தவறவிடாதீர்கள்..!உடனே பதிவு செய்யுங்கள்

ஜப்பானின் சிபா மாகாணத்தில் பெய்துவரும் கனமழையால் ஏற்பட்ட கடும் வெள்ளப்பெருக்கு காரணமாக, டோக்கியோவின் நரிட்டா சர்வதேச விமான நிலையத்தில் சுமார் 7,000 பயணிகள் சிக்கித் தவிப்பதுடன், குறைந்தது நால்வர் உயிரிழந்துள்ளதாக சர்வதேச ஊடகங்கள் செய்தி வெளியிட்டுள்ளன.

ஜப்பானின் முக்கிய விடுமுறைக் காலத்தில் ஏற்பட்டுள்ள இந்த வெள்ளப்பெருக்கால் வீதிகள் மற்றும் புகையிரதப் பாதைகள் நீரில் மூழ்கியுள்ளதுடன், போக்குவரத்து மற்றும் மின்சார விநியோகமும் கடுமையாகப் பாதிக்கப்பட்டுள்ளது.

சிபா மாகாணத்தின் சில பகுதிகளில் 24 மணி நேரத்தில் 360 மில்லிமீற்றருக்கும் அதகளவான மழைவீழ்ச்சி பதிவாகியுள்ளதாக தெரிவிக்கப்பட்டுள்ளது.

வெள்ளத்தில் மூழ்கிய வாகனத்தில் சிக்கி ஒருவர் உயிரிழந்தமை உட்பட நால்வர் உயிரிழந்துள்ளதாக உறுதிப்படுத்தப்பட்டுள்ளதுடன், ஒருவர் காணாமல் போயுள்ளதாகவும் தெரிவிக்கப்படுகிறது. மீட்புப் பணிகளில் இராணுவத்தினரும் ஈடுபடுத்தப்பட்டுள்ளனர்.

டோக்கியோ எலெக்ட்ரிக் பவர் நிறுவனத்தின் தரவுகளின்படி, இன்று (14) காலை வரை 22,000க்கும் மேற்பட்ட வீடுகள் மின்சாரமின்றி பாதிக்கப்பட்டுள்ளன.

வீதிகள் மற்றும் புகையிரத சேவைகள் பாதிக்கப்பட்டதால் நரிட்டா விமான நிலையத்தில் சுமார் 7,000 பயணிகள் சிக்கியுள்ளனர். அவர்கள் இரவு முழுவதும் விமான நிலைய முனையங்களில் தங்கியிருந்ததுடன், விமான நிலைய ஊழியர்களால் போர்வைகள் மற்றும் சிற்றுண்டிகள் வழங்கப்பட்டுள்ளன.

நிலைமை சீரடைந்து வருவதால் விமான சேவைகள் வழக்கம்போல் இயங்கும் என விமான நிலைய ஊடகப் பேச்சாளர் தெரிவித்துள்ளார்.

நெடுஞ்சாலைகள் மூடப்பட்டதாலும், புகையிரத சேவைகள் இடைநிறுத்தப்பட்டதாலும் கடும் போக்குவரத்து நெரிசல் ஏற்பட்டுள்ள போதிலும், டோக்கியோவை நரிட்டாவுடன் இணைக்கும் சில புகையிரத சேவைகள் தற்போது மீண்டும் ஆரம்பிக்கப்பட்டுள்ளதாக தெரிவிக்கப்பட்டுள்ளது.

இந்நிலையில், சிபா மாகாண ஆளுநர் தோஷிஹிட்டோ குமாகாய், நிலைமை தொடர்பில் கவலை வெளியிட்டுள்ளார்.