தவறவிடாதீர்கள்..!உடனே பதிவு செய்யுங்கள்

அமெரிக்க ஜனாதிபதி டொனால்ட் ட்ரம்ப் தனது அவசரக்கால அதிகாரங்களைப் பயன்படுத்தி சர்வதேச வர்த்தகப் பங்காளிகள் மீது விதித்த வரிகள் செல்லாது என அந்நாட்டு உச்ச நீதிமன்றம் தீர்ப்பளித்ததைத் தொடர்ந்து, சுமார் 100 பில்லியன் அமெரிக்க டொலர் வரிப் பணம் இறக்குமதியாளர்களுக்குத் திரும்பச் செலுத்தப்பட்டுள்ளதாகக் நீதிமன்றத் தரவுகள் தெரிவிக்கின்றன.

ஜனாதிபதி ட்ரம்ப் 'சர்வதேச அவசரகால பொருளாதார அதிகாரச் சட்டத்தை' பயன்படுத்திப் பல நாடுகளின் இறக்குமதிகள் மீது பரவலான வரிகளை விதித்திருந்தார்.

எனினும், அதிபருக்கு இத்தகைய வரிகளை விதிப்பதற்கு இச்சட்டம் அதிகாரம் அளிக்கவில்லை என்றும், அவர் தனது எல்லை மீறிச் செயல்பட்டுள்ளார் என்றும் கூறி கடந்த பெப்ரவரி மாதம் அமெரிக்க உச்ச நீதிமன்றம் அவ்வரிகளை இரத்து செய்தது.

இதனால், முறையற்ற முறையில் சேகரிக்கப்பட்டதாகக் கருதப்படும் சுமார் 166  பில்லியன் அமெரிக்க டொலர் தொகையில் 60 சதவீதம் நிதி ($100 பில்லியன்) வரை தற்போது இறக்குமதியாளர்களுக்கு மீண்டும் திருப்பியளிக்கப்பட்டுள்ளது.

கடந்த  ஜூலை மாதம் 31 ஆம் திகதி வரையிலான கணக்கீட்டின்படி, அமெரிக்க சுங்கம் மற்றும் எல்லைப் பாதுகாப்புத் துறையினால் 128.68 பில்லியன் அமெரிக்க டொலர் பெறுமதியான திரும்பப் பெறும் கோரிக்கைகள் பரிசீலனைக்கு ஏற்றுக்கொள்ளப்பட்டுள்ளன.  அதில் 100 பில்லியன் அமெரிக்க டொலர் தொகைப் பரிசீலனை முழுமையாக நிறைவு செய்யப்பட்டு, பணம் விநியோகத்திற்காகத் திறைசேரித் திணைக்களத்திற்கு அனுப்பப்பட்டுள்ளது.  

உச்ச நீதிமன்றத்தின் இத்தீர்ப்பு ஜனாதிபதி ட்ரம்பின் வர்த்தகக் கொள்கைகளுக்குப் பாரிய பின்னடைவாக அமைந்த போதிலும், துறை சார்ந்த பிற சட்ட விதிகள் மற்றும் மாற்று சட்ட வாய்ப்புகளைப் பயன்படுத்தி மீண்டும் பல நாடுகளுக்கு புதிய வரிகளை விதிக்கும் முயற்சிகளில் ட்ரம்ப் நிர்வாகம் ஈடுபட்டு வருகிறது.