தவறவிடாதீர்கள்..!உடனே பதிவு செய்யுங்கள்

தனது பயனர்களுக்கு பாதுகாப்பான மற்றும் நம்பகமான டிஜிட்டல் சூழலை உருவாக்கும் நோக்கில், டிக்டொக் நிறுவனம் 2026 ஆம் ஆண்டின் முதல் காலாண்டிற்கான (Q1 2026) சமூக வழிகாட்டுதல் அமுலாக்க அறிக்கையை வெளியிட்டுள்ளது.

2026 ஜனவரி முதல் மார்ச் வரையிலான காலப்பகுதியை உள்ளடக்கிய இந்த அறிக்கையின்படி, இலங்கையில் சமூக வழிகாட்டுதல்களை மீறியதாகக் கண்டறியப்பட்ட 4,41,089 வீடியோக்கள் தளத்திலிருந்து நீக்கப்பட்டுள்ளன. இது இலங்கையில் பதிவேற்றப்பட்ட மொத்த வீடியோக்களில் சுமார் 0.5 சதவீதம் ஆகும்.

அகற்றப்பட்ட வீடியோக்களில் 99.1 சதவீதம், பயனர்கள் முறைப்பாடு அளிப்பதற்கு முன்பே டிக்டொக் நிறுவனத்தின் தானியங்கி கண்காணிப்பு அமைப்புகளால் கண்டறியப்பட்டு நீக்கப்பட்டுள்ளன. அவற்றில் 95 சதவீதம் வீடியோக்கள் பதிவேற்றப்பட்ட 24 மணி நேரத்திற்குள் அகற்றப்பட்டுள்ளதாக அறிக்கை தெரிவிக்கிறது.

அதேவேளை, முறையான மறுபரிசீலனைக்குப் பிறகு 20,051 வீடியோக்கள் மீண்டும் தளத்தில் வெளியிட அனுமதிக்கப்பட்டுள்ளன.

உலகளவில் 184 மில்லியனுக்கும் அதிகமான வீடியோக்கள் நீக்கம்

2026 ஆம் ஆண்டின் முதல் காலாண்டில் உலகளவில் 184,012,576 வீடியோக்கள் சமூக வழிகாட்டுதல்களை மீறியதாக நீக்கப்பட்டுள்ளன. இதுவும் மொத்த பதிவேற்றங்களில் சுமார் 0.5 சதவீதம் ஆகும்.

அவற்றில் 178 மில்லியனுக்கும் அதிகமான வீடியோக்கள் செயற்கை நுண்ணறிவு மற்றும் தானியங்கி தொழில்நுட்பங்களின் மூலம் முன்கூட்டியே கண்டறியப்பட்டு அகற்றப்பட்டுள்ளன. பின்னர் மேற்கொள்ளப்பட்ட மறுஆய்வின் அடிப்படையில் 8.8 மில்லியனுக்கும் அதிகமான வீடியோக்கள் மீண்டும் தளத்தில் சேர்க்கப்பட்டுள்ளன.

செயற்கை நுண்ணறிவு கண்காணிப்பு முறை மேலும் மேம்பாடு

செயற்கை நுண்ணறிவு (AI) அடிப்படையிலான உள்ளடக்கக் கண்காணிப்பு தொழில்நுட்பம் தொடர்ந்து மேம்படுத்தப்பட்டதன் விளைவாக, பயனர்கள் பார்ப்பதற்கு முன்பே (Zero Views) பொருத்தமற்ற உள்ளடக்கங்களை கண்டறிந்து அகற்றும் திறன் மேலும் உயர்ந்துள்ளதாக TikTok தெரிவித்துள்ளது.

மேலும், பழைய விதிமீறல் உள்ளடக்கங்களையும் செயற்கை நுண்ணறிவு தொழில்நுட்பம் தற்போது அதிக துல்லியத்துடன் கண்டறிந்து அகற்றுவதாக குறிப்பிடப்பட்டுள்ளது.

போலி கணக்குகள் மற்றும் சிறுவர்களின் கணக்குகள் முடக்கம்

தளத்தின் பாதுகாப்பை உறுதி செய்யும் நடவடிக்கையாக, இந்த காலாண்டில் உலகளவில் 86.2 மில்லியனுக்கும் அதிகமான போலி கணக்குகள் நீக்கப்பட்டுள்ளன.

அதேபோன்று, 13 வயதிற்குக் குறைவான சிறுவர்களுடையதாக சந்தேகிக்கப்பட்ட 25.7 மில்லியனுக்கும் அதிகமான கணக்குகளும் முடக்கப்பட்டுள்ளதாக அறிக்கையில் தெரிவிக்கப்பட்டுள்ளது.

எந்த வகை உள்ளடக்கங்கள் அதிகம் நீக்கப்பட்டன?

அறிக்கையின்படி, நீக்கப்பட்ட வீடியோக்களில்:

* 18.6% – முக்கியமான அல்லது முதிர்ந்த (Sensitive/Mature) உள்ளடக்கங்கள்

* 16.5% – அபாயகரமான நடவடிக்கைகள் மற்றும் சவால்கள்

* 12.9% – நிர்வாணம் அல்லது பாலியல் சார்ந்த உள்ளடக்கங்கள்

* 12.6% – தளத்தின் பாதுகாப்பு மற்றும் நாகரிக தரங்களை மீறும் பதிவுகள்

* 2.1% – செயற்கை நுண்ணறிவு மூலம் உருவாக்கப்பட்ட அல்லது திருத்தப்பட்ட (AI Generated/Edited Media) உள்ளடக்கங்கள்

வெளிப்படைத்தன்மையை வலியுறுத்தும் டிக்டொக்

இவ்வாறான சமூக வழிகாட்டுதல் அமுலாக்க அறிக்கைகளை காலந்தோறும் வெளியிடுவதன் மூலம், தளத்தில் எடுக்கப்படும் நடவடிக்கைகள் குறித்து முழுமையான வெளிப்படைத்தன்மையை உறுதி செய்வதே நிறுவனத்தின் நோக்கமாகும் என டிக்டொக் தெரிவித்துள்ளது.

மேலும், சமூக வழிகாட்டுதல்கள், பாதுகாப்பு கொள்கைகள் மற்றும் உள்ளடக்கக் கட்டுப்பாட்டு நடைமுறைகள் தொடர்பான விரிவான தகவல்கள் டிக்டொக்கின் வெளிப்படைத்தன்மை நிலையம் மூலம் பொதுமக்களுக்கு கிடைக்கின்றன எனவும் நிறுவனம் குறிப்பிட்டுள்ளது.