தவறவிடாதீர்கள்..!உடனே பதிவு செய்யுங்கள்

(க.சிவலிங்கமூர்த்தி)

நாட்டில் தற்போது அதிகரித்து வரும் பாரதூரமான டெங்கு ஆபத்தைக் கட்டுப்படுத்துவதற்கு அரசாங்கமும் சுகாதார அமைச்சும் துரித நடவடிக்கைகளை உடனடியாக முன்னெடுக்க வேண்டும் என மருத்துவ மற்றும் சிவில் உரிமைகளுக்கான மருத்துவர்களின் தொழிற்சங்க கூட்டமைப்பின் தலைவர் விசேட மருத்துவ நிபுணர் சமல் சஞ்சீவ வலியுறுத்தியுள்ளார்.

கொழும்பில் சனிக்கிழமை (11) நடைபெற்ற ஊடகவியலாளர் சந்திப்பில் கலந்து கொண்டு கருத்து தெரிவிக்கும் போதே அவர் மேற்கண்டவாறு தெரிவித்துள்ளார்.

அவர் அங்கு மேலும் தெரிவிக்கையில்,

நாட்டின் டெங்கு கட்டுப்பாட்டு வேலைத்திட்டமானது குதிரை ஓடிய பின்னர் லாயத்தைப் பூட்டுகின்ற ஒரு நிலைக்குத் தள்ளப்பட்டுள்ளது. கடந்த 30 வருடங்களாக நம் நாட்டு சுகாதாரக் கட்டமைப்பானது வருடாந்தம் ஏற்படுகின்ற டெங்கு நோயாளர்களின் உச்சக்கட்ட அதிகரிப்பை முறையாகக் கட்டுப்படுத்துவதற்குத் தவறியுள்ளது. உலக நாடுகள் பயன்படுத்தும் பொதுச் சுகாதார அறிவியல் மற்றும் நவீன தொழில்நுட்பம் சார்ந்த ஒருங்கிணைந்த வேலைத்திட்டத்தை நாம் செயற்படுத்த வேண்டும் என்று முன்கூட்டியே எச்சரித்திருந்தோம். எனினும், தொழில்நுட்பங்கள் தேவையில்லை என ஒரு வாரத்துக்கு முன் கூறிய சுகாதார அமைச்சர், தற்போது நவீன தொழில்நுட்ப முறைகளை நாட்டுக்குள் கொண்டு வரப் போவதாகக் கூறி தனது நிலைப்பாட்டை மாற்றியுள்ளார்.

இந்த அலட்சியத்தின் பயங்கரமான விளைவை இன்று ஒட்டுமொத்த நாடும் அனுபவித்து வருகின்றது. மருத்துவமனைகளில் ஒரு கட்டிலில் 4 அல்லது 5 நோயாளர்கள் வரை இருக்க வேண்டிய அவல நிலை ஏற்பட்டுள்ளதுடன், பலர் தரையிலேயே தங்கியுள்ளனர். சலைன் போத்தல்களைத் தொங்கவிடுவதற்கு உரிய கம்பிகள் கூட இல்லாததால், சுவர்களில் ஆணிகளை அடித்து சலைன் செலுத்துகின்ற நிலைமை காணப்படுகின்றது. சில மருத்துவமனைகளில் டெங்கு பரிசோதனைகளைக்கூட செய்துகொள்ள முடியாமல் மக்கள் வெளியிலுள்ள ஆய்வகங்களில் 1200 முதல் 2000 ரூபா வரை செலவழிக்க வேண்டியுள்ளது. மருந்துத் தட்டுப்பாடு மற்றும் ஊழியர் பற்றாக்குறை காரணமாகப் பெருமளவான சுகாதார ஊழியர்களும், பயிற்சி பெறும் செவிலியர்களும் மருத்துவ மாணவர்களும்கூட டெங்கு நோய்க்கு ஆளாகியுள்ளனர்.

தற்போது அதிகாரப்பூர்வமாக டெங்கு நோயாளர்களின் எண்ணிக்கை 70000 ஐயும், மரணங்கள் 50 ஐயும் நெருங்கியுள்ளன. எனினும், அறிக்கை செய்யப்படாத நோயாளர்களின் எண்ணிக்கையையும் கணக்கில் எடுத்தால், இந்த ஒட்டுமொத்தப் பாதிப்பு அதிகாரப்பூர்வ எண்ணிக்கையை விட மேலும் 1.5 மடங்கு அதிகமாக இருக்கும். தற்போதைய சூழ்நிலையானது சாதாரண நிலையைத் தாண்டிச் சென்றுள்ளதால், அரசாங்கம் உடனடியாகத் தலையிட்டு இதனை மேலாண்மை செய்ய வேண்டும். வெறும் சுற்றறிக்கைகளை வெளியிட்டு, புத்தகத்திலுள்ள பழைய வழிமுறைகளின்படி இனி டெங்கு நோயைக் கட்டுப்படுத்த முடியாது. இந்த விடயம் குறித்து முழுமையான புரிதலைக் கொண்டுள்ள இலங்கை மருத்துவ சங்கம் மற்றும் விசேட மருத்துவ நிபுணர்களுடன் சுகாதார அமைச்சு முறையான கலந்துரையாடல்களை நடத்தவில்லை.

இன்று கொழும்பு, மகரகம, தெஹிவளை கல்கிசை, காலி மற்றும் போபே பொத்தல உள்ளிட்ட முக்கிய பல உள்ளூராட்சி எல்லைகளுக்குள், குறிப்பாகக் கராப்பிட்டிய மருத்துவமனை உள்ளிட்ட மருத்துவ வளாகங்களைச் சுற்றியே பெருமளவில் குப்பைகள் குவிந்து கிடக்கின்றன. அத்துடன் பாடசாலைகள், பல்கலைக்கழகங்கள் மற்றும் கட்டுமானப் பகுதிகளிலும் கொசுக்கள் பெருகும் இடங்கள் தாராளமாகக் காணப்படுகின்றன.

இதன் காரணமாக, டெங்கு ஆபத்து அதிகமாக உள்ளதாக அடையாளம் காணப்பட்டுள்ள வலயங்களிலுள்ள பாடசாலைகள், பல்கலைக்கழகங்கள் மற்றும் தொழிற்பயிற்சி நிறுவனங்களை ஆகக்குறைந்தது இரண்டு வார காலத்துக்காவது மூடிவிட்டு, இந்தத் தூய்மைப்படுத்தும் வேலைத்திட்டங்களை முறையாகச் செயற்படுத்த வேண்டும். ஒரு அப்பாவிப் பிள்ளையின் உயிரிழப்பு அந்தந்தக் குடும்பங்களை மாத்திரமன்றி, நாட்டின் மனிதவளத்தையும் பொருளாதாரத்தையும் கடுமையாகப் பாதிக்கும். எனவே, இந்த நிலைமையைத் தட்டையாக எடுத்துக்கொண்டு, நீர்கொழும்பு சிறைச்சாலையில் நடந்ததைப் போல ஏதோ ஒன்று நடக்கும் வரை வேடிக்கை பார்த்துக் கொண்டிருக்கப் போகின்றோம் என்றால், நமக்குச் சுகாதார அமைச்சர் என்று ஒருவர் தேவையற்றதாகும் என்றார்.