தவறவிடாதீர்கள்..!உடனே பதிவு செய்யுங்கள்

(நெவில் அன்தனி)

நடப்பு சம்பியன் புளூ ஸ்டார் கழகத்தக்கும் சீ ஹோக்ஸ் கழகத்துக்கும் இடையில் கொழும்பு சுகததாச விளையாட்டரங்கில்  திங்கட்கிழமை மாலை நடைபெற்ற நான்காம் வார சுப்பர் லீக் கால்பந்தாட்டப் போட்டி வெற்றிதோல்வியின்றி முடிவடைந்தது.

இந்தப் போட்டியில் இரண்டு அணிகளும் கோல் போடவில்லை.

புளூ ஸ்டார் கழகம் ஒரு பெனல்டி உட்பட மேலும் சில கோல் போடும் வாய்ப்புகளைக் கோட்டை விட்டது.

மறுபுறத்தில் சீ ஹோக்ஸ் அணியும் பல கோல் போடும் வாய்ப்புகளைத் தவறவிட்டது.

போதாக்குறைக்கு புளூ ஸ்டார் கழகத்தின் தலைமைப் பயிற்றுநர் உதவி மத்தியஸ்தருடன் வாக்குவாதத்தில் ஈடுபட்டதால் கள மத்தியஸ்தரினால் 2 மஞ்சள் அட்டைகளுடன் சிவப்பு அட்டை காட்டப்பட்டு கடைசி நேரத்தில் வெளியேற்றப்பட்டார்.

எதிர்பார்த்ததைவிட ஆரம்பம் முதல் கடைசிவரை பரபரப்பை ஏற்படுத்திய இப் போட்டியின் 8ஆவது நிமிடத்தில் புளூ ஸ்டார் கழக வீரர் மொஹமத் ஷபானை தனது பெனல்டி எல்லைக்குள் வைத்து சீ ஹோக்ஸ் அணித் தலைவர் மனரம் பெரேரா விதிகளுக்கு முரணான வகையில் வீழ்த்தியதால் புளூ ஸ்டார் கழகத்துக்கு பெனல்டி வழங்கப்பட்டது.

ஆனால் அந்தப் பெனல்டியை புளூ ஸ்டார் அணித் தலைவர் ஜெறி ஒம்பேப் தவறவிட்டார். அவரது  9ஆவது நிமிட  பெனல்டி உதை கோல் குறுக்குக் கம்பத்தில் பட்டு வெளியேறியது.

இதனைத் தொடர்ந்து இரண்டு அணிகளும் கோல் போடுவதற்கு கடுமையாக முயற்சித்தன. ஆனால், இரண்டு அணிகளினதும் முயற்சிகள் தவறிப் போயின அல்லது கோல்காப்பாளர்களால் தடுத்து நிறுத்தப்பட்டன.

இடைவேளைக்குப் பின்னர் இரண்டு அணியினரும் ஆக்ரோஷத்தை வெளிப்படுத்திய போதிலும் கோல் முயற்சிகள் பலனளிக்கவில்லை.

இறுதியில் போட்டி கோல் எதுவும் போடப்படாமல் வெற்றிதோல்வியின்றி முடிவடைந்ததுடன் இரண்டு அணிகளும் தலா ஒரு புள்ளியைப் பெற்றன.