தவறவிடாதீர்கள்..!உடனே பதிவு செய்யுங்கள்

இலங்கையில் நரம்பியல் சம்பந்தமான மருத்துவச் சேவைகளை மேலும் வினைத்திறனாக முன்னெடுக்கும் நோக்கில், இலங்கை தேசிய வைத்தியசாலையில் 99 மில்லியன் ரூபாய் செலவில் முழுமையாகப் புனரமைக்கப்பட்ட 'நரம்பியல் நிறுவனம்' இன்று திங்கட்கிழமை (ஜூன் 01) பொதுமக்களின் பயன்பாட்டிற்காக கையளிக்கப்படவுள்ளது.

நரம்பியல் சேவைகள் மூலம் மூளை, தண்டுவடம், நரம்பு மற்றும் தசை மண்டலம் தொடர்பான நோய்கள் கண்டறியப்பட்டு சிகிச்சைகள் அளிக்கப்படுகின்றன. இந்தத் திட்டத்தின் மூலம் இலங்கையின் நரம்பியல் சிகிச்சைச் சேவைகள் மிகவும் வினைத்திறனுடையதாக மாற்றமடையவுள்ளன.

 நரம்பியல் நிறுவனத்தின் நிறுவனரும் புகழ்பெற்ற விஞ்ஞானியுமான டாக்டர் ஜே.பி. பீரிஸின் உருவப்படம் சுகாதார மற்றும் வெகுஜன ஊடகத்துறை அமைச்சரால் திறந்து வைக்கப்படவுள்ளது. மேலும், நரம்பியல் நிறுவனத்தின் நரம்பியல் பிரிவு வார்டுகள் 62 மற்றும் 63 ஆகியன உத்தியோகபூர்வமாகத் திறந்து வைக்கப்படவுள்ளன.

இப்பிரிவில், 22 நோயாளர்களுக்கான படுக்கை வசதிகளுடன், பெண்களுக்கு 2 வார்டுகளும் ஆண்களுக்கு 2 வார்டுகளும் அமைந்துள்ளன. இந்த வார்டு வளாகத்தைப் புதுப்பிப்பதற்காக சுகாதார அமைச்சு 52 மில்லியன் ரூபாயை ஒதுக்கியுள்ளது. இதேபோல்,  தரைத்தளத்தில் உள்ள இயன்முறை மருத்துவப் பிரிவை  புதுப்பிப்பதற்காக 21 மில்லியன் ரூபாய் ஒதுக்கப்பட்டுள்ளது. மேலும், மூன்றாவது மாடியில் உள்ள பேச்சுச் சிகிச்சை  தொழில்சார் சிகிச்சை  பிரிவுகள் மற்றும் செவிப்புலன் சிகிச்சை அறையைப் புதுப்பிப்பதற்காகச் சுமார் 25 மில்லியன் ரூபாய் ஒதுக்கப்பட்டுள்ளது.

இந்த வார்டுகள் திறக்கப்பட்ட பிறகு, தற்போது 16-ஆவது வார்டில் நூறு ஆண்டுகளுக்கும் மேலான பழமையான கட்டிடத்தில் இயங்கி வரும் நரம்பியல் பிரிவுகள் 3 மற்றும் 4, நோயாளிகளுக்கும் பணியாளர்களுக்கும் தேவையான சௌகரியங்களை வழங்கும் வகையில், கூடுதல் வசதிகளுடனும் நெரிசலின்றியும் செயல்பட முடியும்.

சுகாதார மற்றும் வெகுஜன ஊடக அமைச்சின் செயலாளர் டாக்டர் அனில் ஜாசிங்க மற்றும் மேலதிக செயலாளர் டாக்டர் குமார் விக்ரமசிங்க ஆகியோருடன், சுகாதாரத் துறையைச் சேர்ந்த பல முக்கிய பிரமுகர்களும் இந்த விழாவில் கலந்து கொள்ளவுள்ளனர்.