இந்தியாவின் வலியுறுத்தலும் இலங்கையின் யதார்த்த நிலையும்

09 Aug, 2026 | 03:54 PM

மாகாண சபைத் தேர்தலை விரைவில் நடத்த வேண்டும் என்று ஜனாதிபதி அநுரகுமார திசாநாயக்கவிடம் இந்திய வெளியுறவுச் செயலாளர் விக்ரம் மிஸ்ரி கோரியிருக்கின்றார்.

இலங்கைக்கு கடந்த புதன்கிழமை விஜயம் செய்திருந்த இந்திய வெளியுறவுச் செயலாளர் விக்ரம் மிஸ்ரி, ஜனாதிபதி அநுரகுமார திசாநாயக்கவை அன்றைய தினம் சந்தித்து பேச்சுவார்த்தை நடத்தியிருந்தார். இந்தப் பேச்சுவார்த்தையின் போதே மாகாண சபைத் தேர்தல் நடத்தப்பட வேண்டியதன் அவசியத்தை அவர் வலியுறுத்தியதாக இந்திய உயர்ஸ்தானிகரகம் அறிவித்திருக்கின்றது.

நாட்டில் கடந்த 9 வருடங்களுக்கு மேலாக மாகாண சபைகளுக்கான தேர்தல் நடத்தப்படவில்லை. ஜனாதிபதியின் நேரடி பிரதிநிதியான மாகாண ஆளுநர்களுக்குக் கீழேயே மாகாண சபை நிர்வாகம் செயற்பட்டு வருகின்றது. மக்களின் ஜனநாயக உரிமையை மறுக்கும் வகையில் இத்தகைய செயற்பாடு இடம்பெற்று வருகின்றது.

இதனால்தான் மாகாண சபைத் தேர்தலை நடத்துமாறு தமிழ்த் தேசியக் கட்சிகள் உட்பட பல்வேறு அரசியல் கட்சிகளும் கோரிக்கை விடுத்து வருகின்றன. பிரதான எதிர்க்கட்சியான ஐக்கிய மக்கள் சக்தி உட்பட சகல எதிரணியினரும் மாகாண சபைத் தேர்தல் உடனடியாக நடத்தப்பட வேண்டும் என்ற விடயத்தில் ஒரே கொள்கையையே கொண்டிருக்கின்றனர்.

ஆனால், தேசிய மக்கள் சக்தி அரசாங்கமோ மாகாண சபைத் தேர்தலை நடத்தும் விடயத்தில் இழுத்தடிப்புப் போக்கையே கடைப்பிடித்து வருகின்றது. தாம் ஆட்சிக்கு வந்து ஒரு வருட காலத்துக்குள் மாகாண சபைத் தேர்தலை நடத்துவோம் என்று தேசிய மக்கள் சக்தி வாக்குறுதி வழங்கியிருந்தது. ஆனால், ஆட்சிபீடம் ஏறி இரண்டு வருடங்கள் பூர்த்தியாகவுள்ள நிலையிலும் அது குறித்து தேசிய மக்கள் சக்தி அக்கறை காண்பிப்பதாக இல்லை.

மாகாண சபைத் தேர்தலை எந்த முறைமையில் நடத்துவது என்ற இழுபறி நிலைமை நீடித்து வந்தது. அதனை சாக்குபோக்காகக் கூறி தேர்தலை நடத்துவதை பிற்போட்டு வந்த அரசாங்கம், தற்போது மாகாண சபைத் தேர்தல் தொடர்பில் ஆராய்வதற்கு வெளிவிவகார அமைச்சர் விஜித்த ஹேரத் தலைமையில் பாராளுமன்ற விசேட குழுவொன்றை அமைத்திருக்கின்றது. அந்தக் குழுவில் அங்கம் வகிக்கும் சிறுபான்மைக் கட்சித் தலைவர்களான இரா. சாணக்கியன், நிசாம் காரியப்பர், மனோ கணேசன் ஆகியோர் பழைய முறைமையில் மாகாண சபைத் தேர்தலை உடனடியாக நடத்துமாறும் அதன் பின்னர் புதிய முறைமை தொடர்பில் ஆராய்ந்து தீர்மானம் ஒன்றுக்கு வர முடியும் என்றும் வலியுறுத்தியிருந்தனர்.

ஆனால், அந்தக் கோரிக்கையை பாராளுமன்ற விசேட குழுவின் தலைவர் விஜித்த ஹேரத் ஏற்றுக் கொள்ளவில்லை. இந்தக் குழுவின் பதவிக் காலம் மேலும் மூன்றுமாதம் நீடிக்கப்பட்டு அறிக்கை சமர்ப்பிப்பதற்கு தற்போது அவகாசம் வழங்கப்பட்டிருக்கின்றது.

மாகாண சபைத் தேர்தலை நடத்துவது குறித்து ஆராய நியமிக்கப்பட்டுள்ள இந்தக் குழுவானது தேர்தலை இழுத்தடிப்பதற்கான ஒரு முயற்சி என்றே தமிழ்த் தேசியக் கட்சிகளின் தலைவர்கள் குற்றம்சாட்டி வருகின்றனர்.

இந்த நிலையில்தான் தற்போது இலங்கைக்கு விஜயம் செய்திருந்த இந்தியா வெளிவிவகார செயலாளர் விக்ரம் மிஸ்ரி, ஜனாதிபதி அநுரகுமார திசாநாயக்கவை சந்தித்த போது மாகாண சபைத் தேர்தலின் அவசியத்தை வலியுறுத்தியிருக்கின்றார். இந்தியாவின் இந்த செயற்பாடு வரவேற்கத்தக்கதாகும்.

தேசிய மக்கள் சக்தி அரசாங்கத்தைப் பொறுத்த வரையில் மாகாண சபை தேர்தலை நடத்தும் விடயத்திலோ அல்லது புதிய அரசியலமைப்பை உருவாக்கும் செயற்பாட்டிலோ அக்கறை காண்பிப்பதாக தெரியவில்லை.

இதனால்தான் இலங்கை வந்திருந்த இந்திய வெளியுறவு செயலர் விக்ரம் மிஸ்ரியை சந்தித்த தமிழ்த் தேசியக் கட்சிகளின் தலைவர்கள், புதிய அரசியலமைப்பு விடயத்திலும் மாகாண சபைத் தேர்தல் விடயத்திலும் இந்தியா, இலங்கை அரசாங்கத்துக்கு அழுத்தம் கொடுக்க வேண்டும் என்ற கோரிக்கையை முன்வைத்திருந்தனர்.

இதேபோன்றுதான் தமிழ்ப்பேசும் கட்சிகளின் தலைவர்கள் கடந்த செவ்வாய்க்கிழமை இந்திய உயர்ஸ்தானிகர் சந்தோஷ் ஜாவை சந்தித்து பேசியிருந்த போது மாகாண சபைத் தேர்தலுக்கான அழுத்தத்தை இந்தியா கொடுக்க வேண்டும் என்றும் புதிய அரசியலமைப்பினை உருவாக்குவதற்கான அவசரத்தை எடுத்துக் கூற வேண்டும் என்றும் வலியுறுத்தியிருந்தனர்.

இந்தச் சந்திப்பின் போது இந்திய உயர்ஸ்தானிகர் சந்தோஷ் ஜா, ‘புதிய அரசியலமைப்பு தொடர்பில் தெரிவித்த விடயம் சிந்தனைக்குரியதாக அமைந்திருக்கின்றது. புதிய அரசியலமைப்பு உருவாக்கும் விவகாரத்தில் மிகுந்த அவதானத்துடன் செயற்பட வேண்டும். ஓர் இலக்கை அடைவதற்கான பாதையில் அரைவாசி தூரத்தை கடந்ததன் பின்னர் அதனை புறந்தள்ளி விட்டு மீண்டும் தொடக்கப் புள்ளியில் இருந்து ஆரம்பிப்பது புத்திசாலித்தனமான நகர்வு அல்ல’ என்று தமிழ்ப்பேசும் கட்சிகளின் தலைவர்களிடம் எடுத்துக் கூறியிருக்கின்றார். உயர்ஸ்தானிகரது இந்தக் கருத்து பல்வேறு செய்திகளை கூறுவதாகவே அமைந்திருக்கின்றது.

புதிய அரசியலமைப்பு என்ற பெயரில், அரசியல் தீர்வு தொடர்பில் அரசியலமைப்பில் உள்வாங்கப்பட்டுள்ள 13ஆவது திருத்தச் சட்டத்துக்கு ஆபத்து வந்துவிடுமோ என்று உயர்ஸ்தானிகர் கருதுகின்றாரோ என எண்ணத் தோன்றுகின்றது.

தேசிய மக்கள் சக்தியானது இனப்பிரச்சினைக்கான அரசியல் தீர்வு தொடர்பில் உறுதி வழங்கியிருக்கின்றது. புதிய அரசியலமைப்பினை உருவாக்குவதன் மூலம் அரசியல் தீர்வு காணப்படும் என்றும் அதுவரையில் மாகாண சபை முறைமை அமுல்படுத்தப்படும் என்றும் தேசிய மக்கள் சக்தி தனது ஜனாதிபதி தேர்தல் விஞ்ஞாபனத்தில் உறுதி வழங்கியிருந்தது.

நல்லாட்சி அரசாங்கக் காலத்தில் புதிய அரசியலமைப்பினை உருவாக்க முன்னெடுக்கப்பட்ட நடவடிக்கையினை விட்ட இடத்திலிருந்து ஆரம்பிப்பதன் மூலம் அரசியல் தீர்வை துரிதமாக காண முடியும் என்றும் தேசிய மக்கள் சக்தி சுட்டிக்காட்டியிருந்தது.

ஆனால், தற்போது ஆட்சிக்கு வந்து இரண்டு வருடங்கள் பூர்த்தியாகவுள்ள நிலையிலும் புதிய அரசியலமைப்பு தொடர்பில் எத்தகைய நடவடிக்கைகளும் அரசாங்கத்தால் எடுக்கப்படவில்லை.

கடந்த திங்கட்கிழமை ஜனாதிபதி அநுரகுமார திசாநாயக்கவை தமிழ்ப்பேசும் கட்சிகளின் தலைவர்கள் சந்தித்து பேசியிருந்தனர். இதன்போது மாகாண சபைத் தேர்தலை நடத்த வேண்டியதன் அவசியம் ஜனாதிபதியிடம் வலியுறுத்தப்பட்டிருந்தது. இந்தச் சந்திப்பில் புதிய அரசியலமைப்பினை உருவாக்கும் விடயத்தில் தாமதம் ஏற்பட்டுள்ளதை ஏற்றுக் கொண்ட ஜனாதிபதி அநுரகுமார திசாநாயக்க, புதிய அரசியலமைப்பை உருவாக்க நடவடிக்கை எடுக்கப்படும் என்றும் உறுதி வழங்கியிருக்கின்றார்.

மாகாண சபைத் தேர்தலை நடத்தும் விடயத்தில் ஜனாதிபதி அநுரகுமார திசாநாயக்க உறுதியான நிலைப்பாட்டை இந்தச் சந்திப்பின் போது தெரிவிக்கவில்லை. இதிலிருந்து மாகாண சபைத் தேர்தலை நடத்துவதில் அரசாங்கம் அக்கறையற்றே இருக்கின்றது என்ற விடயம் தெளிவாகின்றது.

மாகாண சபைத் தேர்தலை நடத்துவதற்கு அரசாங்கம் தற்போதைக்கு தயாராக இல்லை. அதேபோன்றே, புதிய அரசியலமைப்பை உருவாக்கும் செயற்பாட்டிலும் அரசாங்கம் அக்கறைகொள்வதாக தெரியவில்லை.

இத்தகைய நிலையில் இந்த விவகாரங்களில் இந்தியாவின் அழுத்தம் என்பது நிச்சயமாக அவசியமானதாகும். தற்போது மாகாண சபைத் தேர்தலை நடத்துவதற்கு நடவடிக்கை எடுக்க வேண்டும் என்று இந்திய வெளியுறவுச் செயலாளர் விக்ரம் மிஸ்ரி வலியுறுத்தியிருக்கின்றார். அதேபோன்றே அரசியல் தீர்வின் அவசியத்தையும் இந்தியா தொடர்ச்சியாக வலியுறுத்த வேண்டும்.

ஏனெனில், இலங்கை இனப்பிரச்சினை விவகாரத்தில் இந்தியாவானது அன்றுதொட்டு தலையீடு செய்தே வந்திருக்கின்றது. இந்தியாவின் தலையீட்டினாலேயே இந்திய – இலங்கை ஒப்பந்தம் 1987ஆம் ஆண்டு கைச்சாத்திடப்பட்டு மாகாண சபை முறைமை அமுலுக்குக் கொண்டுவரப்பட்டது.

மாகாண சபை முறைமை அமுல்படுத்தப்பட்டு 37 வருடங்கள் கடந்து விட்டபோதிலும் இன்னமும் அதனை முழுமையாக நடைமுறைப்படுத்த முடியாத நிலைமை நீடித்து வருகின்றது. 13ஆவது அரசியலமைப்பு திருத்தத்தின் கீழான இந்த மாகாண சபைகளுக்கான அதிகாரங்களைக் கூட இல்லாதொழிக்கும் செயற்பாடே இன்றும் தொடர்ந்து வருகின்றது.

எனவே, இனியாவது மாகாண சபைகளுக்கான தேர்தலை நடத்தி அதிகாரங்களை வழங்குவதற்கும் புதிய அரசியல் தீர்வை உருவாக்குவதற்கும் இந்தியா போதிய அழுத்தங்களை இலங்கை அரசாங்கத்துக்கு வழங்க வேண்டியது அவசியம் என்பதை வலியுறுத்த விரும்புகின்றோம்.