தவறவிடாதீர்கள்..!உடனே பதிவு செய்யுங்கள்

சீனா தனது விண்வெளி தொழில்நுட்ப வளர்ச்சியில் முக்கியமான முன்னேற்றமொன்றை பதிவு செய்துள்ளது. சுற்றுப்பாதை ஏவுதல் சோதனையின் போது ஏவுகணை (carrier rocket) ஒன்றின் முதல் கட்டத்தை வெற்றிகரமாக மீட்டுள்ளதாக அந்நாட்டு அரச ஊடகங்கள் தெரிவித்துள்ளன.

மீள்பயன்படுத்தக்கூடிய ரொக்கெட் தொழில்நுட்பத்தில் அமெரிக்க நிறுவனங்களுக்கு நிகராக முன்னேற முயற்சிக்கும் சீனாவின் விண்வெளித் திட்டத்தில் இது ஒரு முக்கிய மைல்கல்லாக கருதப்படுகிறது.

சீனாவின் தென்பகுதியில் அமைந்துள்ள ஹைனான் தீவிலிருந்து வெள்ளிக்கிழமை (10)  Long March 10B rocket விண்ணில் ஏவப்பட்டது. ஏவுதளத்திலிருந்து புறப்பட்ட சுமார் ஆறு நிமிடங்களுக்குப் பின்னர், ரொக்கெட்டின் முதல் கட்ட பூஸ்டர் பகுதி, மேல் கட்டத்திலிருந்து பிரிந்து, மிதக்கும் தளமொன்றில் செங்குத்தாக வெற்றிகரமாக தரையிறங்கியது.

இந்த தரையிறக்கத்தின் காணொளிகள் சீன அரச ஊடகமான China Central Television (CCTV) உடன் தொடர்புடைய சமூக ஊடக பக்கங்களில் வெளியிடப்பட்டுள்ளன. அதில், புகை வெளியேறிய நிலையில் பூஸ்டர் மெதுவாக கீழிறங்கி தளத்தில் தரையிறங்குவது காணப்பட்டது.

இந்த வெற்றிகரமான சோதனை, விண்வெளி ஆய்வு, விண்வெளிப் பயணம் மற்றும் செயற்கைக்கோள் கட்டமைப்பு மேம்பாட்டில் முக்கியத்துவம் வாய்ந்த மீள்பயன்பாட்டு ரொக்கெட் திறன்களை சீனா மேம்படுத்தி வருவதை வெளிப்படுத்துகிறது.

China Aerospace Science and Technology Corporation வெளியிட்ட அறிக்கையில், “இந்தப் பணி சீனாவின் மீள்பயன்பாட்டு ரொக்கெட் தொழில்நுட்பத்தில் வரலாற்று முன்னேற்றத்தையும், விண்வெளி அணுகல் திறன்களை விரைவாக மேம்படுத்துவதற்கான வலுவான அடித்தளத்தையும் உருவாக்கியுள்ளது” என தெரிவிக்கப்பட்டுள்ளது.

இந்தப் பணியின் போது ஒரு செயற்கைக்கோளும் வெற்றிகரமாக சுற்றுப்பாதையில் நிலைநிறுத்தப்பட்டதாக சீன அரச ஊடகங்கள் தெரிவித்துள்ளன.

கடந்த சில மாதங்களில் சீனாவின் பல்வேறு விண்வெளி நிறுவனங்கள் மீள்பயன்பாட்டு ஏவுதல் தொழில்நுட்பத்தை உருவாக்கும் போட்டியில் ஈடுபட்டு வந்த நிலையில், சில சோதனைகள் தோல்வியடைந்திருந்தன. அதனைத் தொடர்ந்து இந்த வெற்றி முக்கியமான முன்னேற்றமாக பார்க்கப்படுகிறது.

சீனா தன்னை ஒரு “வலுவான விண்வெளி நாடாக” உருவாக்கும் இலக்குடன், அரச விண்வெளித் திட்டங்களுடன் இணைந்து தனியார் விண்வெளித் துறையையும் ஊக்குவித்து வருகிறது.

மீள்பயன்பாட்டு ரொக்கெட் தொழில்நுட்பம் மூலம் விண்வெளி ஏவுதல்களின் செலவையும், புதிய ஏவுதல்களுக்கு தேவையான காலத்தையும் கணிசமாக குறைக்க முடியும். மேலும், விண்வெளி துறையானது பாதுகாப்பு மற்றும் இராணுவ திறன்களுடன் அதிகமாக தொடர்புபடும் நிலையில், இது நாடுகளுக்கு மூலோபாய முக்கியத்துவத்தையும் வழங்குகிறது.

அமெரிக்காவின் SpaceX நிறுவனம், Elon Musk தலைமையில், சுமார் ஒரு தசாப்தத்திற்கு முன்பே ரொக்கெட் பூஸ்டர்களை மீண்டும் தரையிறக்கி பயன்படுத்தும் தொழில்நுட்பத்தில் முன்னிலை பெற்றது. தற்போது உலகளாவிய விண்வெளி ஏவுதல் சந்தையில் முக்கிய ஆதிக்கத்தை வகித்து வருகிறது.

அதேபோல், Blue Origin நிறுவனம் கடந்த ஆண்டு நவம்பரில் தனது New Glenn rocket ரொக்கெட்டின் முதல் கட்டத்தை வெற்றிகரமாக தரையிறக்கியது.

சீனாவின் Long March-10 rocket series திட்டம், மனிதர்களை நிலவுக்கு அனுப்பும் எதிர்கால விண்வெளி திட்டங்களில் முக்கிய பங்காற்றும் வகையில் வடிவமைக்கப்பட்டுள்ளது.