தவறவிடாதீர்கள்..!உடனே பதிவு செய்யுங்கள்

(எம்.ஆர்.எம்.வசீம், இராஜதுரை ஹஷான்)

இலங்கை பட்டய ஊடகவியலாளர் நிறுவனத்தை ஸ்தாபிப்பதற்கான சட்டமூலத்தின் சில சரத்துக்கள் அரசியலமைப்பிற்கு முரணானவை என்பதால், அதனை பாராளுமன்றத்தில் விசேட பெரும்பான்மையுடன் நிறைவேற்ற வேண்டும் என உயர் நீதிமன்றம் தீர்மானித்துள்ளதாக சபாநாயகர் ஜகத் விக்ரமரத்ன தெரிவித்தார்.

பாராளுமன்றம் இன்று (08)  செவ்வாய்க்கிழமை காலை சபாநாயகர் ஜகத் விக்ரமரத்ன தலைமையில் கூடியது.  பிரதான நடவடிக்கையாக சபாநாயகரின் அறிவிப்பு இடம்பெற்றது. இதன்போதே இலங்கை பட்டய ஊடகவியலாளர் நிறுவனத்தை ஸ்தாபிப்பதற்காக பாராளுமன்றத்தில் சமர்ப்பிக்கப்பட்டிருந்த சட்டமூலம் தொடர்பில் உயர் நீதிமன்றத்தின்  வியாக்கியானத்தை சபைக்கு அறிவிக்கும்போதே இவ்வாறு  தெரிவித்தார்.

இதுதொடர்பில் சபாநாயகர் தொடர்ந்து குறிப்பிடுகையில்,

இலங்கை பட்டய ஊடக கற்கை நிறுவன  சட்டமூலத்தின் சில சரத்துகள் அரசியலமைப்புக்கு முரண், அதனால் சட்டமூலத்தை பாராளுமன்றத்தில் விசேட பெரும்பான்மையுடன் நிறைவேற்ற வேண்டும் என  உயர்நீதிமன்றம் தீர்மானத்துள்ளதாக அறிவித்திருக்கிறது. 

உயர் நீதிமன்றம் பரிந்துரைத்துள்ள திருத்தங்கள் அதில் சேர்க்கப்பட்டால், குறித்த சட்டமூலத்தை சாதாரண பெரும்பான்மையுடன் நிறைவேற்றிக் கொள்ள முடியும் என்றும் உயர் நீதிமன்ற வியாக்கியானத்தில் தெரிவிக்கப்பட்டுள்ளது என்றார்.