கட்டுக்கதைகளுக்கு அரசாங்கம் ஒருபோதும் அனுமதி வழங்கக்கூடாது

23 Aug, 2026 | 12:19 PM

நாட்டில் மீண்டும் புலிகளின் மீள் உருவாக்கம் தொடர்பிலான புனைக்கதைகளைக் கூறி பதற்றத்தை ஏற்படுத்துவதற்கு ஒரு சில குழுக்கள் முயற்சிக்கின்றனவா என்ற சந்தேகம் தற்போது ஏற்பட்டிருக்கின்றது.

கடந்த சில தினங்களுக்கு முன்னர் கொழும்பில் இடம்பெற்ற செய்தியாளர் மாநாட்டில் புதிதாக முளைத்துள்ள அமைப்பொன்றின் பிரதிநிதி தெரிவித்த கருத்தும் அதற்கு அரசாங்கத் தரப்பில் வழங்கப்பட்டுள்ள பதிலும் பல்வேறு சந்தேகங்களை உருவாக்கும் வகையில் அமைந்துள்ளன.

கண்டங்களுக்கிடையேயான மனித உரிமைகள் ஆணையகத்தின் (அரச சாரா அமைப்பு) நிறைவேற்றுப் பணிப்பாளர் என்ற பெயரில் சங்கீத் டயஸ் சேகர என்பவர் கடந்த ஞாயிற்றுக்கிழமை செய்தியாளர் மாநாடொன்றை நடத்தியிருந்தார்.

பச்சிலைப்பள்ளி பிரதேச சபைக்குட்பட்ட பளை பகுதியில் அமைந்துள்ள அரச காப்பக நிலத்தில் எவ்வித அனுமதியுமின்றி சட்டவிரோத கட்டுமானங்கள் முன்னெடுக்கப்பட்டு வருவதாகவும், இது தமிழீழ விடுதலைப் புலிகளின் பயிற்சிக் முகாமொன்றை அல்லது வெடிபொருட்களை உற்பத்தி செய்யும் கூடத்தை உருவாக்கும் திட்டமா என்ற பலத்த சந்தேகம் எழுந்துள்ளதாகவும் அவர் குற்றம் சாட்டியிருந்தார்.

இது தொடர்பாக உடனடி நடவடிக்கை எடுக்குமாறு கோரி நாட்டின் உயர்மட்ட அதிகாரிகளுக்கு எழுத்துமூல ஆவணங்கள் கையளிக்கப்பட்டுள்ளதாகவும் அவர் சுட்டிக்காட்டியிருந்தார்.

இதுகுறித்து அவர் மேலும் கருத்து தெரிவிக்கையில்,

‘பச்சிலைப்பள்ளி பிரதேச சபைக்குட்பட்ட பளை பகுதியில் அமைந்துள்ள அரச காப்பகத்துக்குச் சொந்தமான சுமார் 49 ஏக்கர் நிலப்பரப்பு சட்டவிரோதமான முறையில் துப்புரவு செய்யப்பட்டு, மத்திய அரசோ அல்லது உள்ளூராட்சி அமைப்புகளோ அறியாமல் எவ்வித அனுமதிப் பத்திரங்களுமின்றி மூன்று மாடி கொங்கிரீட் கட்டடமொன்று நிர்மாணிக்கப்பட்டு வருகின்றது. இங்கு தினமும் 100 முதல் 150 வரையிலான நபர்கள் பணிக்கு வருகை தருகின்றனர்.

இந்தத் திட்டத்தின் பின்னணியில் அரச உயர் மட்டத்தைச் சேர்ந்த சிலர் உள்ளதாகவும், இது ஒரு வெளிநாட்டு உதவித் திட்டமாக ஒருங்கிணைக்கப்படுவதாகவும் தகவல்கள் கிடைத்துள்ளன. எவ்வித சூழலியல் அல்லது பிரதேச சபையின் கட்டிட அனுமதியுமின்றி இவ்வளவு பெரிய கட்டுமானங்கள் எவ்வாறு முன்னெடுக்கப்படுகின்றன என்பது தீவிர சந்தேகத்தை ஏற்படுத்தியுள்ளது.

நாட்டின் பாதுகாப்பைக் கருத்தில் கொண்டு இந்த விவகாரம் குறித்து பாதுகாப்பு அமைச்சு உடனடியாக விரிவான விசாரணைகளை நடத்த வேண்டும்’ எனவும் அவர் கோரிக்கை விடுத்திருக்கின்றார்.

இந்த அநாமதேய அமைப்பின் குற்றச்சாட்டு தொடர்பில் அரசாங்கத் தரப்பில் பிரதிப் பாதுகாப்பு அமைச்சர் அருண ஜயசேகர கருத்து தெரிவித்திருந்தார். இந்த விடயம் தொடர்பில் விசாரணை ஆரம்பிக்கப்பட்டுள்ளதாக அவர் குறிப்பிட்டிருக்கின்றார்.

குறித்த விடயம் சம்பந்தமாக கருத்து தெரிவித்த பிரதி பாதுகாப்பு அமைச்சர் அருண ஜயசேகர, ‘பளை பிரதேசத்தில் முன்னெடுக்கப்பட்டு வரும் நிர்மாணம் தொடர்பில் எமக்கு தகவல்கள் கிடைக்கப் பெற்றுள்ளன. அதனையடுத்து பொதுமக்கள் பாதுகாப்பு அமைச்சுடன் இணைந்து அது தொடர்பில் விசேட கவனம் செலுத்துவதற்கு நடவடிக்கை எடுக்கப்பட்டுள்ளது. குறித்த விடயம் தொடர்பில் தற்போது விசாரணைகள் ஆரம்பிக்கப்பட்டுள்ள நிலையில் அதிகாரிகள் நேரடியாக சென்று அந்த நிர்மானம் தொடர்பிலான மேலதிக தகவல்களை பெற்றுக் கொள்ளவுள்ளனர்’ என்று குறிப்பிட்டிருக்கின்றார்.

கிளிநொச்சி மாவட்டம், பச்சிளைப்பள்ளி பிரதேசத்துக்குட்பட்ட பளை பகுதியில் புதிதாக கட்டுமானம் கட்டப்படுகின்றமை தொடர்பில், ‘கண்டங்களுக்கிடையேயான மனித உரிமைகள் ஆணையம்’ என்ற அமைப்பின் சார்பில் குற்றம்சாட்டப்பட்டவுடன் அது குறித்து விசாரணை இடம்பெறுவதாக பிரதிப் பாதுகாப்பு அமைச்சர் கூறியுள்ளமையை சிறுபிள்ளைத்தனமான செயற்பாடாகவே பார்க்க வேண்டியுள்ளது.

பளைப் பகுதியில் 49 ஏக்கர் நிலப்பரப்பில் அனுமதி பெறப்படாது மூன்று மாடி கட்டடம் நிர்மாணிக்கப்படுவதாகவும் இங்கு தினமும் 100 முதல் 150 வரையிலான நபர்கள் பணிக்கு வருவதாகவும் இந்த அமைப்பு குற்றம்சாட்டியுள்ளதுடன் அதனை புலிகளின் பயிற்சி முகாமா அல்லது வெடிப் பொருட்களை உற்பத்தி செய்யும் கூடமா என்று கேள்வி எழுப்பியுள்ளமை திட்டமிட்ட வகையில் நாட்டில் பதற்றத்தை ஏற்படுத்தும் முயற்சியாகவே பார்க்கப்பட வேண்டியுள்ளது.

2009ஆம் ஆண்டு மே மாதம் யுத்தம் முடிவுக்குக் கொண்டுவரப்பட்டதையடுத்து வடக்கு, கிழக்கைப் பொறுத்தவரையில் வன்முறைச் சம்பவங்கள் இடம்பெற்றிருக்கவில்லை.

தற்போது தெற்கில் பல்வேறு படுகொலை சம்பவங்கள் இடம்பெற்று வருகின்றன. பாதாள உலகக் குழுக்களுக்கிடையிலான மோதல் என்று கூறி இதனை நியாயப்படுத்தி வரும் அரசாங்கமானது பளையில் கட்டடம் ஒன்று கட்டப்படுகின்றது, அதில் விடுதலைப் புலிகளின் மீளுருவாக்கம் இடம்பெறுகின்றதோ என்று ஓர் அமைப்பு குற்றம்சாட்டியதுடன் அது குறித்து விசாரிப்பதாக கூறுவது வேடிக்கையான விடயமாகவுள்ளவே உள்ளது.

யுத்தம் முடிவுக்குக் கொண்டுவரப்பட்டதன் பின்னர் பல்வேறு சந்தர்ப்பங்களில் இத்தகைய புலிகளின் மீளுருவாக்கம் என்ற கட்டுக்கதைகள் பரப்பப்பட்டு வந்தன. தேர்தல் காலங்களில் தெற்கின் அரசியல் கட்சிகள் தமது சுயநல அரசியலுக்காக இத்தகைய புலி மீளுருவாக்க கதைகளை கூறி வந்திருந்தன.

மீண்டும் புலிகள் உருவாகின்றார்கள், புலம்பெயர்ந்த மக்கள் இதற்கு உதவுகின்றார்கள், இதனால் நாட்டில் பாதுகாப்பை கருத்தில்கொண்டு சிங்கள மக்கள் எம்மை ஆதரிக்க வேண்டும் என்று பல இனவாத கட்சிகள் தேர்தல் காலங்களில் பிரசாரங்களை மேற்கொண்டிருந்தன.

தற்போது தேர்தல் காலமாக இல்லாத போதிலும் மீண்டும் நாட்டில் பதற்றத்தை ஏற்படுத்தி இனங்களுக்கிடையே இனவாதத்தை உருவாக்கும் வகையில் சில சக்திகள் செயற்படுகின்றனவா என்ற சந்தேகத்தை தற்போதைய ‘புலிகளின் மீள் உருவாக்கக் கதை’ ஏற்படுத்துகின்றது.

வடக்கு, கிழக்கைப் பொறுத்தவரையில் யுத்தம் முடிவுக்குக் கொண்டுவரப்பட்டதையடுத்து மாறி மாறி ஆட்சிக்கு வந்த அரசாங்கங்கள் தமிழ் இளைஞர், யுவதிகளின் உணர்வுகளை மழுங்கடிக்கும் வகையிலான செயற்பாடுகளை திட்டமிட்டு மேற்கொண்டு வந்திருந்தன. அதில் ஓரங்கமாகவே வடக்கு, கிழக்கைப் பொறுத்தவரையில் போதைவஸ்து கலாசாரம் பரப்பப்பட்டிருந்தது. தற்போது கூட அத்தகைய செயற்பாடு அங்கு இடம்பெற்றே வருகின்றது.நாட்டில் இடம்பெற்ற கொடூர யுத்தத்தினால் தமிழ் மக்கள் பேரழிவுகளை சந்தித்திருந்தனர். இறுதியுத்தத்தின் போது தமிழ் மக்கள் பல்லாயிரக்கணக்கில் கொன்று குவிக்கப்பட்டிருந்தனர். பெரும் யுத்தக் குற்றங்கள் அரங்கேற்றப்பட்டிருந்தன. இவ்வாறு பேரிழப்புகளை சந்தித்த தமிழ் மக்கள் தற்போது அந்த அனர்த்தங்களின் வடுக்களிலிருந்து மீண்டு வரும் நிலையில் மீண்டும் பதற்றத்தை உருவாக்குவதற்கு செயற்படும் சக்திகளுக்கு அரசாங்கம் ஒருபோதும் இடமளிக்கக் கூடாது.

தேசிய மக்கள் சக்தி அரசாங்கமானது யுத்தத்தால் பாதிக்கப்பட்ட தமிழ் மக்களின் பிரச்சினைகளுக்குத் தீர்வுகாணப்படும் என்று உறுதி வழங்கியிருந்தது. ஆனால், ஆட்சிக்கு வந்து 2 வருடங்களாகின்ற போதிலும் அதற்கான நடவடிக்கைகள் எடுக்கப்படவில்லை.

வடக்கு, கிழக்கைப் பொறுத்தவரையில் கடந்த பாராளுமன்றத் தேர்தலில் தமிழ் மக்கள் தேசிய மக்கள் சக்திக்கு பேராதரவை வழங்கியிருந்தனர். கடந்த கால அரசாங்கங்களை விடவும் தேசிய மக்கள் சக்தி அரசாங்கம் உருவானால் தமது பிரச்சினைகளுக்கு தீர்வு காணப்படும் என்று தமிழ் மக்கள் நம்பியிருந்தனர். அதனால்தான் தேசிய மக்கள் சக்தியை அந்த மக்கள் ஆதரித்திருந்தனர்.

ஆனால், தமிழ் மக்களின் பிரச்சினைகளுக்கு இன்னமும் அரசாங்கம் தீர்வுகாண முயலவில்லை. வெறும் சாக்குபோக்குகளைக் கூறி காலத்தைக் கடத்தும் செயற்பாடே முன்னெடுக்கப்பட்டு வருகின்றது.இந்த சூழ்நிலையில் மீண்டும் வடக்கு, கிழக்கில் புலிகள் மீள் உருவாக்கம் பெறுவதாகவும் அதற்கான நடவடிக்கை எடுக்கப்படுவதாகவும் குற்றம்சாட்டி தெற்கில் பதற்றத்தை ஏற்படுத்துவதற்கு முயற்சி எடுக்கப்படுகின்றது.

இத்தகைய முயற்சிகள் இனங்களுக்கிடையே முரண்பாடுகளை உருவாக்கி மீண்டும் குரோத நிலையை ஏற்படுத்துவதற்கு வழிவகுக்கும்.எனவே, தேசிய மக்கள் சக்தி அரசாங்கமானது இத்தகைய பதற்றத்தை உருவாக்கும் அமைப்புகளின் செயற்பாடுகளுக்கு ஒருபோதும் அனுமதி வழங்கக் கூடாது. இத்தகைய அமைப்புகளின் கட்டுக்கதைகளுக்கு எதிராக நடவடிக்கை எடுக்க வேண்டும் என்று வலியுறுத்த விரும்புகின்றோம்.