தவறவிடாதீர்கள்..!உடனே பதிவு செய்யுங்கள்

உலகளவில் மெட்ரோ ரயில் வலையமைப்பைக் கொண்ட நாடுகளில் இந்தியா விரைவில் இரண்டாவது இடத்தைப் பிடிக்கவுள்ளதாகத் தெரிவிக்கப்பட்டுள்ளது.

சர்வதேச அளவில் மெட்ரோ ரயில் வலையமைப்பில் இந்தியாவின் அண்டை நாடான சீனா முதலிடத்தில் உள்ளது. சீனாவில் சுமார் 11,000 கிலோமீற்றர் நீளமான மெட்ரோ ரயில் வழித்தடங்கள் உள்ளன.

சீனாவுக்கு அடுத்தபடியாக, 1,386 கிலோமீற்றர் நீளமான மெட்ரோ ரயில் வலையமைப்புடன் அமெரிக்கா இரண்டாவது இடத்தில் உள்ளது. இந்தியா 1,170 கிலோமீற்றர் நீளமான மெட்ரோ ரயில் வழித்தடங்களுடன் மூன்றாவது இடத்தில் உள்ளது.

இந்தியாவில் தற்போது 26 நகரங்களில் மெட்ரோ ரயில் சேவைகள் இயங்கி வருகின்றன. கடந்த 2014ஆம் ஆண்டில் ஐந்து நகரங்களில் வெறும் 245 கிலோமீற்றர் நீளத்துக்கு மட்டுமே இருந்த மெட்ரோ ரயில் வலையமைப்பு, தற்போது 1,170 கிலோமீற்றராக விரிவடைந்துள்ளது.

அமெரிக்காவை விட இந்தியா தற்போது 216 கிலோமீற்றர் மட்டுமே பின்தங்கியுள்ள நிலையில், நாட்டின் பல்வேறு நகரங்களில் மேலும் 900 கிலோமீற்றர் தொலைவுக்கு மெட்ரோ ரயில் கட்டுமானப் பணிகள் நடைபெற்று வருகின்றன.

இந்தக் கட்டுமானங்களில் ஒரு சிறிய பகுதி கூட பயன்பாட்டுக்கு வந்தால், இந்தியா அமெரிக்காவை முந்தி உலகளவில் இரண்டாவது பெரிய மெட்ரோ ரயில் வலையமைப்பைக் கொண்ட நாடாக மாறும் என எதிர்பார்க்கப்படுகிறது.