தவறவிடாதீர்கள்..!உடனே பதிவு செய்யுங்கள்

(நெவில் அன்தனி)

கொழும்பு சுகததாச விளையாட்டரங்கில் ஞாயிற்றுக்கிழமை (06) நடைபெற்ற சுப்பர் லீக் சம்பியன்ஷிப் போட்டியில் ரட்னம் கழகத்தை 3-0 என்ற கோல்கள் வித்தியாசத்தில் பேருவளை ரெட் ஸ்டார் கழகம் வெற்றிகொண்டது.

இந்த வெற்றியுடன் சுப்பர் சிக்ஸ் சுற்றில் விளையாட நான்காவது அணியாக ரெட் ஸ்டார் தகுதி பெற்றுக்கொண்டது.

இந்தப் போட்டியில் இலகுவாக வெற்றி பெற்று விடலாம் என்ற எண்ணத்தில் ரெட் ஸ்டார் கழகம் விளையாடியதை அவதானிக்க முடிந்தது.

ஆனால், போட்டியில் நேரம் செல்ல செல்ல ரட்னம் கழகம் திறமையாக விளையாடி ரெட் ஸ்டார் கழகத்துக்கு அழுத்தத்தைக் கொடுத்த வண்ணம் இருந்தது.

ரட்னம் கழகத்துக்கு கோல் போடுவதற்கு வாய்ப்புகள் கிடைத்த போதிலும் அதன் முன் கள கிடைத்த வாய்ப்புகளை எல்லாம் கோட்டை விட்டனர்.

அதேவேளை, ரெட் ஸ்டார் கழகத்துக்கு கோல் போடுவதற்கு கிடைத்த குறைந்தது 3 இலகுவான வாய்ப்புகள் உட்பட  6 வாய்ப்புகள் கோட்டை விடப்பட்டன.

எனினும், போட்டி இடைவேளையை நெருங்கிக்கொண்டிருந்தபோது ரட்னம் கழக பின்கள வீரர் பிரான்சிஸ் சிக்கேரூபாவின் அசிரத்தை காரணமாக ரெட் ஸ்டார் கழகம் முதலாவது கோலை போட்டது.

அசண்டே ஜெரோம் பரிமாறிய பந்தை சுப்புன் தனஞ்சய  கோலாக்கி ரெட் ஸ்டார் கழகத்தை இடைவேளையின்போது 1 - 0 என முன்னிலையில் இட்டார்.

தொடர்ந்து 70ஆவது நிமிடத்தில் ரெட் ஸ்டார் கழகம் சார்பாக அசண்டே ஜெரோம் இரண்டாவது கோலை போட்டார்.

உபாதையீடு நேரத்தில் மாற்று வீரர் மொஹமத் ரிப்கான் கோல் போட்டு ரெட் ஸ்டார் கழகத்தின் கோல் எண்ணிக்கையை 3ஆவது உயர்த்தினார்.

அதனைத் தொடர்ந்து சற்று நேரத்தில் போட்டி முடிவுக்கு  வந்தது.