தவறவிடாதீர்கள்..!உடனே பதிவு செய்யுங்கள்

நீர்ப்பாசனத் திணைக்களத்தின் கீழ் நிர்வகிக்கப்படும் நாட்டின் 73 பிரதான நீர்த்தேக்கங்களின் மொத்த நீர்க்கொள்ளளவு தற்போது 63 சதவீதத்தை எட்டியுள்ளதாக நீர்ப்பாசனத்  திணைக்கள அதிகாரிகள் தெரிவித்துள்ளனர். 

இதன் மூலம் தற்போது ஆரம்பமாகியுள்ள 'யால' சிறுபோகப் பயிர்ச்செய்கைக்கான நீர்த்தேவைகள் எவ்வித தடையுமின்றி முழுமையாகப் பூர்த்தி செய்யப்பட்டுள்ளதாக நீர்ப்பாசனத்  திணைக்களம் சுட்டிக்காட்டியுள்ளது.

மேலும் திணைக்களத்தின் தரவுகளின்படி, நாட்டின் பெரும்பாலான மாவட்டங்களில் நீர்த்தேக்கங்களின் நீர்மட்டம் மிகவும் சாதகமான மட்டத்தில் காணப்படுவதாக தெரிவித்துள்ளது.

நாட்டின் பல்வேறு மாவட்டங்களில் உள்ள பிரதான நீர்த்தேக்கங்களின் தற்போதைய நீர்மட்ட விபரம் பின்வருமாறு,

கண்டி மற்றும் புத்தளம் மாவட்டங்கள் தலா 93% என அதிகபட்ச நிலையைப் பதிவு செய்துள்ளன. குருநாகல் 86% ஆகவும், அனுராதபுரம் 81% ஆகவும் காணப்படுகின்றன. மொனராகலை மற்றும் மன்னார் மாவட்டங்கள் 76% வீதம் பெற்றுள்ளன. பதுளை 74% ஆகவும், காலி 72% ஆகவும் உள்ளது. பொலன்னறுவை மாவட்டம் 71% என பதிவாகியுள்ளது. திருகோணமலை 68% ஆகக் காணப்பட , மாதலே 49% ஆகவும், அம்பாறை 41% ஆகவும் குறைந்த நிலையை பதிவு செய்துள்ளன.

கண்டி மற்றும் புத்தளம் ஆகிய மாவட்டங்கள் 93 சதவீதத்துடன் மிக உயர்ந்த நீர் இருப்புப் பதிவைக் கொண்டுள்ளன. எனினும், மாதலே (49%) மற்றும் அம்பாறை (41%) ஆகிய மாவட்டங்களில் நீர்மட்டம் 50 சதவீதத்திற்கும் குறைவாகவே பதிவாகியுள்ளது.

தற்போது போதியளவு நீர் இருப்பு உள்ள போதிலும், வரும் மாதங்களில் நாட்டின் சில பகுதிகளில் மழைவீழ்ச்சி குறையக்கூடும் என வானிலை கணிப்புகள் எச்சரிக்கின்றன.

வறண்ட காலநிலை மற்றும் நீர் ஆவியாதல் ஆகியவற்றைக் கருத்திற்கொண்டு, பயிர்ச்செய்கைக் காலம் முழுவதும் எவ்வித தட்டுப்பாடும் இன்றி நீரை விநியோகிப்பதற்காக, விவசாயிகள் மற்றும் நீர் நுகர்வோர் அனைவரும் நீரை மிகவும் சிக்கனமாகவும், முறையான முகாமைத்துவத்துடனும் பயன்படுத்துமாறு அதிகாரிகள் கேட்டுக்கொண்டுள்ளனர்.