தவறவிடாதீர்கள்..!உடனே பதிவு செய்யுங்கள்

அமெரிக்காவின் மியாமி சர்வதேச விமான நிலையத்தில் தரையிறங்கிய அமேசான் நிறுவனத்தின் போயிங் 767 சரக்கு விமானம் ஒன்று, ஓடுதளத்தை தாண்டிச் சென்று வாகனங்கள் மீது மோதித் தீப்பற்றி எரிந்ததில் குறைந்தது 05 பேர் பரிதாபமாக உயிரிழந்துள்ளனர்.

ஞாயிற்றுக்கிழமை பிற்பகல் 2:00 மணியளவில் நிகழ்ந்த இந்த கொடூர விபத்தில் மேலும் 05 பேர் காயமடைந்துள்ளதாகவும், அவர்களில் மூவரின் நிலைமை மிகவும் கவலைக்கிடமாக உள்ளதாகவும் மியாமி-டேட் தீயணைப்பு மற்றும் மீட்புப் படைத் தலைவர் ராய்ட் 'ரே' ஜடல்லா உறுதிப்படுத்தியுள்ளார்.

பவேர்ட்டோ ரிகோவின் சான் ஜுவான் நகரில் இருந்து வந்த இந்த 32 ஆண்டுகள் பழமையான போயிங் 767 ரக சரக்கு விமானம், ஓடுதளத்தை விட்டு வெளியேறி அங்கு நின்று கொண்டிருந்த பல வாகனங்கள் மீது மோதியுள்ளது. அதில் வாகனங்களுக்குள் சிக்கிய சிலர் மீட்கப்பட்ட போதிலும் 5 பேர் உயிரிழந்துள்ளனர்.

விமானப் போக்குவரத்து கண்காணிப்புத் தளமான 'Flightradar24' தகவலின்படி, ஓடுதளத்தின் எல்லைப் பகுதியைத் தாண்டும் போது விமானம் மணிக்கு சுமார் 130 மைல் வேகத்தில் சென்றுள்ளது.

தரையிறங்குவதற்கு முன்னதாக விமானிகள் எவ்வித அவசரநிலையையும் கட்டுப்பாட்டு அறைக்கு அறிவிக்கவில்லை என்பது விமான போக்குவரத்து கட்டுப்பாட்டு ஆடியோ ஆய்வில் தெரியவந்துள்ளது.

'21 Air' நிறுவனத்தால் இயக்கப்படும் இந்த அமேசான் ஏர் விமான விபத்து குறித்து அமெரிக்கப் தேசிய போக்குவரத்து பாதுகாப்பு சபை மற்றும் கூட்டாட்சி விமானப் போக்குவரத்து நிர்வாகம் ஆகியவை விசாரணைகளை ஆரம்பித்துள்ளதாக தெரிவிக்கப்பட்டுள்ளது.

இந்த விபத்தினால் ஏற்பட்ட தீயை அணைக்க 60-க்கும் மேற்பட்ட தீயணைப்பு வாகனங்கள் களமிறக்கப்பட்டுள்ளன. ஓடுதளத்தில் சேதமடைந்த விமானம் அகற்றப்படும் வரை மியாமி விமான நிலையத்திற்கான பல விமானங்கள் இன்று திங்கட்கிழமை வரை தாமதமாக இயங்கும் என அறிவிக்கப்பட்டுள்ளது.