்பட்ட பின்னரே தேர்தல் நடத்தப்படும்” என்ற நிபந்தனை, தேர்தலுக்கான தெளிவான காலக்கெடு எதுவும் அரசாங்கத்திடம் இல்லை என்பதையே வெளிப்படுத்துவதாக விமர்சகர்கள் சுட்டிக்காட்டுகின்றனர். அனைத்துக் கட்சிகளின் முழுமையான இணக்கப்பாட்டைப் பெறுவது நடைமுறையில் நீண்டகாலம் எடுக்கக்கூடியது. அரசியல் கட்சிகளிடையே முழு உடன்பாடு ஏற்படாத வரை தேர்தலை நடத்த முடியாது என்ற நிலைப்பாடு தொடருமானால், மாகாண சபைத் தேர்தல் மேலும் காலவரையறையின்றித் தள்ளிப்போகும் அபாயம் உள்ளது.