தவறவிடாதீர்கள்..!உடனே பதிவு செய்யுங்கள்

(க.சிவலிங்கமூர்த்தி)

உயிர்த்த ஞாயிறு தாக்குதல் தொடர்பில் முன்னாள் ஜனாதிபதி கோட்டாபய ராஜபக்ஷ மற்றும் இருவர் மீது வெளிநாட்டுப் பயணத் தடை விதிக்கப்பட்டுள்ளமை, தற்போதைய அரசாங்கத்தின் அரசியல் பழிவாங்கல் நடவடிக்கையாகவே அமைகின்றது என ஸ்ரீலங்கா பொதுஜன பெரமுனவின் முன்னாள் அமைச்சர் சரத் வீரசேகர குற்றம் சாட்டியுள்ளார்

ஸ்ரீலங்கா பொதுஜன பெரமுனவின் தலைமையகத்தில் நேற்று செவ்வாய்க்கிழமை (02) நடைபெற்ற ஊடகவியலாளர் மாநாட்டில் கலந்துகொண்டு கருத்து தெரிவிக்கும் போதே, அவர் மேற்கண்டவாறு தெரிவித்தார்.

அவர் அங்கு மேலும் உரையாற்றுகையில்,

உயிர்த்த ஞாயிறு தாக்குதலை அடிப்படையாகக் கொண்டு, முன்னாள் ஜனாதிபதி கோட்டாபய ராஜபக்ஷவை ஆட்சிக்குக் கொண்டு வருவதற்காகவே அந்த தாக்குதல் நடத்தப்பட்டதாகச் சித்தரிக்க குற்றப் புலனாய்வுத் திணைக்களம் முற்படுகின்றது. இது ஒரு இழிவான முயற்சியாகும். சுரேஷ் சலே போன்ற ஒரு அதிகாரியை 180 நாட்கள் தடுத்து வைத்து, போதிய வசதியற்ற அறையில் வைத்து சித்திரவதைக்கு உள்ளாக்குவது அநீதியாகும்.

குற்றப் புலனாய்வுத் திணைக்களத்தின் தற்போதைய பணிப்பாளர் நாயகம் மற்றும் பொது பாதுகாப்பு அமைச்சின் செயலாளர் ஆகியோர், தற்போதைய அரசாங்கத்தின் அரசியல் மேடைகளில் உரையாற்றியவர்கள் என்பது அனைவரும் அறிந்ததே. எனவே, இது முழுக்க முழுக்க அரசியல் பழிவாங்கல் என்பது தெளிவாகின்றது.

உயிர்த்த ஞாயிறு தாக்குதல் தொடர்பாக உள்நாட்டிலும் வெளிநாட்டிலும் பல விசாரணை ஆணைக்குழுக்கள் மற்றும் பாராளுமன்றத் தெரிவுக்குழுக்கள் அமைக்கப்பட்டுள்ளன. அத்துடன், அமெரிக்காவின் எப்.பி.ஐ, இன்டர்போல், அவுஸ்திரேலிய மற்றும் ஸ்கொட்லாந்து யேர்ட் பொலிஸார் என பல வெளிநாட்டு விசாரணைகளும் இடம்பெற்றுள்ளன.

இந்த எந்தவொரு விசாரணையிலும் கோட்டாபய ராஜபக்ஷ அல்லது சுரேஷ் சலே ஆகியோரின் பெயர்கள் எங்கும் குறிப்பிடப்படவில்லை. இது ஸஹ்ரான் தலைமையிலான இஸ்லாமிய தீவிரவாதக் குழுவினராலும், ஐ.எஸ்.ஐ.எஸ் பயங்கரவாத அமைப்பின் கொள்கையாலும் நடத்தப்பட்ட தாக்குதல் என்பது உறுதிப்படுத்தப்பட்டுள்ளது.

குறிப்பாக, நியூசிலாந்தில் கிறைஸ்ட்சேர்ச் மசூதியில் மேற்கொள்ளப்பட்ட தாக்குதலுக்குப் பழிவாங்கும் வகையிலும், தாரக ஹோட்டல்களில் வெளிநாட்டவர்கள் தங்கியிருந்தமையால் அவர்களை இலக்கு வைத்தும் இத்தாக்குதல் நடத்தப்பட்டதாக விசாரணைகள் சுட்டிக்காட்டியுள்ளன.

எப்.பி.ஐ விசாரணைப் பிரிவின் பிரதானி ராஜ் படேல், இத்தாக்குதலுக்கும் அரசியல் ரீதியான தொடர்புகளுக்கும் எவ்வித சம்பந்தமும் இல்லை என்பதைத் தெளிவாகக் கூறியுள்ளார். சர்வதேச மட்டத்தில் சிறந்த விசாரணைக்காக அவருக்கும் விருதுகள் வழங்கப்பட்டுள்ளன. இவ்வாறிருக்கையில், முந்தைய ஆணைக்குழுக்களுக்குக் கண்டறிய முடியாத ஒன்றை, தற்போதைய குற்றப் புலனாய்வுத் திணைக்களம் எதன் அடிப்படையில் தேடுகிறது?

அதேபோல், சட்டமா அதிபர் திணைக்களத்தின் பிரதி சொலிசிட்டர் ஜெனரல் திலிப் பீரிஸ், அசாத் மௌலானா என்பவர் சேனல் 4 ஊடகத்திற்கு வழங்கிய ஆதாரமற்ற தகவல்களை வைத்துக்கொண்டு சுரேஷ் சலேயைக் குற்றவாளியாக்க முற்படுகின்றார். தனது குடும்பப் பிரச்சினைகள் காரணமாக நாட்டை விட்டு வெளியேறிய அசாத் மௌலானா, தஞ்சம் கோருவதற்காகவே இவ்வாறான பொய்யான தகவல்களைப் பரப்புகிறார். இவ்வாறான ஒருவரின் கூற்றை வைத்துக்கொண்டு, திலிப் பீரிஸ் போன்ற ஒரு பொறுப்பான அதிகாரி செயற்படுவது, முழு சட்டமா அதிபர் திணைக்களத்தையும் அவமதிக்கும் செயலாகவே நான் கருதுகிறேன்.

மேலும், ஸஹ்ரான் தாக்குதலை நடத்தப்போகிறார் என்பது தெரிந்திருந்தும், அவருக்கு எதிராக இரண்டு பிடியாணை உத்தரவுகள் இருந்தும், ஒன்றரை வருடங்களாக அவரைப் பிடிக்காதவர்களே, தற்போது தாக்குதலுக்கு 24 மணித்தியாலங்களுக்கு முன்னரே அது குறித்து அறிந்திருந்தும் தடுக்கத் தவறியுள்ளனர்.

200 க்கும் மேற்பட்ட உயிரிழப்புகள் மற்றும் 500 க்கும் மேற்பட்ட காயங்களுக்குப் பொறுப்பேற்க முடியாதவர்கள், தங்களின் இயலாமையை மறைக்கவே தற்போது இவ்வாறான கீழ்த்தரமான நாடகங்களை அரங்கேற்றுகின்றனர். மக்கள் இன்றும் விலைவாசி உயர்வு மற்றும் எரிபொருள் விலை ஏற்றத்தால் பெரும் துயரத்திற்கு உள்ளாகியுள்ளனர். இந்த மக்களின் அதிருப்தியை திசைதிருப்பவே அரசாங்கம் கோட்டாபய ராஜபக்ஷவை இலக்கு வைக்கிறது.

சிங்கள பௌத்த தலைவரான கோட்டாபய ராஜபக்ஷவை ஆட்சிக்குக் கொண்டு வர, ஸஹ்ரான் மற்றும் இப்றாஹிம் குடும்பத்தினர் தங்களின் உயிரைத் தியாகம் செய்தார்கள் என்பதை நிரூபிக்க முற்படும் இவர்களின் சிந்தனை குறித்து மக்கள் சிந்திக்க வேண்டும். இது வெளிப்படையான அரசியல் பழிவாங்கல் அன்றி வேறொன்றுமில்லை. கோட்டாபய ராஜபக்ஷ தற்போது நாட்டில்தான் இருக்கின்றார்.

மாகாண சபைத் தேர்தலை நடத்துவது தொடர்பில் எமக்கு ஆட்சேபனை இல்லை. ஆனால், மாகாண சபைத் தேர்தலை நடத்தி வடக்கு மாகாணத்துக்கு காணி மற்றும் பொலிஸ் அதிகாரங்களை வழங்கினால், அதுதான் மிகப்பெரிய பிரச்சினையாகும். எந்தவொரு ஜனாதிபதியும் இதுவரையில் செய்யாத ஒன்றை, தற்போதைய ஜனாதிபதி செய்வார் என்று நான் நம்பவில்லை. அவ்வாறு செய்தால், அது நாட்டை ஒரு கூட்டாட்சி நாடாக மாற்றி, பல தசாப்தங்களாக நாம் பாதுகாத்து வந்த நாட்டின் ஒற்றையாட்சித் தன்மையை இல்லாது செய்துவிடும்.

அதேபோல், எரிபொருள் விலை உயர்வு தொடர்பாக, திறைசேரி நெருக்கடியில் இருப்பதாகக் கூறிக்கொண்டு மக்களை ஏமாற்றுகின்றனர். தரமற்ற நிலக்கரியால் மின்சார உற்பத்தி குறைவடைந்ததாலேயே, அந்த இடைவெளியை நிரப்ப பெருமளவு டீசல் இறக்குமதி செய்யப்படுகின்றது. அதனாலேயே டீசல் விலை அதிகரிக்கின்றது. சர்வதேச சந்தையில் எரிபொருள் விலை குறைவாக இருக்கும்போதும், மக்கள் மீது வரிச் சுமையைச் சுமத்தி அரசாங்கம் முன்னெடுத்துச் செல்லும் இந்த பொய் பிரச்சாரம், மக்களின் பொறுமையைச் சோதிக்கின்றது.

கடந்த ஆட்சியில் கொரோனா பெருந்தொற்று காலத்திலும், நாடு முடக்கப்பட்ட நிலையிலும் அரசாங்க ஊழியர்களுக்குச் சம்பளம் மற்றும் கொடுப்பனவுகளை வழங்கினோம். ஆனால், தற்போதைய அரசாங்கம் ட்ரில்லியன் கணக்கில் கடன் வாங்கியும், எந்தவொரு அபிவிருத்தியையும் செய்யவில்லை. இவ்வாறான சூழலில், நாட்டின் தேசிய பாதுகாப்பை அலட்சியப்படுத்தி, பயங்கரவாதத்தை விட தனிநபர்களை வேட்டையாடுவதில் கவனம் செலுத்துவது, நாட்டின் எதிர்காலத்திற்கு மிகப்பெரிய ஆபத்தாகும்.

நாட்டின் பொருளாதாரச் சுமை மற்றும் மக்களின் அதிருப்தியைத் திசைதிருப்புவதற்காகவே, அரசாங்கம் உயிர்த்த ஞாயிறு தாக்குதலை ஒரு கருவியாகப் பயன்படுத்துகிறது. ஐ.எஸ்.ஐ.எஸ் கொள்கையினால் உந்தப்பட்ட பயங்கரவாதிகளைத் தேடுவதை விட்டுவிட்டு, கோட்டாபய ராஜபக்ஷ மற்றும் சுரேஷ் சலேயை இலக்கு வைப்பது, புலனாய்வு அமைப்புகளின் கவனத்தைச் சிதறடிக்கும் செயலாகவே அமைகிறது. இத்தகைய பழிவாங்கல்கள் நாட்டின் தேசிய பாதுகாப்பிற்கு விடுக்கப்பட்ட எச்சரிக்கையாகவே நாம் கருதுகிறோம்.

முன்னாள் ஜனாதிபதி கோட்டாபய ராஜபக்ஷவின் ஆட்சிக்காலத்தில், நாம் பெரும் சவால்களுக்கு மத்தியிலும், குறிப்பாக கொவிட்-19 பெருந்தொற்று காலத்தில் நாடு முடக்கப்பட்டிருந்த போதும், அரசாங்க ஊழியர்களின் சம்பளம் மற்றும் கொடுப்பனவுகளை எவ்வித தடையுமின்றி வழங்கினோம். அதேபோல, பாடசாலை மாணவர்களுக்கான கல்விச் செயற்பாடுகளையும், பொதுமக்களின் அத்தியாவசியத் தேவைகளையும் உறுதிப்படுத்தினோம்.

ஆனால், தற்போதைய அரசாங்கம் ட்ரில்லியன் கணக்கில் வெளிநாட்டுக் கடன் வாங்கிய போதிலும், மக்களுக்குத் தேவையான எந்தவொரு அபிவிருத்திப் பணியையும் முன்னெடுக்கவில்லை. இத்தகைய தோல்விகளை மறைக்கவும், மக்களின் கவனத்தைத் திசைதிருப்பவும், அரசாங்கம் இவ்வாறான போலிச் செயற்பாடுகளைத் திட்டமிட்டு முன்னெடுக்கின்றது. இவ்வாறான அரசியல் பழிவாங்கல்கள் நாட்டின் ஸ்திரத்தன்மையையும் தேசிய பாதுகாப்பையும் பாரிய ஆபத்துக்குள்ளாக்கும் என்பதை நாம் சுட்டிக்காட்ட விரும்புகிறோம். இந்த கீழ்த்தரமான அரசியல் சதி முயற்சிகள் நிறுத்தப்படும் வரை, நாம் நாட்டுப்பற்றுள்ள மக்களுடன் இணைந்து மிக உன்னிப்பாகக் கண்காணித்து வருவோம் என்றார்.