தவறவிடாதீர்கள்..!உடனே பதிவு செய்யுங்கள்

அமெரிக்காவின் 250ஆவது சுதந்திர தினத்தை முன்னிட்டு, இலங்கையிலுள்ள அமெரிக்கத் தூதரகம் 'Freedom 250' என்ற பெயரில் அமெரிக்க சினிமாவை மையப்படுத்திய பிரம்மாண்டமான கொண்டாட்டத்தை ஏற்பாடு செய்தது.

இந்த நிகழ்வில் பிரதம விருந்தினராக சுகாதார மற்றும் வெகுஜன ஊடக அமைச்சர் நளிந்த ஜயதிஸ்ஸ கலந்து கொண்டார். மேலும் அரச அதிகாரிகள், வர்த்தகத் தலைவர்கள், இராஜதந்திரிகள், இலங்கை - அமெரிக்க உறவுகளுடன் தொடர்புடைய பல்வேறு தரப்பினரும் நூற்றுக்கணக்கான விருந்தினர்களும் நிகழ்வில் பங்கேற்றனர்.

இரண்டரை நூற்றாண்டுகளாக அமெரிக்காவை வழிநடத்தி வரும் தனிநபர் சுதந்திரம், கருத்துச் சுதந்திரம், தன்னாட்சி மற்றும் கனவுகளை நனவாக்கும் சுதந்திரம் போன்ற அடிப்படை விழுமியங்களை இந்த நிகழ்வு பிரதிபலித்தது. அதேவேளை, அமெரிக்க திரைப்படங்கள் உலகம் முழுவதும் சுதந்திரத்தின் கருத்தை எவ்வாறு எடுத்துச் சென்றுள்ளன என்பதையும் காட்சிப்படுத்தியது.

நிகழ்வில் வருகை தந்தவர்களை வரவேற்று உரையாற்றிய தூதரக விவகாரங்களுக்கான பொறுப்பாளர் Jane Howell, அமெரிக்க சினிமா என்பது உலகிற்கு அமெரிக்கா வழங்கிய மிகப்பெரிய கலாசாரப் பங்களிப்புகளில் ஒன்றாகும் என்று குறிப்பிட்டார்.

ஒரு நூற்றாண்டுக்கும் மேலாக, எல்லைகளையும் கலாசாரங்களையும் தாண்டி மனிதர்களை இணைக்கும் கதைகளை அமெரிக்க திரைப்படங்கள் உருவாக்கி வருவதாக அவர் தெரிவித்தார். 'Snow White and the Seven Dwarfs', The Godfather, Avatar, Star Wars, Jurassic Park உள்ளிட்ட திரைப்படங்கள் தொழில்நுட்பத்திலும் கதை சொல்லலிலும் புதிய பரிணாமத்தை ஏற்படுத்தியதாக அவர் சுட்டிக்காட்டினார்.

அதேபோல், இலங்கையில் படமாக்கப்பட்ட The Bridge on the River Kwai திரைப்படம் ஹொலிவுட் வரலாற்றுடன் இலங்கையை நிரந்தரமாக இணைத்துள்ளதாகவும் அவர் குறிப்பிட்டார்.

மேலும், The Wizard of Oz, The Avengers, E.T. the Extra-Terrestrial, Apollo 11 Moon Landing தொடர்பான திரைப்படங்கள் மற்றும் Forrest Gump போன்ற படைப்புகள் மனித தைரியம், ஒற்றுமை, புதுமை மற்றும் மீண்டெழும் மனப்பாங்கை உலகிற்கு எடுத்துரைத்துள்ளதாக அவர் தெரிவித்தார்.

நிகழ்வின் முக்கிய அம்சமாக, அமெரிக்கத் தூதரகக் கட்டிடத்தின் வெளிப்புறத்தில் 250 ஆண்டுகால அமெரிக்க சுதந்திர வரலாற்றையும், அமெரிக்க திரைப்பட உலகின் வளர்ச்சியையும் பிரதிபலிக்கும் ஒளி மற்றும் காணொளிக் காட்சிகள் திரையிடப்பட்டன.

ஆரம்பகால ஊமைப்படங்களிலிருந்து, டிஸ்னியின் முதல் முழுநீள அனிமேஷன் திரைப்படமான 'Snow White and the Seven Dwarfs', The Matrix திரைப்படத்தின் 'Bullet Time' தொழில்நுட்பம் மற்றும் Christopher Nolan இயக்கிய The Dark Knight வரை அமெரிக்க சினிமாவின் பரிணாம வளர்ச்சி காட்சிப்படுத்தப்பட்டது.

இறுதியில், ஜப்பானின் ஒக்கினாவாவைத் தளமாகக் கொண்ட III Marine Expeditionary Force Band இசைக்குழுவின் இசை நிகழ்ச்சி மற்றும் வாணவேடிக்கையுடன் கொண்டாட்டம் நிறைவடைந்தது. விருந்தினர்களுக்கு அமெரிக்க உயர்தர மாட்டிறைச்சி உள்ளிட்ட பல்வேறு அமெரிக்க உணவு மற்றும் பான வகைகளும் பரிமாறப்பட்டன.

இந்த நிகழ்வின் மூலம், சுதந்திரம் மனித ஆற்றலை வெளிக்கொணர்கிறது, புதுமையையும் படைப்பாற்றலையும் ஊக்குவிக்கிறது, மேலும் சிறந்த எதிர்காலத்தை உருவாக்க மக்களை வலுப்படுத்துகிறது என்ற அமெரிக்காவின் அடிப்படை கொள்கையை 'Freedom 250' கொண்டாட்டம் உலகிற்கு மீண்டும் எடுத்துரைத்தது.

அத்துடன், கல்வி, வர்த்தகம், முதலீடு, பாதுகாப்பு ஒத்துழைப்பு மற்றும் மக்களுக்கிடையேயான உறவுகள் ஆகிய துறைகளில் அமெரிக்கா–இலங்கை உறவை மேலும் வலுப்படுத்தும் உறுதிப்பாட்டையும் இந்நிகழ்வு வெளிப்படுத்தியது.