தவறவிடாதீர்கள்..!உடனே பதிவு செய்யுங்கள்

(நெவில் அன்தனி)

ரங்கிரி தம்புள்ளை சர்வதேச கிரிக்கெட் விளையாட்டரங்கில் செவ்வாய்க்கிழமை நடைபெற்ற கடைசி மகளிர் சர்வதேச ரி20 கிரிக்கெட் போட்டியில் இலங்கையை தனது சுழற்சியால் வீழ்த்திய பாகிஸ்தான் 4 விக்கெட்களால் ஆறுதல் வெற்றியை ஈட்டியது.

ஆனால், ஏற்கனவே முதல் இரண்டு போட்டிகளில் வெற்றி பெற்றிருந்த இலங்கை, 3 போட்டிகள் கொண்ட மகளிர்  சர்வதேச  ரி20 கிரிக்கெட் தொடரை 2 - 1 என்ற ஆட்டங்கள் வித்தியாசத்தில் கைப்பற்றியது.

இதே விளையாட்டரங்கில் நடைபெற்ற முதல் இரண்டு போட்டிகளில் இலங்கை முறையே 4 விக்கெட்களாலும், 6 விக்கெட்களாலும் வெற்றிபெற்றிருந்தது.

கடைசிப் போட்டியில் பாகிஸ்தானின் சுழற்பந்துவீச்சில் இலங்கையின் 6 விக்கெட்கள் வீழ்த்தப்பட்டது. ஆனால், இலங்கை சுழல்பந்துவிச்சாளர்களால் தமது அணியின் 113 ஓட்டங்கள் என்ற மொத்த எண்ணிக்கையைத் தக்கவைக்க முடியாமல் போனது.

இந்தப் போட்டியில் முதலில் துடுப்பெடுத்தாடிய இலங்கை 20 ஓவர்களில் 6 விக்கெட்களை இழந்து 113 ஓட்டங்களை மாத்திரம் பெற்றது.

அணித் தலைவி சமரி அத்தபத்து (34), சஞ்சனா காவிந்தி (20), இமேஷா துலானி (17) ஆகிய மூவரே 15 ஓட்டங்களுக்கு மேல் பெற்றனர்.

மோமினா ரியாசாத் 18 ஓட்டங்களுக்கு 2 விக்கெட்களைக் கைப்பற்றினார்.

பதிலுக்கு துடுப்பெடுத்தாடிய பாகிஸ்தான் 18.2 ஓவர்களில் 6 விக்கெட்களை இழந்து 115 ஓட்டங்களைப் பெற்று வெற்றியீட்டியது.

ஆயேஷா ஸபார் 39 ஓட்டங்களையும் ஷவால் ஸுல்பிகார் 21 ஓட்டங்களையும் அணித் தலைவி முனீபா அலி 19 ஓட்டங்களையும் பெற்றனர்.

பந்துவீச்சில் சமரி அத்தபத்து 20 ஓட்டங்களுக்கு 2 விக்கெட்களையும் கவிஷா டில்ஹாரி 24 ஓட்டங்களுக்கு 2 விக்கெட்களையும் கைப்பற்றினர்.

ஆட்ட நாயகி: ஆயேஷா ஸபார், தொடர் நாயகி: இமேஷா துலானி.