தவறவிடாதீர்கள்..!உடனே பதிவு செய்யுங்கள்

(புளியந்தீவு நிருபர்)

மட்டக்களப்பு கொக்கட்டிச்சோலை ஸ்ரீ தான்தோன்றீஸ்வரர் ஆலயத்துக்காக அமைக்கப்படவிருக்கும் புதிய அலங்கார சித்திரத் தேரின் அடிச்சட்டத்துக்கு விசேட அபிஷேகம் நடத்தும் நிகழ்வு  ஞாயிற்றுக்கிழமை (23) நடைபெற்றது.

ஆலயத்தின் தலைவர் வண்ணக்கர் இ.மேகராசா தலைமையில் நடைபெற்ற இந்நிகழ்வானது ஆலயத்தின் தலைமை குருக்கள் சிவஸ்ரீ மு.கு.சச்சுதானந்த குருக்கள் தலைமையில் விசேட பூஜையுடன் ஆரம்பமானது. 

அமையப்பெறவுள்ள சித்திர தேருக்கான ஆரம்ப நிகழ்வாக தேருக்கான அடிச்சட்டத்துக்கு விசேட அபிஷேகம் செய்யப்பட்டு பூஜை வழிபாடுகள் நடைபெற்றதைத் தொடர்ந்து, தேருக்கான அனுசரனையாளர்களான கோயில் போரதீவைச் சேர்ந்த லண்டனில் வசிக்கும் மார்க்கண்டு நேசராசா குடும்பத்தினரால் ஆலய அறங்காவலர்களிடம் தேரின் அடிச்சட்டம் வழங்கப்பட்டது.

அதனைத் தொடர்ந்து தேரினை வடிவமைக்கவுள்ள சிற்பாச்சாரி  சந்திரமோகன் உள்ளிட்ட சிற்பாச்சாரியார் குழுவினர் தேருக்கான முதற்கட்ட பணியினை ஆரம்பித்துவைத்தனர்.

இப்பூஜை நிகழ்வுகளில் மார்க்கண்டு நேசராசா குடும்ப உறுப்பினர்கள், பிரபல தொழிலதிபரும் தேசியஜோதி Dr.பீ.நல்லரெத்தினம், வெல்லாவெளி பிரதேச செயலாளர், பட்டிப்பளை பிரதேச சபை தவிசாளர், செயலாளர் வண்ணக்கர் சி.கங்காதரன், பொருளாளர் வண்ணக்கர் ச.கோகுலகிருஷ்ணன்,  ஆலய அறங்காவலர் சபை உறுப்பினர்கள், பக்தர்கள் என பெருந்திரளானோர் கலந்துகொண்டனர்.

“ஈழ மணித்திருநாடு” என்று அழைக்கப்படும் இலங்கை தேசத்தின் கிழக்கிழங்கையின் “தேரோடும் ஆலயம்” என்று வர்ணிக்கப்படும் கொக்கட்டிச்சோலை ஸ்ரீ தான்தோன்றீஸ்வர் ஆலயத்தின் சித்திரத் தேர் சுமார் 800 ஆண்டுகள் பழமை வாய்ந்ததாக காணப்படுவதனால் குறித்த சித்திரத் தேருக்கு பதிலான புதிய தேரினை சுமார் 3 கோடி ரூபாய் செலவில் மட்டக்களப்பு கோயில் போரதீவைச் சேர்ந்த லண்டனில் வசிக்கும் மார்க்கண்டு நேசராசா குடும்பத்தினர் முழு அனுசரனையினை வழங்கியுள்ளனர்.

அதேவேளை கொக்கட்டிச்சோலை ஸ்ரீ தான்தோன்றீஸ்வர் ஆலயத்தினை பூரண கருங்கல்லினாலான ஆலயமாக மாற்றி அமைக்கும் பணிகள்  மும்முரமாக தற்போது நடைபெற்று வருகின்றமை குறிப்பிடத்தக்கது.