தவறவிடாதீர்கள்..!உடனே பதிவு செய்யுங்கள்

ஆபிரிக்கக் கண்டம் முழுவதிலும் கழுகுகளின் வீழ்ச்சி தற்போது தவிர்க்க முடியாத பெரும் அச்சுறுத்தலாக மாறியுள்ளது. பாரம்பரிய மருத்துவ முறைகள் மற்றும் ஆன்மீகச் சடங்குகளுக்காக கழுகுகள் வேட்டையாடப்படுவதால், பல கழுகு இனங்கள் முற்றாக அழியும் நிலைக்குத் தள்ளப்பட்டுள்ளதாக வனவிலங்கு பாதுகாப்பு அமைப்புகள் எச்சரிக்கின்றன.

சுற்றுச்சூழலில் கழுகுகள் இல்லையெனில், நோய்கள் பரவுவதைத் தடுக்கும் இயற்கை அரண் தகர்ந்துவிடும். இருப்பினும், தென்கிழக்கு நைஜீரியாவின் ஒரு பகுதியில் வாழும் மக்கள் இந்த நிலையை மாற்றி முன்மாதிரியாகத் திகழ்கின்றனர்.

நைஜீரியாவின் அவ்கா-எடிட்டி என்ற கிராமம், 'ந்குமா' (Nguma) என்ற தெய்வத்திற்காக அர்ப்பணிக்கப்பட்ட ஒரு புனிதக் காட்டைக் கொண்டுள்ளது. 

அங்குள்ள பழமையான மரம் ஒன்று பல நூற்றாண்டுகளாக கிராமத்தைப் பாதுகாத்து வருவதாகவும், அதுவே அக்கோவிலின் ஆன்மீக மையமாகவும் மக்களால் நம்பப்படுகிறது.

இப்பகுதியில் வாழும் மக்கள் கழுகுகளை வேட்டையாடுவதில்லை. மாறாக, தெய்வத்திற்குப் படையலிடும்போது கழுகுகள் வந்து அவற்றை உண்பதை நல்வாழ்த்தாகக் கருதுகின்றனர்.

"நாங்கள் படையல் வைத்த பிறகு கழுகுகள் வரவில்லை என்றால், ஆன்மீக உலகில் ஏதோ தவறு நடந்துள்ளது என்பது எங்கள் நம்பிக்கை. கழுகுகள் வந்தால் தெய்வம் எங்கள் வழிபாட்டை ஏற்றுக்கொண்டதாக அர்த்தம்," என்று அப்பகுதியைச் சேர்ந்த சுக்குவேமேகா இக்வே கூறுகிறார்.

கழுகுகளைப் பாதுகாப்பதில் தீவிரமாக ஈடுபட்டு வரும் இவருக்கு, அப்பகுதி மக்கள் "கழுகு ராஜா" (King of Vulture / Ezeudene) என்று செல்லப்பெயர் சூட்டியுள்ளனர்.

அழகற்ற பறவைகளாகக் கருதப்பட்டாலும், இயற்கையின் மிக முக்கிய தூய்மைப் பணியை கழுகுகளே செய்கின்றன.

இறந்த விலங்குகளின் உடல்களைச் சில மணி நேரங்களிலேயே சாப்பிட்டு முடிப்பதன் மூலம், அபாயகரமான பாக்டீரியாக்கள் மற்றும் நோய்கள் பரவுவதை இவை தடுக்கின்றன.

கழுகுகளின் வயிற்றில் உள்ள வீரியமிக்க அமிலம், ஆந்த்ராக்ஸ் மற்றும் வெறிநாய்க்கடி போன்ற ஆபத்தான நோய்க்கிருமிகளையும் பாதுகாப்பாக அழித்துவிடும்.

கழுகுகள் முழுமையாக அழிந்த இடங்களில், விலங்கினங்களிலிருந்து மனிதர்களுக்குப் பரவும் நோய்களின் தாக்குதல் அதிகரித்துள்ளதாக நைஜீரிய வனப் பாதுகாப்பு உயிரியலாளர் ஸ்டெல்லா எக்பே  தெரிவிக்கிறார்.

ஆபிரிக்காவில் கழுகுகளின் எண்ணிக்கை கடந்த 50 ஆண்டுகளில் 80% முதல் 97% வரை சரிந்துள்ளது. 

சர்வதேச இயற்கைப் பாதுகாப்புச் சங்கத்தின் சிவப்புப் பட்டியலில், ஆப்பிரிக்காவின் 7 கழுகு இனங்கள் மிகவும் ஆபத்தான நிலையை அடைந்துள்ளதாகப் பட்டியலிடப்பட்டுள்ளன.

ஆப்பிரிக்காவில் 60% கழுகுகளின் இறப்பிற்கு நச்சுயியல் சார்ந்த காரணங்களே காரணம்.

கழுகுகளின் உடற்பாகங்கள் மூடநம்பிக்கைச் சடங்குகளுக்குப் பயன்படுத்தப்படுகின்றன. நைஜீரியாவில் ஒரு கழுகின் விலை 200,000 நைரா (சுமார் $145) வரை விற்பனையாகிறது.

மெதுவாக இனப்பெருக்கம் செய்யும் இவைகளின் முட்டைகளும் கூடுகளும் கூடத் திருடப்படுகின்றன. 

ஒரு கழுகு 5 முதல் 7 ஆண்டுகளில் பாலின முதிர்ச்சி அடைந்து, 1 அல்லது 2 ஆண்டுகளுக்கு ஒருமுறை மட்டுமே ஒரு குஞ்சைப் பொரிக்கும்.

அவ்கா-எடிட்டி கிராமத்தில், 'கழுகு ராஜா' இக்வே மற்றும் நைஜீரிய வனப்பாதுகாப்பு அறக்கட்டளை  இணைந்து வெளிப்பகுதியினரின் வேட்டையாடுதலைத் தடுத்து வருகின்றனர்.

2017 ஆம் ஆண்டில் வெறும் 20 ஆக இருந்த கழுகுகளின் எண்ணிக்கை, இந்த விழிப்புணர்வு நடவடிக்கைகளால் தற்போது 160 க்கும் அதிகமாக உயர்ந்துள்ளது.

சட்டவிரோதக் கழுகு கடத்தலைத் தடுக்க நைஜீரிய சுங்கத்துறையும் கடுமையான நடவடிக்கைகளை எடுத்து வருகிறது.

சுற்றுச்சூழலை அதன் இயல்பு நிலையில் பேண சமூகக் கூட்டமைப்பும் விழிப்புணர்வுமே மிக முக்கிய சக்தி என்பதை அவ்கா-எடிட்டி கிராமம் நிரூபித்துள்ளது.