அரசியல் தீர்வை அமுல்படுத்துவதற்கு அரசாங்கம் முயற்சிக்காதது ஏன்?

16 Aug, 2026 | 08:35 AM

நீதிபதிகளின் ஓய்வு பெறும் வயதெல்லையை நீடிப்பதற்கான 22ஆவது திருத்தச் சட்டமூலத்தை கடும் எதிர்ப்புகளுக்கு மத்தியில் வர்த்தமானியில் பிரசுரித்துள்ள அரசாங்கம், அதனை நிறைவேற்றுவதற்கு கடும் பிரயத்தனத்தில் ஈடுபட்டு வருகின்றது.

இந்த சட்டமூலத்துக்கு இலங்கை சட்டத்தரணிகள் சங்கம் உட்பட உள்நாட்டு, வெளிநாட்டு நீதித்துறைசார் அமைப்புக்கள் கடும் எதிர்ப்பு தெரிவித்துள்ளன. நாட்டின் நான்கு பெளத்த பீடங்களும் நீதிபதிகளின் ஓய்வு பெறும் வயதெல்லையை நீடிக்கும் விவகாரம் தொடர்பில் தமது அதிருப்தியை வெளிப்படுத்தியிருக்கின்றன. இது குறித்து ஜனாதிபதி அநுரகுமார திசாநாயக்கவுக்கு நான்கு பெளத்த பீடாதிபதிகளும் ஒன்றிணைந்து கடிதமும் அனுப்பியிருந்தனர்.

இதைவிட நாட்டிலுள்ள பிரதான எதிர்க்கட்சியான ஐக்கிய மக்கள் சக்தி உட்பட சகல எதிர்க்கட்சியினரும் இந்த திருத்தச் சட்டமூலத்துக்கு கடுமையான எதிர்ப்பினை தெரிவித்து வருகின்றனர். உயிரைக்கொடுத்தேனும் சட்டத்திருத்ததை நடைமுறைப்படுத்துவதற்கு அனுமதிக்கப் போவதில்லை என்று பொது எதிரணி சார்பில் அதன் இணைப்பாளர் முன்னாள் அமைச்சர் ஜீ.எல். பீரிஸ் அறிவித்திருக்கின்றார்.

இவ்வாறு சர்வதேசத்திலும் உள்ளூரிலும் பெரும் எதிர்ப்புக்கள் கிளம்பியுள்ள நிலையிலும் நீதிபதிகளின் ஓய்வு பெறும் வயதெல்லையை அதிகரிப்பதற்கான திருத்தச் சட்டமூலத்தை நிறைவேற்றும் விடயத்தில் தேசிய மக்கள் சக்தி அரசாங்கம் கங்கணம் கட்டி நிற்கின்றது. நாட்டில் 11 இலட்சம் வழக்குகள் வரையில் தேங்கிக்கிடப்பதாகவும் அந்த வழக்குகளை துரிதப்படுத்த வேண்டுமானால் நீதிபதிகளின் வயதெல்லையை நீடிக்கவேண்டியது அவசியம் என்றும் அரசாங்கம் விளக்கமளித்து வருகின்றது. ஆனால், இத்தகைய ஓய்வுபெறும் வயதெல்லையை அதிகரிக்கும் விவகாரம் நீதித்துறையின் சுயாதீனத்தை இல்லாதொழிக்கும் செயற்பாடு என்று எதிரணியினர் விமர்சித்து வருகின்றனர்.

தற்போது நீதிபதிகளின் பதவிக்காலத்தை நீடிக்கும் வகையிலான 22 ஆவது திருத்தச் சட்டமூலம் வர்த்தமானியில் பிரசுரிக்கப்பட்டிருக்கின்றது. விரைவில் பாராளுமன்றத்தில் அதனை சமர்ப்பித்து நிறைவேற்றுவதற்கு அரசாங்கம் திட்டமிட்டிருக்கின்றது. இந்த சட்டமூலத்தை உயர்நீதிமன்றத்தில் சவாலுக்குட்படுத்த தற்போது பொது எதிரணி நடவடிக்கை எடுத்து வருகின்றது. இதேபோன்றே பல்வேறு அரச சார்பற்ற நிறுவனங்களும் இதனை சவாலுக்கு உட்படுத்துவது தொடர்பில் ஆலோசித்து வருகின்றன.

இந்த சட்டமூலத்தை நிறைவேற்ற வேண்டுமானால் சர்வஜன வாக்கெடுப்பை நடத்த வேண்டும் என்று எதிரணியினர் கோரி வருகின்றனர். சட்டமூலத்தை சவாலுக்குட்படுத்தி உயர்நீதிமன்றத்தை எதிரணியினர் நாடும் போது இதனை பாராளுமன்றத்தில் சாதாரண பெரும்பான்மையுடன் நிறைவேற்ற முடியுமா, அல்லது மூன்றில் இரண்டு பெரும்பான்மையுடன் நிறைவேற்ற முடியுமா, இல்லையேல் இவற்றுடன் சர்வஜன வாக்கெடுப்பை நடத்த வேண்டுமா என்ற தீர்மானம் அறிவிக்கப்படும். இதற்கிணங்க திருத்தச் சட்டமூலத்தை நிறைவேற்றும் என்று அரசாங்கம் தற்போது அறிவித்திருக்கின்றது.

எமது நாட்டின் அரசியலமைப்பைப் பொறுத்தவரையில் இதுவரை 21 திருத்தங்கள் மேற்கொள்ளப்பட்டிருக்கின்றன. 1994 ஆம் ஆண்டுக்கு முன்னர் 17 வருடங்கள் தொடர்ச்சியாக ஐக்கிய தேசியக்கட்சி ஆட்சி செய்து வந்தது. அந்த வேளையில் 13ஆவது திருத்தச் சட்டம் உட்பட பல்வேறு திருத்தங்கள் மேற்கொள்ளப்பட்டிருந்தன.

2010ஆம் ஆண்டு முன்னாள் ஜனாதிபதி மஹிந்த ராஜபக் ஷவின் தலைமையிலான ஐக்கிய மக்கள் சுதந்திர முன்னணி அரசாங்க காலத்தில் 18ஆவது திருத்தம் நிறைவேற்றப்பட்டது. செப்டெம்பர் மாதம் 8ஆம் திகதி இதற்கான விவாதம் பாராளுமன்றத்தில் நடத்தப்பட்டு மூன்றில் இரண்டு பெரும்பான்மையுடன் இந்த திருத்தம் அமுல்படுத்தப்பட்டது. ஜனாதிபதி தேர்தலில் ஒருவர் இரண்டு தடவைகள் மாத்திரமே போட்டியிட முடியும் என்ற விடயம் மாற்றியமைக்கப்பட்டு மூன்று தடவைகளுக்கு மேல் ஒருவர் போட்டியிட முடியும் என்ற சரத்து சேர்க்கப்பட்டது. தான் மூன்றாவது தடவையும் ஜனாதிபதியாக வரவேண்டும் என்ற ஆதங்கத்தை நிறைவேற்றிக் கொள்வதற்காகவே முன்னாள் ஜனாதிபதி மஹிந்த ராஜபக் ஷ இந்த திருத்தத்தை கொண்டு வந்திருந்தார். வெறும் சுயநல அரசியல் நோக்கோடு இந்த 18ஆவது திருத்தம் மேற்கொள்ளப்பட்டிருந்தது.

2015ஆம் ஆண்டு நல்லாட்சி அரசாங்கக் காலத்தில் 19ஆவது திருத்தம் பாராளுமன்றத்தில் நிறைவேற்றப்பட்டது. 18ஆவது திருத்தத்தில் ஒருவர் எத்தனை தடவை வேண்டுமானாலும் ஜனாதிபதி தேர்தலில் போட்டியிட முடியும் என்ற விடயத்தை முடிவுக்கு கொண்டு வரும் வகையிலும் ஜனாதிபதியின் சில அதிகாரங்களை குறைக்கும் முகமாகவும் இந்த திருத்தச் சட்டமூலம் பாராளுமன்றத்தில் நிறைவேற்றப்பட்டிருந்தது.

பின்னர் 2020ஆம் ஆண்டு ஒக்டோபர் மாதம் முன்னாள் ஜனாதிபதி கோட்டாபய ராஜபக் ஷவின் ஆட்சியில் 20 ஆவது திருத்தம் மேற்கொள்ளப்பட்டது. 2022ஆம் ஆண்டு ஒக்டோபர் மாதமளவில் முன்னாள் ஜனாதிபதி ரணில் விக்கிரமசிங்கவின் ஆட்சியில் 21 ஆவது திருத்தம் நிறைவேற்றப்பட்டது. தற்போது தேசிய மக்கள் சக்தியின் ஆட்சியில் 22 ஆவது திருத்த சட்டத்தை நிறைவேற்றிக் கொள்வதற்கு தீவிர பிரயத்தனம் மேற்கொள்ளப்படுகின்றது.

தேசிய மக்கள் சக்தி அரசாங்கமானது ஜனாதிபதி தேர்தலின் போதும் பாராளுமன்ற தேர்தலின்போதும் பல்வேறு வாக்குறுதிகளை வழங்கியிருந்தது. இனப்பிரச்சினைக்கு அரசியல் தீர்வு காணப்படும். யுத்தத்தினால் பாதிக்கப்பட்ட வடக்கு, கிழக்கு மக்களின் பிரச்சினைகளுக்கு தீர்வு காணப்படும், புதிய அரசியலமைப்பை உருவாக்குவதன் மூலம் அரசியல் தீர்வு முன்வைக்கப்படும் என்றெல்லாம் உறுதிமொழிகள் வழங்கப்பட்டன. அரசியல் தீர்வு காணப்படும் வரையில் தற்போது நடைமுறையிலுள்ள மாகாணசபை முறைமை அமுல்படுத்தப்படும் என்றும் வாக்குறுதி வழங்கப்பட்டிருந்தது.

ஆனால், அரசாங்கம் பதவியேற்று இரண்டு வருடங்கள் ஆகின்றபோதிலும் சிறுபான்மை தமிழ், முஸ்லிம் மக்களுக்கு வழங்கிய வாக்குறுதிகள் இதுவரையில் நிறைவேற்றப்படவில்லை.

புதிய அரசியலமைப்பை உருவாக்கும் விடயத்தில் அக்கறையற்ற தன்மை நீடித்துவருகின்றது. நல்லாட்சி அரசாங்கக் காலத்தில் புதிய அரசியலமைப்பை உருவாக்க நடவடிக்கை எடுக்கப்பட்டிருந்தது. அன்றைய பிரதமர் ரணில் விக்கிரமசிங்க தலைமையில் வழிநடத்தல் குழு அமைக்கப்பட்டு பாராளுமன்றத்தில் அங்கத்துவம் வகிக்கும் கட்சிகளின் தலைவர் அந்தக்குழுவில் அங்கத்துவம் வகித்து புதிய அரசியலமைப்பு தொடர்பில் கலந்துரையாடல்கள் மேற்கொள்ளப்பட்டன. இதன்போது இனப்பிரச்சினைக்கான அரசியல் தீர்வாக ஒருமித்த நாட்டுக்குள் மீளப்பெறப்பட முடியாத அதிகாரங்களை மாகாணங்களுக்கு வழங்குவது தொடர்பில் யோசனை முன்வைக்கப்பட்ட இடைக்கால அறிக்கையும் பாராளுமன்றத்தில் சமர்ப்பிக்கப்பட்டு விவாதிக்கப்பட்டிருந்தது.

அன்று அரசியல் தீர்வு தொடர்பில் கலந்துரையாடப்பட்டபோது அன்றைய எதிர்க்கட்சித் தலைவரும் தமிழ்த் தேசியக்கூட்டமைப்பின் தலைவருமான இரா. சம்பந்தன் பல்வேறு விட்டுக்கொடுப்புக்களை மேற்கொண்டு அரசியல் தீர்வுக்கு அடிகோலுவதற்கான முயற்சியை மேற்கொண்டிருந்தார்.

அத்தகைய அரசியல் தீர்வைக் கொண்ட புதிய அரசியலமைப்புக்கான முயற்சியை விட்ட இடத்திலிருந்து ஆரம்பிப்போம் என்றே தேசிய மக்கள் சக்தி வாக்குறுதி வழங்கியிருந்தது. ஆனால், இன்று அந்த விடயம் குறித்து பேசுவதற்குக்கூட அரசாங்கம் தயாராக இல்லாத நிலைமை நீடிக்கின்றது. அண்மையில் ஜனாதிபதி அநுரகுமார திசாநாயக்கவை தமிழ்ப்பேசும் கட்சிகளின் தலைவர்கள் சந்தித்த போது புதிய அரசியலமைப்புக்கான முயற்சியில் காலதாமதம் ஏற்பட்டு விட்டதாகவும் அதற்கான நடவடிக்கை எடுக்கப்படும் என்றும் ஜனாதிபதி உறுதி வழங்கியிருந்தார். ஆனால், அதற்கான முயற்சிகள் எடுக்கப்படுவதாக தெரியவில்லை.

தற்போது நீதிபதிகளின் ஓய்வு பெறும் வயதெல்லையை நீடிப்பதற்கான 22 ஆவது சட்டமூலத்தை நிறைவேற்றிக் கொள்வதற்கு கடும் பிரயத்தனம் செய்யும் அரசாங்கம் புதிய அரசியலமைப்புக்கான முயற்சியையோ அல்லது அரசியல் தீர்வுக்கான நடவடிக்கைகளையோ எடுக்காதிருப்பது கவலைக்குரிய விடயமாகும். தற்போது தெற்கின் கடும் எதிர்ப்புக்களுக்கு மத்தியில் பெளத்த பீடங்களின் ஆலோசனைக்கு மாறாக செயற்பட்டு 22 ஆவது திருத்தத்தை அமுல்படுத்த முனையும் அரசாங்கம் அரசியல் தீர்வை நடைமுறைப்படுத்துவதற்கு இலகுவில் நடவடிக்கைகளை முன்னெடுக்க முடியும். ஆனால், அது குறித்து அக்கறையின்றி அரசாங்கம் செயற்பட்டு வருகின்றது.

தமிழ் மக்களுக்கு அரசியல் தீர்வை வழங்கும் விடயத்தை முன்னெடுத்தால் தெற்கில் எதிர்ப்புக்கள் கிளம்பும் என்று அரசாங்கம் அச்சப்படுவதாகவும் பல்வேறு தரப்பினரும் கருத்துக்களை தெரிவித்திருந்தனர். ஆனால், 22ஆவது திருத்தச் சட்டத்தை தெற்கின் எதிர்ப்புக்களுக்கு மத்தியில் நிறைவேற்றத் துடிக்கும் தேசிய மக்கள் சக்தி அரசாங்கம் அரசியல் தீர்வு முயற்சியையும் தீவிரப்படுத்த முடியும்.

எனவே இனியும் சாக்குப் போக்குகளை கூறாது அரசியல் தீர்வு விடயத்திலும் புதிய அரசியலமைப்புக்கான நடவடிக்கையிலும் அரசாங்கம் அக்கறை காட்ட வேண்டுமென்று வலியுறுத்த விரும்புகின்றோம்.