தவறவிடாதீர்கள்..!உடனே பதிவு செய்யுங்கள்

பான் இந்திய நட்சத்திரமான மலையாள நடிகர் ஜெயசூர்யா முதன்மையான வேடத்தில் அழுத்தமான கதாபாத்திரத்தில் நடித்திருக்கும் 'ஓபரேஷன் டிரால்' திரைப்படக் குழுவினருடன் நட்சத்திர நடிகரான முரளி சர்மா இணைந்திருப்பதாக படக் குழு அறிவித்துள்ளது.

இயக்குநர் ரதீஷ் வேகா இயக்கத்தில் உருவாகி வரும் 'ஓபரேஷன் டிரால்' திரைப்படத்தில் ஜெயசூர்யா, ரித்திகா சிங், காவ்யா ஷெட்டி, நந்தலால் கிருஷ்ணமூர்த்தி, வினய் ராய், சித்திக், சாய்குமார், சிராஜுதீன், முரளி சார்மா ஆகியோர் நடிக்கிறார்கள்.

நஜோஸ் ஒளிப்பதிவு செய்து வரும் இந்த திரைப்படத்திற்கு இயக்குநர் ரதீஷ் வேகா இசையமைக்கிறார். உளவுத்துறை நடவடிக்கைகளின் பின்னணியில் குற்ற புலனாய்வு விசாரணையுடன் கூடிய தேச பக்தி படமாக தயாராகும் இந்த திரைப்படத்தை குட்வில் என்டர்டெய்ன்மெண்ட்ஸ்  நிறுவனம் சார்பில் தயாரிப்பாளர் ஜாபி ஜார்ஜ் தயாரிக்கிறார்.

படத்தைப் பற்றி இயக்குநர் விவரிக்கையில், '' இந்தியாவின் வட பகுதியான ஜம்மு காஷ்மீரில் உள்ள டிரால் பகுதியில் இந்திய பாதுகாப்பு படையினருக்கும், பயங்கரவாதிகளுக்கும் இடையே நடைபெற்ற மோதலை தழுவி இப்படத்தின் திரைக்கதை அமைக்கப்பட்டுள்ளது.

இதில் உளவுத்துறை நடவடிக்கைகளும்..  தேசப்பற்றும்... எக்சன் காட்சிகளுடன் இடம் பிடித்துள்ளது'' என்றார்.

மேலும், இந்தத் திரைப்படம் தமிழ், தெலுங்கு ,மலையாளம், கன்னடம், இந்தி ஆகிய மொழிகளில் பான் இந்திய திரைப்படமாக தயாராகிறது.  இப்படக் குழுவினருடன் நடிகர் முரளி சர்மா இணைந்திருப்பதை அவருடைய பிறந்த நாளன்று  படக் குழு அறிவித்துள்ளது.