தவறவிடாதீர்கள்..!உடனே பதிவு செய்யுங்கள்

தமிழ் திரையுலகில் வளர்ந்து வரும் நடிகரான சனத் கதையின் நாயகனாக நடித்திருக்கும் 'ஹார்ட்டின்' படத்தில் இடம்பெற்ற 'ஒரு நொடி..' எனும் பாடலும், பாடலுக்கான லிரிக்கல் விடியோவும் வெளியிடப்பட்டிருக்கிறது.

இந்த பாடல் வெளியான குறுகிய கால அவகாசத்திற்குள் மூன்று மில்லியனுக்கும் மேற்பட்ட பார்வையாளர்களால் பார்வையிடப்பட்டு சாதனை படைத்து வருகிறது.

இயக்குநர் கிஷோர் குமார் இயக்கத்தில் உருவாகியுள்ள 'ஹார்ட்டின்' திரைப்படத்தில் சனத், மடோனா செபஸ்டியன், ரி. இமையா, 'வாஸ் அப் ' மணி, டெப்னிதா கர் உள்ளிட்ட பலர் நடித்திருக்கிறார்கள்.

முகேஸ் ஒளிப்பதிவு செய்திருக்கும் இந்த திரைப்படத்திற்கு ராஜேஷ் முருகேசன் இசையமைத்திருக்கிறார். ரொமாண்டிக் என்டர்டெய்னராக தயாராகி இருக்கும் இந்த திரைப்படத்தை டிரைடன்ட் ஆர்ட்ஸ் மற்றும் ஸ்டெப் ஒன் ஸ்டுடியோஸ் ஆகிய நிறுவனங்கள் இணைந்து தயாரித்திருக்கிறது.

அனைத்து பணிகளும் நிறைவடைந்து விரைவில் வெளியிட திட்டமிடப்பட்டு வரும் 'ஹார்ட்டின்' திரைப்படத்தில் இடம்பெற்ற 'ஒரு நொடி முடியும் முன் தொலைகிறேன் என் காதலே..' எனத் தொடங்கும் பாடலும், பாடலுக்கான லிரிக்கல் விடியோவும் வெளியிடப்பட்டிருக்கிறது. இந்த பாடலை பாடலாசிரியர் மோகன் ராஜா எழுத ,பின்னணி பாடகர் ஆனந்த் அரவிந்தாக்ஷன் பாடியிருக்கிறார்.

ஒரு பெண்ணை பார்த்ததும் முதன்முதலாக ஆணுக்குள் எழும் காதல் உணர்வை மெல்லிசையுடன் விவரிக்கும் இந்த பாடல்.. அனைத்து தரப்பு ரசிகர்களையும் வெகுவாக கவர்ந்திருக்கிறது.