தவறவிடாதீர்கள்..!உடனே பதிவு செய்யுங்கள்

நாட்டின் இருவேறு பகுதிகளில், நேற்று வெள்ளிக்கிழமை (12) இடம்பெற்ற விபத்துக்களில் இருவர் உயிரிழந்துள்ளதுடன் ஒருவர் காயமடைந்துள்ளதாக பொலிஸார் தெரிவித்துள்ளனர்.

அதன்படி, வாரியப்பொல பொலிஸ் பிரிவிற்குட்பட்ட குருணாகல் - புத்தளம் வீதியின் ஹேரத்கம சந்திக்கருகில் பஸ் ஒன்று பாதசாரி மீது மோதி விபத்துக்குள்ளானதில் ஒருவர் உயிரிழந்துள்ளதுடன், சிறுவன் ஒருவன் காயமடைந்துள்ளதாக பொலிஸார் தெரிவித்துள்ளனர்.

05 வயது சிறுவனை கைகளில் ஏந்தியவாறு பாதசாரி ஒருவர் வீதியைக் கடக்க முயன்ற போதே, புத்தளம் நோக்கி பயணித்த பஸ் மோதி இந்த விபத்து நேர்ந்துள்ளது.

விபத்தில் காயமடைந்த இருவரும் நிக்கவெரட்டிய வைத்தியசாலையில் அனுமதிக்கப்பட்டு சிகிச்சை பெற்று வந்த நிலையில் பாதசாரி உயிரிழந்துள்ளார். அத்துடன் காயமடைந்த சிறுவன் மேலதிக சிகிச்சைகளுக்காக குருணாகல் வைத்தியசாலைக்கு மாற்றப்பட்டுள்ளார்.

இவ்விபத்தில் அவுலேகம பகுதியைச் சேர்ந்த 40 வயதுடைய நபர் ஒருவரே உயிரிழந்துள்ளார். விபத்துடன் தொடர்புடைய பஸ்ஸின் சாரதி கைது செய்யப்பட்டுள்ளார்.

இதேவேளை, வாகரை பொலிஸ் பிரிவிற்குட்பட்ட மட்டக்களப்பு - திருகோணமலை வீதியின் கஜவத்த பகுதியில், இரண்டு லாரிகள் மோதி விபத்துக்குள்ளானதில் லொரியின் உதவியாளர் ஒருவர் உயிரிழந்துள்ளார்.

மட்டக்களப்பில் இருந்து திருகோணமலை நோக்கி பயணித்த லொரி ஒன்று, வீதியோரமாக நிறுத்தப்பட்டிருந்த மற்றொரு லொரியின் பின்புறத்தில் மோதியதில் இந்த விபத்து நேர்ந்துள்ளது.

இந்த விபத்தில் லொரியின் உதவியாளர் பலத்த காயமடைந்து வாகரை வைத்தியசாலையில் அனுமதிக்கப்பட்ட பின்னர் சிகிச்சை பலனின்றி உயிரிழந்துள்ளார்.

உயிரிழந்தவர் கெட்டியமுல்ல, அலவத்துர பகுதியைச் சேர்ந்த 46 வயதுடையவர் என அடையாளம் காணப்பட்டுள்ளார். 

இந்த விபத்துக்கள் தொடர்பான மேலதிக விசாரணைகளில் பொலிஸார் ஈடுபட்டு வருகின்றனர்.